Keninteya-Siginu 2 - ALLALA KUMƐ

¹ N mani de dɔrɔn iko baga-fere minnu bi Sarɔn lɛɛ rɔ, anubɛ baga-fere minnu bi lɛɛ rɔ kɔnkɛnu tɛma duk!

Keminɛta sigi-sa-kumɛ

² Ade, i mani de musu-gbɛrɛkɛnu tɛma iko baga-fere tenbi wɔnɛnu tɛma.

Sunkurɔnta sigi-sa-kumɛ

³ Ile mani de kemini-mɛsɛnu tɛma n yala iko kura-kɔn min bi gbɔngbɔn rɔ. I ninɛ-lasigi di. I gbɔɛ fanan dɔn di i kɔrɔ.

⁴ I ye n kelela ladiya-wɛnu tɔ alako bɛɛ ni a lɔn n di i ye nya min.

⁵ I ni n tagbɛlɛya kɔn-gbɔɛ anubɛ kɔn-gbɔ-gbalanɛnu na bawo ila diyanayɛ ara n fɛrɛ rafaga n ma kuluba!

⁶ I maranma-bole sanɛ n kunyɛ kɔrɔ. I bolo-nyimɛ ladonnɛ n kawɛ kɔrɔ.

⁷ Wole, n ta-nyɔgɔ Yerusalɛm musinu, wo ni wo gboro mina anubɛ woyan rɔ, ni wo si ma kɔndɔfili mala keninteyɛ rɔ.

Sigi Fila Nyɔgɛ Sunkurɔnta sigi-sa-kumɛ

⁸ N bara nna kemini-kan lamɔɛn nala. I ma n diyana-mɔgɛ yen nala gbanna kɔnkɛnu kuma? A ye nala n telen tɔ sekeke!

⁹ A ye a burila iko sɛnsɛ-bulan. A sɔnɛ yasɛ kɔma ka a yɛ masa n ma woe la.

¹⁰ N diyana-mɔgɛ ye n kelela. N diyana-musi, ile min kin kati! Na, ma ni ta!

Keminɛta sigi-sa-kumɛ

¹¹ Samɛ ara ban, ado banda sa nala tun.

¹² I tenbi kan-bo-kan, i si baga-fere yen. Sigi-sa-wati le kɛ la. I ye serekokonu-kan namɔɛnna kan-bo-kan.

¹³ Toro-kurinu bara fɔlɔla gbɔla. Kɔn-fere-sumɛ ara tii nyamanɛ kun na pu! Woletɔ n kɔntɔ-mɔgɛ, ma ta. Ile min kin, ma ni ta ma nyɔgɔn fɛ.

¹⁴ I manɛ iko wondere minnu dogonnɛ fara-woenu tɔ kɔnkɛ kuma. N ni i yakɔrɔ-nyimɛ yen. N ni ila kuma-tuninyanɛnu namɔɛn.

¹⁵ Bɛnsɛnkɔninya fenfen kana don ma tɛma iko sogo-mɛsɛ anubɛ ki-fan-tɛmɛ ye nya min. A kana don ma tɛma ma fere-labɔ-wati kɛ la.

Sunkurɔnta sigi-sa-kumɛ

¹⁶ Ntɛ le ile, nna keminɛ la. Atɛ le nde fanan na. I ye nna baga-ferenu-diyɛ bɔla.

¹⁷ To n fɛ ha sɔgɔma-fɔnyɔ-wati banda-ka-dɛ ma. I ni ma n ye iko minan-bulan tenbi tolonna kɔnkɛnu tɛma.