Ko-Dabirɛnu 12 - ALLALA KUMƐ

Burama Kele-Koe Mari Bolo

¹ Mari ya a fɔ Burama ye ko, “I fa anubɛ ala denbayɛnu boloka anubɛ i bɔnsɔn ka i bɔ ila nyamanɛ rɔ ka ta nyamani-gbɛrɛkɛ rɔ n si na min yira i la.

² N si i sibole lasiyaya ka wonu bɔnsɔn fanan nasiyaya. N si nta duwɛ layigi i kuma ka i ma tɔgɔ-tigi-wɛ anubɛ duwa-tigi la.

³ Min ba duwa i ye, nta duwɛ si to wo kuma. Min ba i danka, n si wo danka. Duninya-mɔgɛ bɛɛ si duwɛ sɔrɔn ile fɛ.”

^4-5 Woletɔ Burama wulita ka ta iko Mari ya a fɔ a ye nya min. Burama ye bɔla Hɛran soe burɔ tumɛ min, a sɔrɔn ara san bi-wɔrɔnfila ani san loli (75) le bɔ. Burama ya ala musi Sirayi bi anubɛ ala yɔɔnnu anubɛ anu bolo-fan damasi. A kɔrɔla dan Lɔti tara anu fɛ. Anu wulita ka ta Kenan nyamanɛ rɔ. Anu ke Kenan nyamanɛ rɔ,

⁶ ale Burama ya nyɔ ratagama ha ka ta ke Morela kɔlɔma-kuru-latankanɛ do kɔrɔ min bi Sɛkɛm soe dafɛ. Kenan kɛnu bi nyamanɛ wo rɔ wo wati rɔ.

⁷ Mari bɔra gbɛ rɔ Burama ye, a ko, “N bi nyamanɛ min dila i sibolenu ma, wo le kɛ la.” Woletɔ Burama ya saraka-mintan-tinɛ sɔ Mari ye nyɔ.

⁸ Wo kɔma, a bɔra nyɔ ka ta Bɛtɛli soe tele-bɔɛ wara la kɔnkɛnu siya kan min. Anu ya anu daga makɛ Bɛtɛli soe anubɛ Eyai soe tɛma. A ya saraka-mintan-tinɛ do fanan sɔ Mari ye nyɔ. A ya baraka bira a ye ka a bato.

⁹ Burama tora tala a yarɔ ka yilan-yilan nyamanɛ wo rɔ dugu la wara la.

Burama Ta-Koe Iyipiti

¹⁰ A ma mɛ kɔnkɔ-fitinɛ burunta Kenan nyamanɛ wo kuma bɛff! Wo le ya a to, Burama wulita ka ta Iyipiti nyamanɛ rɔ alako a ni wati-kundu-ni kɛ nyɔ.

¹¹ A gbɛrɛnta Iyipiti nyamanɛ ma tumɛ min, a ya a fɔ ala musi Sirayi ye ko, “N ya a lɔn ko musu-kinyanɛ le ile la, ado i mafɛlɛn di.

¹² Iyipiti kɛnu ba i yen tumɛ min, anu si a fɔ ko nna musi le ile la. Ila kinyɛ si a ma, anu ni i bi n bolo ka nde faga.

¹³ I ni a fɔ anu ye ko nde tirisan-musi le ile la. I ni a ma, n ni kisi i fɛ. I ni a ma, anu ni n tabira a kin na!”

¹⁴ Burama kera Iyipiti tumɛ min, Iyipiti mɔgɛnu ya musi wo yen nkɛkuna, anu yɛ bɔra a la.

¹⁵ Iyipiti mansɛla mɔgɔ-banu ya Sirayi yen tumɛ min, anu ya a matɔgɔ ale mansɛ ye. Anu ya Sirayi bi ka ta a la mansɛ wara.

¹⁶ A ya Burama rabira a kin na Sirayila ko la. Ale mansɛ ya yɔɔnnu di Burama ma anubɛ sagɛnu anubɛ ninkinu anubɛ sofɛlɛnu anubɛ nyomɛnu.

¹⁷ Kɔnɔ Mari ya kiraya-fitina-wɛ layigi ale mansɛ anubɛ ala denbayɛ kuma Buramala musi Sirayila ko la.

¹⁸ Woletɔ mansɛ wo ya Burama kele ka a manyinika ko, “I wara nfen ma n na kɛ la? Nfenna i ma a fɔ n ye nun ko ila musi le?

¹⁹ Nfenna i ya a fɔ n ye ko i tirisan-musi le ha nde ara a bi ka a ladon nna bɔn la? Nba, i ma ila musi yen? A bi. I ni ta a la i warɛ nyamanɛ rɔ.”

²⁰ Mansɛla mɔgɛnu ya ale anubɛ ala musi anubɛ a bolo-fan bɛɛsi labɔ anuna nyamanɛ rɔ iko ale mansɛ ya a fɔ nya min nun.