Ko-Dabirɛnu 10 - ALLALA KUMƐ

Nowa Bɔnsɔnnu Bara-Koe

¹ Yita-kasarɛ kɔma, Nowala den-keinu Sɛma wo, Hama wo, anubɛ Yefɛti, wonu ya den-keinu sɔrɔn.

Yefɛti anubɛ A Kegeyɛnu Bara-Koe

² Yefɛti ya den-kei mɔgɔ wɔrɔnfila sɔrɔn, Kɔmari wo, Megogi wo, Madayi wo, Yefan wo, Tubali wo, Misɛki wo, anubɛ Tarasi.

³ Yefɛtila den Kɔmari wo ya den-kei mɔgɔ sawa sɔrɔn, Asikɛnasi wo, Rifati wo, anubɛ Togarama.

⁴ Yefɛtila den Yefan wo ya den-kei mɔgɔ nani sɔrɔn, Ilisa wo, Tasisi wo, Kitin wo, anubɛ Rodanim.

⁵ Yefan wo bɔnsɔnnu denu denu siginɛ Mɛdetereniyan kɔgɔ-yi dafɛ wara la anubɛ a yi-tɛma-duginu tɔ. Anu bɛɛsi siginɛ anuta nyamanɛnu tɔ. Bɛɛ ye ata kan fɔla.

Hama anubɛ A Kegeyɛnu Bara-Koe

⁶ Nowala den Hama ya den-kei mɔgɔ nani sɔrɔn, Kusi wo, Misiram min tɔgɛ fanan Iyipiti wo, Put min tɔgɛ fanan Libiya wo, anubɛ Kenan.

⁷ Hamala den Kusi wo ya den mɔgɔ loli sɔrɔn, Siba wo, Hafila wo, Sabata wo, Reyama wo, anubɛ Sabiteka. Kusila den Reyama wo ya den mɔgɔ fila sɔrɔn, Siba anubɛ Didan.

⁸ Hamala den Kusi wo kebila-mɔgɛ do le Nimirɔdi la. Ale le fɔlɔn mara kɛlɛ-kurugbɛ la duninya rɔ.

⁹ A mara donso-nyana la Mari baraka rɔ. Woletɔ mɔgɛnu si duwa donsenu ye ko, “Alamɛ i mara donso-nyana la iko Nimirɔdi.”

¹⁰ Ale Nimirɔdi ya so-karantan sawɛ datɛgɛ Babilɔn nyamanɛ rɔ, Babɛli wo, Ɛreki wo, anubɛ Akadi.

¹¹ A bɔra Babilɔn nyamanɛ rɔ ka ta so-kun nani datɛgɛ Asiriya nyamanɛ rɔ, Ninɛfa wo, Rihoboti-Ira wo, Kala wo,

¹² anubɛ Risin. Risin, so-karantan le min sɔnɛ Ninɛfa anubɛ Kala tɛma.

¹³ Hamala den Misiram min tɔgɛ fanan Iyipiti, wo ya den mɔgɔ wɔrɔnfila le sɔrɔn, Ludin wo, Anam wo, Lehabi wo, Nafitu wo,

¹⁴ Patirusi wo, Kasilu wo, anubɛ Kafitori. (Filisitinu benba le Misiramna den Kafitori la.)

¹⁵ Hamala den Kenan wo ya den mɔgɔ fila sɔrɔn, ala den-kei-sarɛ Sadon anubɛ Hɛti.

¹⁶ Kenanla den filɛ Sadon anubɛ Hɛti, wonu kegeyɛ le Yebusinu wo, Amoranu wo, Kagasanu wo,

¹⁷ Hefanu wo, Arakanu wo, Sananu wo,

¹⁸ Arifadinu wo, Sɛmaranu wo, anubɛ Hamatinu. Wo kɔma, Kenan kegeyɛnu tanyɛnsɛnta.

¹⁹ Kenannuna nyamanɛ-dan le Saidon soe la. Anuna nyamanɛ wo tara ha ka ta ke Kirari soe ma min bi Kesa soe dafɛ. Anuna nyamanɛ-dan wo le tara furr, ha ka ta ke soe kɛnu ma, Sɔdɔm wo, Kɔmɔra wo, Adima wo, Sebom wo, anubɛ Lesi soenu ma.

²⁰ Hama kegeyɛ siginɛ anuna nyamanɛnu tɔ iko anu bɔnsɔn anubɛ anu kannu bi nya min.

Sɛma anubɛ A Kegeyɛnu Bara-Koe

^21-22 Iburula mɔgɛnu benba le Sɛma la. Yefɛti kɔrɔ-kei Sɛma wo ya den mɔgɔ loli sɔrɔn, Ilam wo, Asuri wo, Arafakasada wo, Ludi wo, anubɛ Aram.

²³ Sɛmala den Aram wo ya den mɔgɔ nani sɔrɔn, Yusi wo, Hali wo, Keta wo, anubɛ Masɛki.

²⁴ Sɛmala den Arafakasada wo ya Sela sɔrɔn. Sela wo ya Iburu sɔrɔn.

²⁵ Iburu wo ya den mɔgɔ fila sɔrɔn. A fɔlɔtɛ tɔgɛ le Fara. A ya a tɔgɔ sa Fara kamasɔrɔn mɔgɛnu kan farata wo wati le tɔ. A fila nyɔgɛ tɔgɛ le Yokitan.

²⁶ Iburula den Yokitan wo ya den mɔgɔ tan-ni-sawa sɔrɔn, Alamodadi wo, Sɛlɛfi wo, Hasamafɛti wo, Yera wo,

²⁷ Hadoran wo, Yusali wo, Dikila wo,

²⁸ Obali wo, Abimayɛli wo, Siba wo,

²⁹ Ɔfiri wo, Hafila wo, anubɛ Yobabu. Yokitanla dan le kɛnu na.

³⁰ Anuna nyamanɛ min ya a fɔlɔ Mesa soe ma, wo le tara furr, ha ka ta ke Sifari soe ma kɔnkɔ siyamɛnu bi kan min tele-bɔɛ wara la.

³¹ Sɛma kegeyɛnu siginɛ anuna nyamanɛnu tɔ iko anu bɔnsɔn anubɛ anu kannu bi nya min.

³² Minnu sɔrɔnta yita-kasarɛ kɔma, wonu benba le Nowa la. Bɛɛ sigira ata nyamanɛnu tɔ iko bɛɛ benba nara nya min.