Ko-Dabirɛnu 22 - ALLALA KUMƐ

Iburayima Kɔrɔbɔ-Koe Ala Dan Faga-Koe Rɔ

¹ Wati tenbinɛ, Alla ya Iburayima kele alako a ni a kɔrɔbɔ. A ya a fɔ a ye ko, “Iburayima.” Iburayima ya a labira, a ko, “O-o.”

² Alla ya a fɔ a ye ko, “Ila den kelen pe Isiyaka min diyanɛ i ye, wo bi kaka. I ni ta Muraya nyamanɛ rɔ. I ni a ma saraka-mintantɛ la kɔnkɛ kuma n bi nala min yirala i la.”

³ Iburayima ya a lasɔ subagɛ ma ka sɔgɛ do nyini saraka-mintantɛla ko la. A ya ala dunɛnu kiri ala sofɛlɛ kɔ tɛma. Anubɛ ala den Isiyaka anubɛ wɔli-kɛla mɔgɔ filɛ wonu wulita ka ta kan tinɛ wo rɔ Alla ya minna ko fɔ a ye.

⁴ Anuna tagama tele sawa nyɔgɛ ma, Iburayima ya a yɛ lata wula-yan la. A ya kan tinɛ wo yen.

⁵ Iburayima ya a fɔ ala wɔli-kɛlɛ wonu ye ko, “Wo ni ma makɔni sofɛlɛ kɛ fɛ yan. Mabɛ nna den Isiyaka ni ta pan ka Alla bato nyɔ. Ma ye nala, yɔ!”

⁶ Iburayima ya sɔgɛ wo bi ka a sa ala den Isiyaka kuma. Ale ya tɛ anubɛ muri bi. Anu mɔgɔ filɛ bɛɛ ye yɛlɛla kɔnkɛ wo kuma,

⁷ Isiyaka ya a fa rakele. A fa ya a labira. Isiyaka ko, “N fa, tɛ anubɛ sɔgɛ ye ma bolo saraka-mintantɛla ko la kɔnɔ saga-dan wo ye mintɔ?”

⁸ Iburayima ya a yabi ko, “Nba, nna den, Alla si ma makoe nyinya ka sagɛ labɔ min si ma ala saraka-mintantɛ la.” Anu mɔgɔ filɛ bɛɛ tora tala anu nyɔgɔn fɛ.

⁹ Anu ke nyɔ, Iburayima ya saraka-mintan-tinɛ sɔ kɔnkɛ wo kuma ka sɔgɛ ladɛn wo kuma. Wo kɔma, a ya ala den Isiyaka kiri ka wo sa sɔgɛ wo kuma nyɔ rɔ.

¹⁰ Iburayima ya ala muri bi ka a layɛlɛ. A sɔgɛ ye a la ka ala dan wo faga

¹¹ kɔnɔ Mari ya a felen melika la. A ya a rakele san-kole rɔ iko fila, a ko, “Iburayima, Iburayima.” Iburayima ko, “O-o, n bi yan.”

¹² Mari ya a fɔ a ye ko, “I kana ko-wo-ko ma ila dan kɛ la kamasɔrɔn n bara a lɔn kaka ko nde, Alla, gbiliyanɛ i bolo. I ma sɔn ka ila dan kelan dogon fɔ ka a di nde, Alla, ma.”

¹³ Iburayima ya a yɛ lata gbɔfɔ-nɛ kɔrɔ ka saga-yigi yen a kere gbarannɛ nyansankalan rɔ. Iburayima tara ka saga-yigi wo bi ka a ma saraka-mintantɛ la ala dan wo gbɛ rɔ.

¹⁴ Iburayima ya kan-tinɛ wo tɔgɔ sa “Mɔgɔ Mako-Nyinya-Tinɛ Mari Bolo,” ado ha bi, mɔgɛnu bi a fɔla kɔnkɛ wo ma ko, “Mari si mɔgɛ makoe nyinya ata kɔnkɛ kɛ le kuma.”

¹⁵ Mari ya Iburayima rakele san-kole rɔ tun.

¹⁶ Mari ya a fɔ a ye ko, “Bawo i ma ila den kelen pe dogon n ma min kɛ, n bara n keli n nyɛrɛ rɔ

¹⁷ ko nta duwɛ si to yigila i kuma serr! N si i bɔnsɔn lasiyaya iko lolenu anubɛ ba-kɛnkɛn siyayanɛ nya min. I bɔnsɔn-mɔgɛnu si anu kɛlɛ-nyɔgɛnu nɔ.

¹⁸ Duninya-mɔgɛ bɛɛ si duwɛ sɔrɔn ile bɔnsɔn fɛ kamasɔrɔn i wara n kuman-kan to a gbɛ rɔ.”

¹⁹ Nba, Iburayima anubɛ ala dan sɛgira ala wɔli-kɛlɛnu bara. Wo kɔma, anu dama wulita nyɔ rɔ ka sɛgi anu barɛ Biri-Siba. Iburayima tora siginɛ nyɔ.

Iburayima Na Kelen Nyɔgɛ Nehori Wara-Koe

²⁰ Wati tenbinɛ, Iburayima ya a lamɔɛn ko a na-kelen-nyɔgɛ Nehorila musi Milaka ara den siyaman sɔrɔn.

^21-22 A ya den fɔlɔtɛ min sɔrɔn, wo tɔgɛ le Yusi. Yusi ya a gbara sa Busi la. Wo ya a gbara sa Kɛmuwɛli la. Kɛmuwɛli dɔgɛ le kɛnu na, Kesɛdi wo, Haso wo, Pilidasi wo, Yidilafi wo, anubɛ Bɛtuwɛli. Kɔnɔ Kɛmuwɛli wo ya dan do sɔrɔn min tɔgɛ Aram.

²³ Bɛtuwɛli wo fanan ya dunmusi do sɔrɔn min tɔgɛ Rebɛka. Nehorila musi Milaka ya den-kei segan kɛnu sɔrɔn Iburayima na-kelen-nyɔgɛ wo ye.

²⁴ Kɔnɔ Nehorila yɔɔn-musi min tɔgɛ Ruma, wo fanan ya den-kei mɔgɔ nani sɔrɔn a ye. Dan wonu tɔgɛ le kɛnu na, Teba wo, Kahamu wo, Tahasi wo, anubɛ Meyaka.