Keninteya-Siginu 7 - ALLALA KUMƐ

Keminɛta sigi-sa-kumɛ

¹ Ile mansɛla sunkurunnɛ, i kian bɛnta sanbarɛ rɔ. I kuru-gbole manunkunɛ pinapina iko boloma-wɔli-kɛlɛ le ya i ladan.

² I barɛ latintannɛ iko kalamɛ min gbara sa a la. Alamɛ gbɛɛ-diyamɛ kana ban a rɔ. I tɛmɛ lalenkannɛ iko tɔnsɔn-kiri min bi baga-ferenu tɛma.

³ I kinyɛ monɛ susu iko minan-den fɛrɛn filɛ.

⁴ I kan manɛ iko san-bon-nayan-bɛ min tabɛnnɛ sogo-ba-nyin la. I ya-dan kin iko yi min madɛnnɛ a rɔ Bata-rabim don-dɛ dafɛ min bi Hɛsibɔn soe burɔ. I sun-kalɛ bɔnɛ buran, iko Lɛbanan kɔnkɛ min bi Damasika soe telen tɔ.

⁵ I kunyɛ ye san ma sodo, iko Kamɛli kɔnkɛ. I kun-sigi ye malan-malanna iko kura-namanɛ. I kun-sigi si mansɛ-buyi rabasan.

⁶ I yɛrɛbɛ-yɛrɛbɛ, ado i kin dɔgɔma-ma-de! Ila kinyɛ ara n hɛnɛ tɛban!

⁷ I matelennɛ yɔliyɔli, iko tin-kuri. I kin-sungban lasulennɛ iko tin-kole.

⁸ N bi nala yɛlɛla wo le ma ka do bɔ a rɔ. I kinyɛ yiginɛ a rɔ iko nɔnbɔ-gbɔ-tɔnsɔn. I dɛ-sumɛ diyanɛ iko yabibi-mɔɛ.

⁹ I dɛ-burɛ tuninyanɛ iko baan-kura-yi. Nba, ni tonyɛ le wo la, alamɛ baan-kura-yi wo kerita n diyana-mɔgɛ kun na iko yi. A ni tenbi a da-gbolo filɛ tɛma ka ke a nyinnu ma.

Sunkurɔnta sigi-sa-kumɛ

¹⁰ Nde ladaganɛ n keninte dɔrɔn de ye. A yili sa mɔgɔ-wo-mɔgɔ ma fɔ nde.

¹¹ N keninte, na ma ni ta ma matagamana gbɛkole ma tala. Ma ni ki ma rɔ so-nɛ do rɔ.

¹² Ma ni ma lasɔ subaga. Ma ni ta ki-fannu mafɛlɛn. Tumado, anu bara anu matii. Tumado, anu bara fere kɔrɛ. N si nta keninteyɛ yira i la nyɔ rɔ.

¹³ Mandirɛki fere-sumɛ ra ara tii nyɔ kɔrɛ pu! N bara kɔn-gbɔ-bɛrɛbɛrɛnu nadɛn i ye. I duruta minnu dɔnna wo, i ma minnu su dɔn bɛ wo, n bara wo bɛɛ lamara i ye.