Ko-Dabirɛnu 18 - ALLALA KUMƐ

Isiyaka Sɔrɔn Wara-Koe

¹ Tele latelan wati, Iburayima siginɛ ala fani-bɔn dɛ la Mamireta kɔlɔma-latankanɛnu kɔrɔ, Mari bɔra a ye gbɛ rɔ. A mara nya min, wo le kɛ la.

² A ya a yɛ lata ka kei sawa sɔnɛ yen wulɛ la. A ya anu tagbɛ tumɛ min, a burimatoe bɔra fani-bɔn la ka anu nabɛn. A ya a laburun a ma dugi ma anu kɔrɔ.

³ A ya a fɔ anu ye ko, “N fanu, wo yandi, wo belen wo sulenna n barɛ yan tɔ. Wola wɔli-kɛlɛ le nde la.

⁴ N ni na yi la wo ye alako wo ni wo kiannu maku. Wo ni wo sulen kɔlɔma-ninɛ kɛ la.

⁵ N si na dɔn-fen-ni na wo ye alako wo si sɛnbɛ sɔrɔn nya min. Wo kɔma, wo si tenbi kamasɔrɔn wo ara nde gbiliya ka na n barɛ.” Woletɔ anu sɔnta anu sulen-koe ma nyɔ.

⁶ Iburayima donta fani-bɔn la tiriya! A ya a fɔ Sira ye ko, “I lakaliya ka dɛgɛ-munku-hakikɛ pani-kunbɛ-nya tan-ni-loli bi ka a ladan biredi la.”

⁷ Iburayima burimatoe tara ala wɔrɛ rɔ ka ninki-den-tɔlɔni kelen bi ka na wo don ala wɔli-kɛlɛ do bolo. Wo ya a lakaliya wo ladanna.

⁸ Iburayima ya kɛkɛ wo bi anubɛ ninki-tuli anubɛ nonɛ ka ta sundan wonu fanda wo la. Wo tumɛ anu bi fen-dɔn la, a sɔra anu dafɛ kɔlɔma kɔrɔ.

⁹ Anu ya a manyinika ko, “Ila musi Sira wo ye mintɔ?” A ko, “A ye fani-bɔn la.”

¹⁰ Mari ya a fɔ Iburayima ye ko, “Kɛ nyɔgɔn wati yari, n si sɛgi i warɛ yan tɔ. Ila musi Sira si den-kei sɔrɔn.” Sira tole masɔnɛ fani-bɔn dɛ la anu kɔma kilɛ la.

¹¹ Nba, Iburayima anubɛ Sira ara kɔrɔya nun. Anu bara san siyaman bɔ. Sirala den-sɔrɔn-wati ara tenbi.

¹² Woletɔ Sira yɛlɛnta a yisi rɔ ka a miri a ma ko, “Nde min mafɔsɔnɛ kɛ la, nde si ke sɛgila fonikeyɛ rɔ tun ka dan sɔrɔn, ado n tigi fanan bara kɔrɔya?”

¹³ Woletɔ Mari ya a fɔ Iburayima ye ko, “Sira ye yɛlɛnna nfenna? A ya a fɔ nfenna ko ale ara kɔrɔya, a ti ke dan sɔrɔnna tun?

¹⁴ Koe do ye nyɔ min gbɛlɛ Mari yala, wa? N si sɛgi i warɛ yan a wati-latɛgɛnɛ rɔ yari. Sira kɛ si den-kei sɔrɔn, yɔ.”

¹⁵ Sira ya sɔsɔli sa kamasɔrɔn a kilannɛ. A ko, “N ma yɛlɛn kɔɔ!” Kɔnɔ Mari ko, “Ade, i yɛlɛnta le serr!”

Iburayimala Madiyalɛ Sɔdɔm Soela Ko La

¹⁶ Mɔgɔ sawɛ wonu wulita ka bɔ nyɔ ka ta anu yɛ layigi Sɔdɔm soe waralɛ ma. Iburayima ya anu bila-sila.

¹⁷ Mari ya a miri a yisi rɔ ko, “N ba wuli koe min mala, n ti wo dogon Iburayima ma

¹⁸ kamasɔrɔn Iburayima bɔnsɔn si sɛnbɛ sɔrɔn. Duninya-mɔgɛ bɛɛ si duwɛ sɔrɔn ale fɛ.

¹⁹ N bara Iburayima ma nta mɔgɔ-yabɔnɛ la woletɔ a si ala dannu anubɛ a bɔnsɔn-mɔgɛnu karan n bara-koe ma alako anu ni ko-latelennɛ kɛ ka nna kumɛnu bira. Ni anu ya wo ma, n bara nta lanyiri min kiri Iburayima ye, n si wo latɔnbagaya.”

²⁰ Wo kɔma, Mari ya a fɔ Iburayima ye ko, “Mɔgɛnu bi kuma-yogomɛ min fɔla Sɔdɔm anubɛ Kɔmɔra soenuna ko la, wo ara n tɔrɔ, ado anu sɔn yogo ha ka a dan-natenbi.

²¹ N si ta nyɔ kaka ka anu mafɛlɛn ni anu bi ko-yogomɛ mala iko mɔgɛnu bi a fɔla nya min.”

²² Melika filɛ wonu bɔra nyɔ ka ta Sɔdɔm soe burɔ kɔnɔ Mari tora sɔni Iburayima dafɛ.

²³ Iburayima ya a madon Mari la doni ka a manyinika ko, “I si mɔgɔ-telennɛnu fanan halaki mɔgɔ-yogomɛnu fɛ, wa?

²⁴ Ni mɔgɔ-telennɛ bi-loli si taran soe wo burɔ, i si soe wo halaki, wa? Mɔgɔ-telennɛ bi-loli minnu bi nyɔ, i ti kan tinɛ wo to nyɔ wonuna ko la, wa?

²⁵ Mari, ile lara a la, i si mɔgɔ-telennɛnu faga mɔgɔ-yogomɛnu fɛ? I yandi Mari, i kana mɔgɔ-telennɛnu kofu mɔgɔ-yogomɛnu ma. Ile min bi duninya-mɔgɛ bɛɛ kiti tɛgɛla, a bɛnta, i ni ko-latelennɛ kɛ.”

²⁶ Mari ya a fɔ a ye ko, “Ni n ya mɔgɔ-telennɛ bi-loli yen Sɔdɔm soe burɔ, n si anu bɛɛsi to nyɔ wonuna ko la.”

²⁷ Iburayima ya a fɔ a ye tun ko, “N bara kuma i ye yisi-latɛgɛ rɔ. Nde ma bɛn ka wo ma kamasɔrɔn fenfen ma nde la. N mani de iko gbangban i yala.

²⁸ Ni mɔgɔ bi-nani ani mɔgɔ loli telennɛ ye anu tɛma, i si soe wo bɛɛsi halaki, wa?” Mari ko, “Ni n ya mɔgɔ-telennɛ bi-nani ani mɔgɔ loli yen nyɔ, n ti anu halaki worɔ.”

²⁹ Iburayima ya Mari madiya tun ko, “Ni mɔgɔ bi-nani taranta nyɔ don? Wo si ma kama?” Mari ko, “N ti soe halaki mɔgɔ bi-nanɛ wonuna ko la.”

³⁰ Iburayima ko, “N tigi, i kana kɔrɔtɔ n ma kɔnɔ i yandi, a ma, n ni kuma tun. Ni mɔgɔ bi-sawa taranta nyɔ min telennɛ don?” Mari ko, “N ti a halaki mɔgɔ bi-sawa wonuna ko la.”

³¹ Iburayima ko, “I yandi, i hakɛ to n ye. N bi kumala i ye kerinteyɛ la tun. Ni i ya mɔgɔ mogan taran nyɔ rɔ min telennɛ don? Wo si ma kama?” Mari ya a yabi ko, “N ti anu halaki mɔgɔ mogan wonuna ko la.”

³² Iburayima ko, “N tigi, i yandi, i kana i tɛgɛ sigi n ma. I si a ma, n ni kuma iko kelen? Ni i ya mɔgɔ tan taran nyɔ don?” Mari ya a yabi ko, “N ti anu halaki mɔgɔ tan wonuna ko la.”

³³ Mari banta kumala Iburayima ye tumɛ min, a tara. Iburayima sɛgira a warɛ bɔn la.