Ko-Dabirɛnu 2 - ALLALA KUMƐ

Duninya Dan-Koe Tele Wɔrɔnfila Nyɔgɛ

¹ Alla banta duninya danna ka le anubɛ fan min bɛɛ ye a rɔ.

² Alla ya wɔlɛ min bɛɛ kɛ, a ya wo ban tele wɔrɔ le kɔrɔ. A tele wɔrɔnfila nyɔgɛ ma, a ya a sulen.

³ Woletɔ Alla ya ata duwɛ layigi a tele wɔrɔnfila nyɔgɛ wo ma ka wo ma tele-latankanɛ la kamasɔrɔn Alla ya a sulen duninya dan-koe ma wulɔn le.

⁴ Alla ya duninya dan wo nya na le. Mari Alla ya duninya dan tumɛ min,

Allata Nakɔɛ Wara-Koe

⁵ dugu-kole makolɔn le nun. Ki-fan anubɛ fira sa nun kamasɔrɔn mɔgɔ sa min si a wɔli, ado Mari Alla ma bandɛ lana wɛ dugu-kole kuma nun

⁶ fɔ yi min bi bɔla dugi kɔrɔ, wo le ye dugi kimala nun.

⁷ Wo kɔma, Mari Alla ya kei dan ka bɔ bɔnkɛ rɔ. Alla ya a nyɛrɛ niyi bila a sunyɛ rɔ. Kei wo ya niyila fɛyɛ dabira. A mara dali-fen-kɛndɛ la.

⁸ Wo kɔma, Mari Alla ya nakɔɛ labɔ kan tinɛ do rɔ min tɔgɛ Idɛn. Wo ye tele-bɔɛ wara la. A ya kei min dan, a ya wo sigi nakɔɛ wo rɔ.

⁹ Kɔlɔma su bɛɛ minnu kin, ado anu gbɔɛ si dɔn, Mari Alla ya wonu nafɛrɛn nakɔɛ wo rɔ. Kɔlɔma fila ye nakɔɛ wo tɛma nun, “Nimaya-Kɔlɔma” anubɛ “Ko-Nyimɛ-anubɛ-Ko-Yoge-Lɔn-Kɔlɔma.”

¹⁰ Bɛ do ye Idɛn nakɔɛ wo tɛma. Kɔlɔma min bɛɛsi ye nakɔɛ wo rɔ, wonu sulinu bi yi sɔrɔnna bɛ wo le tɔ. Ba-kun nani sɔra bɛ wo ma Idɛn nakɔɛ wo kɔma kilɛ la.

¹¹ Bɛ wo kelan tɔgɛ le Pisɔ. Bɛ wo le tara ha Hafila nyamanɛ rɔ ka basan a la.

¹² Sɛnɛ-hakikɛ anubɛ tulu-suma-diyamɛ anubɛ kuru-da-gbɛlɛmɛnu bi nyɔ le.

¹³ Bɛ doi fanan tɔgɛ le Kiyɔn. Bɛ wo le tara ha Kusi nyamanɛ rɔ ka basan a la.

¹⁴ Bɛ doi fanan tɔgɛ le Takarasi. Bɛ wo le tara ha Asiriya nyamanɛ tele-bɔɛ wara la. Bɛ doi fanan tɔgɛ le Yufereti.

¹⁵ Mari Alla ya kei wo sigi Idɛn nakɔɛ wo rɔ alako a ni nakɔɛ wo fɛ-bira.

¹⁶ Mari Alla ya a fɔ kei wo ye ko, “Kɔlɔma min bɛɛsi ye nakɔɛ kɛ rɔ, i ni wonu gbɔɛ dɔn.

¹⁷ Kɔnɔ fɔ ‘Ko-Nyimɛ-anubɛ-Ko-Yoge-Lɔn-Kɔlɔma’ gbɔɛ, i kana wo dɔn kamasɔrɔn ni i ya wo dɔn, i si faga serr!”

¹⁸ Mari Alla ko, “Kei kelan ma bɛn. N si a dɛnbɛnɛ dan a ye, anubɛ min si bɛn.”

¹⁹ Ado nfan, Mari Alla ara soge anubɛ kona min bɛɛsi ladan bɔnkɛ la nun, a nara anu na kei wo wara alako a ni a lɔn kei wo si na anu tɔgɛ sa nya min. Kei wo ya nima-fan wonu bɛɛsi tɔgɛ sa nya min, anu tɔgɛ tora wo nya na le.

²⁰ A kolo-fen wo, a kona wo, a sogo wo, kei wo ya wo tɔgɛ sa kɔnɔ kei wo ma a dɛnbɛna yen wonu tɔ anubɛ min si bɛn.

²¹ Mari Alla ya kinɔgɔ-belebele latenbi kei wo ma. A ye kinɔgɛ wo rɔ, Alla ya a kɔgɔ-barasa-kolo kelen bi ka a fɛrɛ latogon a gbɛ rɔ.

²² Mari Alla ya kɔgɔ-barasa-kole wo bi ka a ma musi la. A nara musi wo la kei wara ka a di a ma.

²³ Kei wo ko, “Sobore! N nyɛrɛ kole anubɛ n nyɛrɛ fɛrɛ-bɔnkɛ le kɛ la. N si kɛ kele ko, ‘musi’ kamasɔrɔn a ara bɔ kei rɔ.”

²⁴ Woletɔ kei si a na anubɛ a fa boloka ka tugun ala musi la. Anu si ma mɔgɔ kelen na.

Kei anubɛ Musila Hakɛ Kɛ-Koe

²⁵ Nba, kei wonubɛ ala musi, anu filɛ bɛɛsi lakolɔn le nun kɔnɔ anu ma miliya ko lɔn nun.