Keninteya-Siginu 6 - ALLALA KUMƐ

Musi doinuta sigi-sa-kumɛ

¹ Ile min kin musi bɛɛ ko, i keninte tara mintɔ? Ni a ya a kun telen kan tinɛ min bara la, nyɔ yira ma la alako ma ni i dɛnbɛ a nyinina.

Sunkurɔnta sigi-sa-kumɛ

² N keninte ye ala nakɔɛ rɔ kɔlɔma-suma-diyamɛnu bi kan min. A ye ala nakɔɛ wo diya bɔla ka baga-ferenu madɛn.

³ Atɛ le nde la. Nde fanantɛ le ale la. A ye ala baga-ferenu diya bɔla.

Sigi Loli Nyɔgɛ Keminɛta sigi-sa-kumɛ

⁴ N takeri-gbasu, i kin iko Tirisa soe. I tintannɛ iko Yerusalɛm soe. Ni mɔgɛ ya i yen, a ya si bɔ i la iko kɛlɛ-dannu nadɛnnɛ tenbi anuna falafalɛnu kɔrɔ.

⁵ I yɛ bɔ n na bawo i miran ara n bira. I kun-sigi mɔlɔlɛ iko baa minnu yigimatoe ye bɔla Kaliyadi kɔnkɛnu tɔ.

⁶ I nyin gbɛnɛ wass iko sagɛ gbɛnɛ ku-san tenbi. A rakɛnyanɛ i dɛ rɔ bɛrɛtɛ! Kelen-bɛrɛn bɔni sa a la.

⁷ I gban manunkunɛ iko wura-tɛran-burɛ i yakɔrɔ-masansan-kurɛ kɔma.

⁸ Ni a taranta musu bi-wɔrɔ ye n bolo anubɛ fɛ-sigi-musu bi-segin, hali sunkurun-mɛsɛ-siyaman bi n bolo n ma min dan lɔn

⁹ kɔnɔ wo damasi rɔ, i kelen pe le di n sɔn-kole ye. Nna kura-kangbɔɛ, fɛɛ-wo-fɛɛ sa i la. I kelen pe le keninɛ i na bolo ka tenbi i na-kelen-nyɔgɛ bɛɛ la. Sunkurun-mɛsɛnu bi i mafɛlɛnna ka i matɔgɔ. Hali mansɛla musinu anubɛ a fɛ-sigi-musinu bi i matɔgɔ-siginu sala.

¹⁰ Yon sɔnɛ kɛ la iko sun-tele-tiyi? Ila kinyɛ makawanɛ iko tele anubɛ karɛ anubɛ lole minnu sɔnɛ anu sansan-yili ma.

¹¹ N bara ta ile, nna nakɔɛ rɔ nna ki-fannu bi kan min. N ni i mafɛlɛn tumado, i fɛran donu bi i kɔrɔ tumado, i wara yanba-kurɛnu nabɔ tumado, i wara fere kɔrɛ.

¹² Yanni n ni hɛnkili sɔrɔn n nyɛrɛ wara-koe ma, a diyɛ ye donna n tɔ iko n siginɛ nna kirindi le tɔ.

Musi doinuta sigi-sa-kumɛ

¹³ E, Silamɛnina musi, sɛgi ma wara. I ni sɛgi ma ma alako ma ni to i mafɛlɛnna. Nfenna wo yɛ gbalanɛ nde, Silamɛnina musi la? A sɔgɛ ye wo la, n ni n dɔn wo ye?