Keninteya-Siginu 1 - ALLALA KUMƐ

¹ Nde Mansa Silamɛni ya sigi-diyamɛ kɛnu sa.

Sigi Fɔlɔtɛ Sunkurɔnta sigi-sa-kumɛ

² I ni to n sunbula ha bawo ila diyanayɛ tenbira n ye liyi la pirr!

³ I sumɛ di n ye, n ba i tɔgɛ lamɔɛn fɔ i sumɛ si don n tɔ. Musi min ba i yen, wo kole si bɔ a rɔ muluka!

⁴ N bi! Ma ni ta ma kun fɛ pon! I ni ma nna mansɛ la ka ta n na i bolo konko la. Ma si ma nyɔgɔn-diya bɔ. Ma ni tunu keninteyɛ rɔ pɔɛ! Ni i diyara musi bɛɛ ye, i kana tɛrɛna wo la.

⁵ N ta-nyɔgɛ Yerusalɛm musinu, hali n fɛrɛ ara yɛlɛma ka fin n ma kɔnɔ n kin. N finnɛ iko Kɛdarila fani-bɔnnu. N kin iko yorolan minnu bi Silamɛnita bolɔn la.

⁶ I yɛ kana tɛgɛ n tɔ bawo n bara fin. Tele le wara n fɛrɛ fin n ma. N kɔrɔ-keinu denu diminyara n ma ka n ma anuna sɛni-tawɔlilɛ la. N ma n nyɛrɛ fɛ-bira-kunya sɔrɔn.

⁷ N keninte, ni wobɛ ila sagɛnu bi tala kan min bara la bi, wo fɔ n ye. Tele wa kunaya, ila sagɛnu bi anu sala ninɛ la mintɔ wara la? I ta-tina-gbengban yira n na alako n kana to tenbi-tenbila saga-kandannɛ doinu tɛma iko yɛlɛn.

Keminɛta sigi-sa-kumɛ

⁸ Ile min kin musi bɛɛ ko, ni i ma kan tinɛ wo lɔn, bila sagɛnu kin-gbɛ fɛ dɔrɔn. I ni ila baa-dannu de-nyini saga-kandannɛnuna fani-bɔnnu dafɛ.

⁹ N kɔntɔ-mɔgɛ, ile si a ma, keinu yisi kɔrɔ ni tugu iko so-musi si Iyipiti mansɛla so-keinu nabandan nya min minnu bi ala kirindinu saganna.

¹⁰ Ila tolola-fannu bara a ma, i yakɔrɛ ara kinya. Ila kan-na-fan ara a ma, i mafɛlɛn bara diya.

¹¹ Fɔ ma wa sɛnɛ-tolola-fannu nadan i ye minnu sanɛ wodi-gbɛ tɛma.

Sunkurɔnta sigi-sa-kumɛ

¹² Ile nna mansɛ tenbi sani i warɛ bɔn la, n bi i mamunna tuli min na, wo suma-diyamɛ si ila bolɔn bira-a-la.

¹³ N kɔntɔ-mɔgɛ, i manɛ n ye iko fen-suma-diyama-bɔrɛ i tenbi sani n kinyɛnu tɛma.

¹⁴ N keninte, i manɛ n ye iko baga-fere minnu bi Ɛngidi nɔnbɔ-gbɔ-sɛnɛ rɔ.

Keminɛta sigi-sa-kumɛ

¹⁵ E, n kɔntɔ-musi, i kin. I kin dɔgɔma-ma-de! I yɛ kɛlɛlɛ iko kura-kangbɔɛtɛ.

Sunkurɔnta sigi-sa-kumɛ

¹⁶ N bɔ, i fanan kin. Ila kinyɛ ara n kɔntɔ diya kati! Ma tenbi sani bin-kurɛ kuma

¹⁷ ma ye kɔlɔma-yanbalama-bɛnu ninɛ la.