Ko-Dabirɛnu 16 - ALLALA KUMƐ

Hega anubɛ Sirayi Wara-Koe

¹ Buramala musi Sirayi ma den sɔrɔn fɔlɔn kɔnɔ Iyipiti yɔɔn-musi do taranta ale Sirayi bolo. A tɔgɛ le Hega.

^2-3 Burama san tan nyɔgɛ ma Kenan nyamanɛ rɔ, Sirayi ya a fɔ a ye ko, “Nba, Mari ma den di n ma nkɛkuna, i yandi, i ni nna yɔɔn-musi kɛ latenbi i kɔma. Tumado yɔɔn-musi kɛ si ma nna bon-sɔlɛ la.” Burama ya Sirayi kuman-kan bira. Sirayi ya ala yɔɔn-musi Hega bi ka a latenbi ala kei ma.

⁴ Burama ya yɔɔn-musi wo latenbi a kɔma tumɛ min, wo ya buyi bi. Hega ya a yen tumɛ min ko a ara buyi bi, a tigi Sirayi wo bɔrɔ ma taran ale Hega ye tun.

⁵ Sirayi ya a fɔ Burama ye ko, “Hega wo ara yoo n ma min kɛ, i gbɛ le wo la. N bara yɔɔn-musi min natenbi i ma, wo ara a yen min kɛ ko a kolomɛ le, n bɔrɔ sa a ye tun. Alamɛ Mari ya kiti tɛgɛ malebɛ ile tɛma.”

⁶ Burama ya a fɔ Sirayi ye ko, “Ile letan ila yɔɔn-musi la. Min di i ye, i ni wo ma a la.” Sirayi ya karagbɛlɛyɛ sigi ala yɔɔn-musi wo la tumɛ min, a ya a buri Sirayi kɔrɔ.

⁷ Mari nara melikala muninyɛ rɔ ka Hega wo yen tenke dafɛ wulɛ rɔ, tenke min bi Sura wularɔ-kilɛ la, kɔni.

⁸ Melika wo ya a fɔ a ye ko, “Ile Sirayila yɔɔn-musi, Hega, i bɔnɛ mintɔ? I ye tala mintɔ?” A ko, “N bi n burila n tigi Sirayi kɔrɔ.”

⁹ Melika wo ya a fɔ a ye ko, “Sɛgi i tigi wara ka i nyɛrɛ lasɔnnaya a ye.”

¹⁰ Melika wo ya Hega yili-madiya ko, “I sibole si siyaya ha a dan ti ban lɔnna.

¹¹ I si den-kei sɔrɔn. I si a tɔgɔ sa Sumanyila kamasɔrɔn nde, Mari ara ila tɔrɔyɛ di-kɛ-kan namɔɛn. Sumanyila wo kɔrɛ le ko, ‘Alla si ko lamɔɛn.’

¹² Ila dan wonubɛ a bɔnsɔnnu si ma iko sofɛli-kolobɛlɛ. Anu si ma mɔgɛ bɛɛ yoge la. Mɔgɛ bɛɛ si ma anu yoge la. Anubɛ anu na-kelen-nyɔgɛnu ti sigi kan-tina-kelen sɔndɔma-finteyɛ bolo.”

¹³ Mari min kumara Hega ye, Hega ya wo tɔgɔ sa “Alla min kolonkɛ ye n na.” A ko, “Alla Min Kolonkɛ Ye N Na, n bara wo yen n yɛ la kɔnɔ n ma faga.”

¹⁴ Woletɔ kɔlɔn min bi Kɛdɛsi soe anubɛ Bɛrɛdi soe tɛma, anu bi wo kelela ko, “Alla Min Kolonkɛ Ye N Na, Wota Kɔlɔn.”

^15-16 Hega ye den-kei wo sɔrɔnna Burama ma tumɛ min, wo ya a taran, Burama sɔrɔn ara san bi-segin ani san wɔrɔ bɔ. Burama ya ala dan wo tɔgɔ sa Sumanyila.