Ko-Dabirɛnu 14 - ALLALA KUMƐ

Lɔti Bira-Koe

¹ Mansa Amirofɛli min bi Babilɔn nyamanɛ kun na wo, Mansa Ariyoki min bi Ilasa nyamanɛ kun na wo, Mansa Kɛdolama min bi Ilam nyamanɛ kun na wo, Mansa Tidali min bi Koyim nyamanɛ kun na wo, mansa nanɛ kɛnu ya anu kundɛn kan-tina-kelen so loli kɛlɛ-koe la.

² Anu bi so loli minnu kɛlɛla Dalɛ Faganɛ dafɛ wonu tɔgɛ le kɛnu na, Sɔdɔm soe wo, Kɔmɔra soe wo, Adima soe wo, Sebom soe wo, anubɛ Bela soe min tɔgɛ fanan Sowa. Sɔdɔm so-tigi-tɔgɛ le Bera. Kɔmɔra so-tigi-tɔgɛ le Birisa. Adima so-tigi-tɔgɛ le Sinabu. Sebom so-tigi-tɔgɛ le Sɛmɛbɛri.

^3-4 So-tigi loli kɛnu bi Mansa Kɛdolama wo kɔrɔ san tan-ni-fila kɔrɔ. A san tan-ni-sawa nyɔgɛ ma, anu murutiyara Mansa Kɛdolama kɛ ma. So-tigi loli kɛnu ya anu kundɛn Sidin lɛɛ rɔ min tɔgɛ fanan Dalɛ Faganɛ.

⁵ A san tan-ni-nani nyɔgɛ ma, Mansa Kɛdolama anubɛ mansɛ minnu bi a dafɛ tele bɔɛ wara la, wonu tara sibolo-gbɛrɛkɛ-mɔgɛnu kɛlɛ tinɛ. Anu ya mɔgɔ-layan-bɛnu kɛlɛ Asirokanam soe burɔ. Anu ya Susinnu kɛlɛ Hama soe burɔ. Anu ya Eminnu kɛlɛ Kiriyateyim lɛɛ rɔ.

⁶ Anu tara Horanu kɛlɛ Idɔm kɔnkɛnu kuma, ha ka ta ke Elipara soe ma min bi wulɛ dala.

⁷ Anu sɛgira anu kɔma kilɛ la ka ta ke Kɛdɛsi soe ma (min tɔgɛ fanan Emisipati), ka Amalɛkinu kɛlɛ ka anuna nyamanɛ bi anu bolo. Anu ya Amoranu kɛlɛ fanan minnu siginɛ Hasason-tama soe burɔ.

^8-9 Wo kɔma, so-tigi loli minnu ya anu kundɛn Dalɛ Faganɛ dafɛ, wonu fanan ya tele-bɔɛ warala-mansa nanɛ wonu fanan kun-kɔrɔ-bɛn kilɛ la kɛlɛ la.

¹⁰ Sidin lɛɛ wo lafanɛ denkɛnu na, kolota pindipandinu bi minnu tɔ. Sɔdɔm anubɛ Kɔmɔra so-tigi wonu burimatoe buira denkɛ wonu tɔ. So-tigi sawɛ minnu tora, wonu burimatoe tara anu dogon kɔnkɛnu tɔ.

¹¹ Mansa nanɛ wonu tara bui Sɔdɔm anubɛ Kɔmɔra soenu ma ka anuna nɔnfuli anubɛ anuna dɔn-fannu bi anu bolo. Anu tara anu ye.

¹² Anu ya Burama kɔrɔla den Lɔti bira anubɛ a bolo-fannu ka ta anu na bawo ale fanan siginɛ Sɔdɔm soe burɔ.

Lɔti Kisi-Koe Burama Bolo

¹³ Mɔgɛ do ya a buri kɛlɛ rɔ ka ta wo bɛɛsi rakaran Burama ye. (Burama wo bɔra Iburu kegeyɛ le tɔ.) Wo wati rɔ, Burama daga makɛnɛ Mamirela kɔlɔma-kuri-latankanɛnu dafɛ. Amora do le Mamire kɛ la. Mamire anubɛ a na-kelen-nyɔgɛnu Esikoli anubɛ Aneri, wonubɛ Burama bara diyanaya lanyiri kiri anu nyɔgɔn tɛma nun.

¹⁴ Burama ya a lamɔɛn tumɛ min ko anu bara a kɔrɔla den-kei Lɔti bira, ala bonna-mɔgɔ kɛmɛ sawa, mɔgɔ tan-ni-segin (318) minnu kusan kɛlɛ kɛla, a ya kɛlɛ-kɛ-fannu don wonu bolo. Wonu tara mansɛ wonu sagaranna ha ka ke Dan soe burɔ.

¹⁵ A ya ala kɛlɛ-dannu tatala nyɔ rɔ. Wonu tara mansɛ wonu natɛrɛna suyi rɔ ka anu kɛlɛ. Anubɛ ala kɛlɛ-dannu ya mansɛ wonu nɔ ka ta anu gbenna ha ka ke Hoba soe burɔ, Damasika soe kan tɔ.

¹⁶ Kɛlɛ tara mɔgɛnu bolo-fan minnu na, Burama ya wonu bi anu bolo. A nara a kɔrɔla den Lɔti la anubɛ ala denbayɛ anubɛ a bolo-fannu. Kɛlɛ ya mɔgɔ-gbɛrɛ anubɛ musi minnu bira, a nara wonu fanan na.

Mɛlikisidaki Duwa-Koe Burama Ye

¹⁷ Burama sɛgira tumɛ min ka bɔ Mansa Kɛdolama anubɛ a ta-nyɔgɛ mansɛnu nɔ tinɛ, Sɔdɔm so-tigi-kurɛ tara anu nabɛn tinɛ Safɛ lɛɛ rɔ. (Anu bi lɛɛ wo kelela fanan ko Mansa lɛɛ.)

¹⁸ Selam so-tigi Mɛlikisidaki nara biredi anubɛ nɔnbɔ-gbɔ-yi la Burama ye. Alla Min Bi Fan Bɛɛ Kun Na, wola saraka-masɔlɛ do le Mɛlikisidaki kɛ la.

¹⁹ A duwara Burama ye, a ko, “Alla Min Bi Fan Bɛɛ Kun Na, min ya san-kole anubɛ dugu-kole dan, alamɛ wota duwɛ yigira i kuma.

²⁰ Alla Min Bi Fan Bɛɛ Kun Na min bara i yogenu don i bolo, tantolɛ ni ke wo ye.” Burama ya minnu sɔrɔn kɛlɛ rɔ, a ya wonu yaka bɔ ka wonu di Mɛlikisidaki ma.

²¹ Sɔdɔm so-tigi ya a fɔ Burama ye ko, “Nna mɔgɛnu nasɛgi n ma, nɔnfuli wo ni to ile ye.”

^22-24 Kɔnɔ Burama ya a fɔ Sɔdɔm so-tigi wo ye ko, “Fɔ kɛlɛ-dannu ya minnu dɔn kilɛ la, n kan sa wonu ma. Wo kɔma, i ni n diyana-mɔgɛnutɛ bɔ nɔnfuli la minnu tara n fɛ kɛlɛ rɔ, Mamire anubɛ Aneri anubɛ Esikoli, kɔni. Kɔnɔ n bara lanyiri kiri Mari Alla ye min bi fan bɛɛ kun na, min ya san-kole anubɛ dugu-kole dan ko ile so-tigitɛ ye fan minnu na, hali wo sanbara-yili anubɛ yesekara-kolo kelan, n ti wonu bi i bolo. N bi wo tɛgɛla min ma, alako i kana a fɔ n kɔma ko i wara nde ma nɔnfulu-tigi la.”