Keninteya-Siginu 8 - ALLALA KUMƐ

¹ Ni ile mara n tirisan-kemini-bɛrɛbɛrɛ le la nun, wo si diya n ye. Woletɔ ni n ya i labɛn soe burɔ ka i sunbu, n ti gboya mɔgɛ ye worɔ.

² N si ta i la n na warɛ-konko la min ya n sɔrɔn, alako i ni i bole don n kawɛ kɔrɔ. N si baan-yabasannɛ di i ma alako i ni sewa.

³ I maranma-bole si sa n kunyɛ kɔrɔ, i bolo-nyimɛ la si don n kawɛ kɔrɔ.

⁴ Wole n ta-nyɔgɛ Yerusalɛm musinu, wo ni wo gboro ni wo si ma kɔndɔfili mala keninteyɛ rɔ.

Sigi Wɔrɔ Nyɔgɛ Musi doinuta sigi-sa-kumɛ

⁵ Yonnu bi nala wo la ka bɔ wulɛ rɔ musi gbɔnkunnɛ a rɔ? N ya a ma, n sɔgɛ ya i bira kɔn-gbɔ-kuri kɔrɔ, i na ya a nyɛrɛ-masɔrɔn i la kan min nun.

Sunkurɔnta sigi-sa-kumɛ

⁶ Mɔgɔ-wo-mɔgɔ kana diya i ye nde kɔma. I kana i bole don musu-wo-musu kawɛ kɔrɔ nde kɔma. Fen de keninteyɛ la min makawara iko sayɛ. Keliyɛ fanan gbɛlɛ iko sayɛ. Keliyɛ mani de iko ta-mɛlɛn-nɛ wa a labɔ woron-gbalɛ ma.

⁷ Yi ti ke wo ladufenna. Hali yi kerita a kun na, a ti ke a ladufenna muk! Ni mɔgɔ-wo-mɔgɔ ya a fɔ ko a si keninteyɛ san wodi-ba la, kun-takolonyɛ le wo la dɔrɔn!

Sunkurɔn wo kɔrɔ keminɛnuta sigi-sa-kumɛ

⁸ Ma dɔgɔ-musi ye nyɔ. A kin ma bɔ wɛ. Ni kemini-mɛsɛ do nara a mabira tinɛ, ma si nfen ma ma dɔgɛ ye?

⁹ Ni a taranta, a mara tarɛ la keinu ye, ma si wodi-gbɛ bi ka nyamanɛ-kumafɛlɛn-bɛndɛ-layan-bɛ do sɔ a kuma. Kɔnɔ ni a mara iko bɔn-don-dɛ, ma si fɛrɛn-hakikɛnu ma a da-latogɔn la.

Sunkurɔnta sigi-sa-kumɛ

¹⁰ Nde mani de iko tarɛ. Nta nyamani-kumafɛlɛn-bɛndɛ le n kinyɛ la. Woletɔ n keninte nyɛrɛ ya a lɔn ko n sewani de a la.

Keminɛta sigi-sa-kumɛ

¹¹ Ki-fen-nakɔɛ ye Silamɛni bolo kan tinɛ do rɔ min tɔgɛ Beyali-Hamɔn. Mɔgɛnu bi a sarala ka nyɔ sinka a wɔli-koe rɔ. Bɛɛ ye wodi-gbɛ-gbu waga kelen bɔla ka a sara wo la.

¹² Silamɛni ni sewa ala wodi-gbɛ-gbu waga kelen-kelan wonuna ko la. Minnu bi nakɔɛ wo makandanna, wonu ni sewa anuna wodi-gbɛ-gbu kɛmɛ fila filɛ la. Kɔnɔ nde halala-nakɔɛ ye n bolo.

¹³ N keninte, n ni i kuman-kan lamɔɛn nakɔɛ burɔ. N ta-nyɔgɛnu bi i kuman-kan lamɔɛn-koe rɔ.

Sunkurɔnta sigi-sa-kumɛ

¹⁴ N diyana-mɔgɛ, na n magbenna iko mina. I ni na fen-suma-diyama-kɔnkɛnu tɔ.