Ko-Dabirɛnu 23 - ALLALA KUMƐ

Sira Faga-Koe

¹ Sira siyi ya san kɛmɛ ani san mogan-ni-wɔrɔnfila (127) le bɔ, a nara to fagala.

² A fagara Hiburɔn soe burɔ Kenan nyamanɛ rɔ. Iburayima dira Sirala ko la.

³ Iburayima ya a lasɔ ka bɔ ala musi furi dafɛ ka ta a fɔ dugurannu ye ko,

⁴ “Sundan le nde la min siginɛ wole Hɛtinu tɛma. Wo ni dugu-kundu-nɛ di n ma alako n ni nna furi togon nyɔ.”

⁵ Duguran wo do ya a fɔ Iburayima ye ko,

⁶ “I wɔlɔ matɔlɔ ma la bawo ma ya a lɔn ko Allata-mɔgɔ-yabɔnɛ le ile la ma tɛma. Kanba-hakikɛ minnu bi ma bolo yan tɔ, i ya lakalan. I ni wo kelen bi ka ila furi togon nyɔ. Ma fenfen ti ma ban kanba-sinnɛ dila i ma.”

⁷ Iburayima ya a madu duguran wonu kɔrɔ.

⁸ A ya a fɔ anu ye ko, “Ni wo ara sɔn ko n ni nna furi togon wo warɛ yan tɔ, nba, wo yandi, wo ta Soharila dan Ɛfirɔn madiya n ye

⁹ alako a ni ata faran di n ma min bi ala dugi dan la Makipela tɛngbɛnya rɔ. Ale si a mayira n ma dɛ min na, a ni a da-bɛrɛbɛrɛ fɔ wo ye, woletɔ a si ma nna kaburu-soe la wo tɛma.”

¹⁰ Nba, wo ya a taran, Ɛfirɔn siginɛ mɔgɔ-banu tɛma soe tara-dɛ la. Ale ya a fɔ Iburayima ye mɔgɛ wonu tɛma nyɔ ko,

¹¹ “Nba, n tigi, i wɔlɔ matɔlɔ n kan la. N si faran wo di i ma anubɛ nna dugi min bi faran wola foolɛ rɔ. N si nyɔ di i ma mɔgɛ kɛ bɛɛ yala bi. I si ila furi togon nyɔ.”

¹² Iburayima ya a madu Hɛti mɔgɔ-ba wonu kɔrɔ.

¹³ A ya a fɔ Ɛfirɔn ye mɔgɛ bɛɛ yala ko, “I ni i tole masɔ a kila-bɛrɛbɛrɛ fɛ. N si a san iko i ye a mɔlɔn tɛgɛla nya min. I yandi, i ni sɔn dugi wo sɔnkɛ la alako n ni nna furi togon nyɔ.”

¹⁴ Ɛfirɔn ya Iburayima yabi ko,

¹⁵ “N tigi, i wɔlɔ matɔlɔ nde le la. Nna dugi wo sɔnkɛ le wodi-gbɛ-gbu kɛmɛ nani na. Kɔnɔ hali wo, n ya a di i ma le. A da ma wo la. Ta ila furi togon nyɔ.”

¹⁶ Iburayima sɔnta wo ma. Ɛfirɔn ya wodi-gbɛ minna ko fɔ mɔgɔ-ba wonu yala, Iburayima ya wodi-gbɛ-gbu kɛmɛ nani (400) wo suman a ye iko yilanu si fan suman nya min.

¹⁷ Ɛfirɔnta dugi anubɛ ata faran anubɛ nyɔ-kɔlɔma minnu bi Makipela tɛngbɛnya rɔ, Mamireya dafɛ, anu ya wo bɛɛ latenbi Iburayima ma ka a ma a halalɛ la

¹⁸ soe tarɛ dɛ la nyɔ Hɛti mɔgɔ-ba wonu yala.

¹⁹ Wo kɔma, Iburayima ya ala musi Sira togon faran wo la min bi Makipela tɛngbɛnya rɔ Hiburɔn soe telen tɔ Kenan nyamanɛ rɔ Mamireta kɔlɔmanu bi kan min.

²⁰ Wo le ya a ma, faran wonubɛ dugi min bi ala foolɛ rɔ Hɛtinuna nyamanɛ rɔ, wonu mara Iburayimata kaburu-soe la.