Keninteya-Siginu 5 - ALLALA KUMƐ

Keminɛta sigi-sa-kumɛ

¹ N bara na nna nakɔɛ rɔ gbɛ! Fen-suma-diyamɛ minnu bi a rɔ, n bi wonu madɛnna. N bi nna liyi anubɛ a fafɛ dɔn tinɛ le gbɛ! N bi nna gbɛɛ anubɛ nna nono-minyɛ le kun na gbɛ! Wole keninte-ma-filɛ, wo ni wo yanban ka wo min ha diyanayɛ ni sɔ wo yɛ la.

Musi doinuta sigi-sa-kumɛ Sigi Nani Nyɔgɛ Sunkurɔnta sigi-sa-kumɛ

² Hali n bi kinɔgɛ le tɔ, a mani de iko n bi n ya la le. N si kiyo sa ko nna kei ye dɛ matugula n ma. A ye a fɔla ko, “N takeri-gbasu, dɛ laka. Nna purulen-mɛsɛ, n ni don. Surɔ-duri ara n kunyɛ kimɛ.”

³ N bara ban n makolonyala. N si n nasɔ kama tun gbɛ ka dɛ laka i ye? N bara ban n kian makula. A sɔgɛ ye i la, n ni wonu manɔgɔ tun, ba?

⁴ A ya a bole sa bonda-dɛ ma. A ye wo kun na, n yisi ye a mala muyɛɛ!

⁵ N ya n nasɔ dɛ laka tinɛ nna kei ye. Tulu-suma-diyamɛ min bi n ma, n bole-bilɛ kankan rɔ, a sumɛ tora wo ma.

⁶ Dɛla kɛ nna kei ye, n ma a yen. Yaga, a ara ta. A kuman-kan lamɔɛn-sɔgɛ ye n na. N ya n yɛ lakalan a ma kɔnɔ n ma a yen. N ya a rakele kɔnɔ a ma a labira.

⁷ Nna kiyo kelan kɛ rɔ, so-makandannɛnu ya n taran. Anu ya n tagbesi ka n magboro-gboro. Tara-makandannɛnu ya nna kurɛ rafara n ma.

⁸ Wole Yerusalɛm musinu, wo ni lanyiri kiri n ye ni wo ya n keninte yen, ni wo ti a fɔ a ye ko ala keninteyɛ min bi n tɔ, wo ara n ma kuluba!

Musi doinuta sigi-sa-kumɛ

⁹ Ile min kin ma dama ko, ila kei tenbira kei bɛɛ la, wa? Ila kei tenbira kei doinu na kama min bi a tola, ma ye lanyiri kɛ kirila i ye?

Sunkurɔnta sigi-sa-kumɛ

¹⁰ Nna kei mafɛlɛn di kinyɛ bolo, ado a kolo gbɛlɛ. Hali i wa kei mɔgɔ waga tan nabɔ, ale nyɔgɔn sa wonu tɔ.

¹¹ A yakɔrɛ ye malan-malanna. A kun-sigi kin. A lafinnɛ mɔlɔlɔ!

¹² A yɛ manɛ iko kangbɔɛ minnu bi yi-nɛ fɛ. A yɛ manɛ iko kura-kangbɔ filɛ minnu kunɛ nonɛ rɔ.

¹³ A gban kin iko nakɔɛ min nafanɛ fen-suma-diyama-su bɛɛ la. A da-gbole layawanɛ iko baga-fere. A da-gbole makimanɛ fen-suma-diyamɛ la. A bolo-kalɛ manɛ iko sɛnɛ-kɔlɔma.

¹⁴ Kuru-da-gbɛlɛnu bi ala dɛɛn-kɔlɔnɛ minnu tɔ wonu denu donnɛ a bole la. A fɛrɛ-bɔnkɛ kin iko sogo-ba-nyin, kuru-wulan tenbi wo tɛma.

¹⁵ A worenu tagbɛlɛ iko kuri-sɛnbɛrɛn-kɔn minnu sɔnɛ sɛnɛ-bɛrɛ kuma. A mansa-kɛ-bɔɛ kɛnɛ burun iko bandan!

¹⁶ A da-gbole-masusun di. A wara-koe ara sɔ n yɛ la. Wole Yerusalɛm musinu, nna kei ye ka le.