Kɛlɛ-Kurugbɛnu 9 - ALLALA KUMƐAbimɛlɛki Wara-Koe 1 Kidiyɔnla den Abimɛlɛki tara a na warɛ Sɛkɛm soe burɔ a berennu bi kan min. A ya a fɔ a berennu ye ko, 2 “Wo ni Sɛkɛm so-burɔ-mɔgɛnu manyinika ko Kidiyɔnla den mɔgɔ bi-wɔrɔnfilɛ wonuta mansayɛ wo, mɔgɔ kelanta mansayɛ wo, anu ni anuta bi wo rɔ. Kɔnɔ min sanɛ wo kuma, anu ni a lɔn ko anuna den-bɛrɛbɛrɛ le nde, Abimɛlɛki la.” 3 A ban wo fɔla, a berennu tara Sɛkɛm so-burɔ-mɔgɛnu nadɛn ka anu dantɛgɛ. Sɛkɛm kɛnu sɔnta Abimɛlɛkita mansayɛ ma bawo anu berennɛ le. 4 Anu tara anuna bɛsi-bɔn la anuta bɛsɛ min tɔgɛ “sarama-kan kirinɛ Beyali min ye” wo ye kan min. Anu ya wodi-gbɛ-gbu bi-wɔrɔnfila bi nyɔ ka ta karagbɛlɛnu masan. 5 Kidiyɔnla dan Abimɛlɛki ya a fa-kelen-dan wonu bi ka ta anu na anu fa warɛ Ɔfara soe burɔ. A ya a na-kelen-nyɔgɛ mɔgɔ bi-wɔrɔnfila bira anu faga-koe la farɛ do kuma nyɔ. Kɛ bɛɛ rɔ fɔ mɔgɔ kelen, wo le kunyɛ bɔra a rɔ. Anu dɔgɛ laban Yɔtam, wo le ya a buri a kɔrɔ ka a dogon. 6 Sɛkɛm mɔgɛnu anubɛ Bɛti-Melo sorɔ-mɔgɛnu ya anu nadɛn kan-tina-kelen Sɛkɛm soe burɔ anuna kɔlɔma-kuru-latankanɛ kɔrɔ. Anu ya Abimɛlɛki ma mansɛ la nyɔ. Tili Tɛgɛ-Koe Sɛkɛm Kɛnu ma Yɔtam Bolo 7 Abimɛlɛki dɔgɛ Yɔtam min ya a buri a kɔrɔ nun, wo ya wo kumɛ lamɔɛn min kɛ, a yɛlɛta Kɛrisim kɔnkɛ kuma. A nyɛɛra Sɛkɛm mɔgɛnu ma a kulu-mayɛlɛnɛ la, a ko, “Wole Sɛkɛm mɔgɛnu, wo ni wo tole masɔ n na woletɔ Alla si a wɔlɔ matɔlɔ wo la. 8 Lunyɛ do, kɔlɔmanu ya anu nadɛn ka mansayɛ sigi. Anu ya a fɔ Ɔlifi-kɔlɔma ye ko, ‘Ile ni ma mala mansɛ la.’ 9 “Ɔlifi-kɔlɔma ma sɔn, a ko, ‘Bawo ni n mara wola mansɛ la, n ti n tuli labɔ mɔgɛnu ye, ado mɔgɛnu anubɛ Alla makoe ye tuli wo la.’ 10 “Wo kɔma, kɔlɔma wonu bɔra nyɔ. Anu tara toro-kuri wara. Anu ko, ‘Ile ni ma mala mansɛ la.’ 11 “Toro-kuri ma sɔn, a ko, ‘Bawo ni n mara mansɛ la, n ti n gbɔ-hakika-diyamɛ di wo ma.’ 12 “Wo kɔma, kɔlɔma wonu bɔra nyɔ. Anu tara nɔnbɔ-gbɔ-kuri wara. Anu ya a fɔ wo fanan ye ko, ‘Ile ni ma mala mansɛ la.’ 13 “Nɔnbɔ-kuri ma sɔn, a ko, ‘Bawo ni n mara mansɛ la, n ti n yi-diyamɛ di wo ma min si Alla anubɛ mɔgɛnu munanfaga.’ 14 “Kɔlɔma wonu bɔra nyɔ tun. Anu tara wɔnɔ-kuri fanan bara. Anu ya a fɔ wo fanan ye ko, ‘Ma ara na ile fanan bara ka i ma mala mansɛ la.’ 15 “Wɔnɔ-kuri wo ko, ‘Ni a sɔgɛ ye wo la, n ni ma wola mansɛ la, wo na wo sa n ninɛ la. Ni wo ma wo ma, tɛ si bɔ n bolɔnnu na ka Lɛbanan Sida-kɔlɔma-kuru-wɛnu mintan!’ ” 16-17 Nba, Yɔtam ya a fɔ tun ko, “Nfen ya a to, wo ya Abimɛlɛki ma mansɛ la, wo miri sa min ma? Wo ni wo miri ala fisiriwɔlitayɛ kɛ ma a ya min sigi n fa Kidiyɔnla dannu na. Wo ma wo miri Kidiyɔnla wɔli-nyimɛnu ma a ya minnu kɛ wo ye. N fa ya kɛlɛ kɛ wo ye ka a niyi fili wola ko la Midiyan kɛnu kɛlɛ-kɛ-tinɛ. Kɔnɔ hali wo, wo ma wo miri ala wɔli-nyimɛ wonu ma. 18 Wo sɛgira n fa wo lela dannu kɛlɛla tun ka anu faga. Wo ya n kɔrɔ mɔgɔ bi-wɔrɔ ani mɔgɔ kɔnɔntɔ (69) faga fara kelen kuma. Fɔ nde kelan min tora. Wo sɛgira na-kelen-nyɔgɔnyɛ diyala ma kuma ka n fala yɔɔn-musila den Abimɛlɛki ma mansɛ la. 19 Ni wo lara a la ko wobɛ wola mansa-siginɛ kɛ ya ko-nyimɛ le ma Kidiyɔnla dannu na, alamɛ wobɛ wola mansɛ Abimɛlɛki yisi kimara. 20 Kɔnɔ ni wo lara a la ko wo ma ko-nyima ma anu na, alamɛ tɛ bɔra Abimɛlɛki bolo ka Sɛkɛm anubɛ Bɛti-Melo so-burɔ-mɔgɛnu mintan gburr! Alamɛ tɛ bɔra sorɔ-mɔgɛ wonu bolo ka Abimɛlɛki fanan mintan gburr!” 21 Yɔtam ban kɛ fɔla, a ya a buri Abimɛlɛki kɔrɔ kilan bolo ka ta a sigi Biri soe burɔ. Mɔgɛnu Murutiya-Koe Keyali Bolo 22 San sawa, Abimɛlɛki ye mansayɛ la Isirɛla mɔgɛnu kun na. 23-24 Wo kɔma, Alla ya gboyanayɛ ladon Sɛkɛm mɔgɛnu anubɛ anuna mansɛ Abimɛlɛki tɛma bawo anu ya a na-kelen-nyɔgɛnu faga. Murutiyɛ wo mara a tayili-sarɛ la Alla bolo. 25 Sɛkɛm mɔgɛnu ya mɔgɛnu sigi kilɛnu na kɔnkɛnu kuma. Wonu kɛnɛna buila mɔgɛnu ma alako anu ni ale mansɛ lamiliya. Anu nara wo fɔ ale mansɛ ye. 26 Ibɛdila den-kei Keyali anubɛ a na-kelen-nyɔgɛnu yirindira Sɛkɛm soe burɔ. Sɛkɛm so-burɔ-mɔgɛnu wulita lala Keyali la. 27 Anu tara anuna nɔnbɔ-gbɔ-sɛnɛnu tɔ ka nɔnbɔ-gbɔɛnu keri ka anu burun. Anu bi ladiyɛ kɛla ka fen dɔn anubɛ ka nɔnbɔ-gbɔ-yi min anuna bɛsi-kɔ-tinɛnu tɔ, anu bi Abimɛlɛki tɔgɛ tinyana a kɔma. 28 Keyali ya a fɔ nyama wo tɛma ko, “Nfen bi Abimɛlɛki la min bi a tola male Sɛkɛm mɔgɛnu bi kilanna a la? Kidiyɔnla dan ma ale la, wa? Yanni ma ni to Abimɛlɛki kɛ anubɛ ala kandɛ Sebuli kɔrɔ, a fisa worɔ, ma ni to Sɛkɛm fa Hemori kebila-mɔgɛ do kɔrɔ. 29 Ni nde le mansayɛ la wo kun na nun, n si Abimɛlɛki wara-koe ban dugi kɛ kuma. N si a fɔ a ye nun ko anubɛ ala kɛlɛ-dannu ni na nde, Keyali kɛlɛ.” 30 Abimɛlɛkila kandɛ min tɔgɛ Sebuli, wo ya kɛ lamɔɛn tumɛ min, a yisi magboyara. 31 A ya a sara Mansa Abimɛlɛki wara Aruma soe burɔ ka a fɔ a ye ko, “Ibɛdila dan Keyali anubɛ a na-kelen-nyɔgɛnu bara na Sɛkɛm. Anu bara na i kan ma ka mɔgɛnu tasugurun i ma. 32 Mansɛ, i si min ma, wobɛ ila kɛlɛ-dannu ni na yan bi-suyi-kɛ rɔ ka wo dogon binyɛ rɔ soe kɔma. 33 Banda-ka-dɛ ma, wo ni soe latɛrɛna kɛlɛ la. Keyali anubɛ a gba-fɛ-bilalɛnu ba wuli wo kan ma, ni ko-wo-ko diyara wo ye, wo ni wo ma anu na.” 34 Abimɛlɛki anubɛ ala kɛlɛ-dannu nara suyi rɔ ka anu tafara sigi tina nani na. Anu ya anu dogon soe kɔma. 35 Bandɛ kara tumɛ min, Keyali min bi mansɛ tɔgɔ tinyana nun, wo bɔra soe burɔ ka a sɔ soe tarɛ-don-dɛ la. Anu ya Keyali yen sɔni nyɔ tumɛ min, anu bɔra gbɔfɛnu kɔrɔ. 36 Keyali ya anu yen tumɛ min, a ya a fɔ mansɛla kandɛ Sebuli ye ko, “I yɛ lata kei donu ma yigila kɔnkɛ wo la.” Kɔnɔ Sebuli ko, “Mɔgɔ ma wonu na. Ninɛnu denu bi kɔnkɛ ma wo la.” 37 Keyali ya a fɔ tun ko, “I yɛ lata. Donu bi yigila nala ma magbenna kɔnkɛ la. Donu fanan bi nala ka bɔ bolo-tafɛlɛnnɛnuna kɔlɔma-kuru wara la.” 38 Sebuli ya a fɔ a ye ko, “Wobɛ ila kuma-wa-fɔɛ! I ye a la i bolo. I taranta min tasɛla yan, nba, wo le ara na kɛ la. Nba, ta a kɛlɛ le gbɛ!” 39 Keyali ya ala mɔgɛnu nabɔ alako anu ni Abimɛlɛki kɛlɛ 40 kɔnɔ ale Keyali ya a buri. Abimɛlɛki ya a sagaran. Mɔgɔ siyaman tanbanta nyɔ, hali minnu bi soe wo tarɛ-don-dɛ la. 41 Abimɛlɛki ma a lasɔrɔn. A ya a bɔ a fɛ. A tara a sigi Aruma soe burɔ. Sebuli ya Keyali anubɛ a na-kelen-nyɔgɛnu gben Sɛkɛm soe wo burɔ feufeu! 42 Wo wulun sɔgɔma, Abimɛlɛki ya a lamɔɛn ko Sɛkɛm mɔgɛnu bi tala anuna sɛnɛnu tɔ. 43 A ya ala kɛlɛ-dannu tafara sigi tina sawa la. Wonu tara anu sigi Sɛkɛm kɛnuna sɛnita-kilɛnu na ka anu makɔnɔ nyɔ. Anu ya mɔgɛnu yen nala tumɛ min ka bɔ soe, 44 Abimɛlɛki anubɛ ata mɔgɔ-kurun-burimatoe tara kilɛ tɛgɛ anu kɔma kilɛ la soe tarɛ-don-dɛ la. Kɛlɛ-den-kurun filɛ minnu tora, wonu kɛra Sɛkɛm mɔgɛnu ma kilɛ tɛma nyɔ. 45 Anu telenta kɛlɛla gbɛn! Anu ya mɔgɛ bɛɛ faga ka anuna soe tinya. Wo kɔma, anu ya kɔgɛ fui nyɔ-dugi rɔ. 46 Bɛti-Melo so-burɔ-mɔgɛnu ya Sɛkɛm halaki-ko-mankan lamɔɛn min kɛ, anu tara anu dogon anuna kisi tinɛ do rɔ min tugunnɛ anuna bɛsi Beyali wo kɔ tinɛ, anu ya sarama-kan kiri min ye, kɔni. 47 Abimɛlɛki fanan ya a lamɔɛn ko anu bara ta anu dogon nyɔ. 48 Anubɛ ala kɛlɛ-dannu yɛlɛta Sɔlɔmɔn kɔnkɛ kuma. Abimɛlɛki ya tɛgɛran bi ka kɔlɔma-bolɔn donu tɛgɛ ka wonu duni. A ya a fɔ ala kɛlɛ-dannu ye ko, “Wole fanan ni kɔlɔma-bolɔn donu tɛgɛ tiriya!” 49 Wonu fanan ya a ma iko a ya a fɔ anu ye nya min. Anu bilara a fɛ. Anu ya sɔgɛ wonu nadɛn bɛsi-bɔn wola foolɛ rɔ. Anu ya tɛ tugu sɔgɛ wo la. Tɛ wo ya nyɔ mintan. Mɔgɛ min tora tɛ wo rɔ, a si mɔgɔ waga kelen nyɔgɔn bɔ le, kei wo, musu wo. 50 Wo kɔma, Abimɛlɛki anubɛ ala kɛlɛ-dannu bɔra nyɔ. Anu tara Tebɛsi soe fanan bira-a-la. 51 Bon-nayan-bɛ do ye wonu fanan bolo. Kun-tigi wo, kei wo, musu wo, anu tara anu dogon nyɔ. Anu ya dɛ balan anu kɔma ka yɛlɛ san-bɔn wo kuma. 52 Abimɛlɛki kenɛ san-bɔn wo don-dɛ la nyɔ, a ya tɛ sɔ bɔn wo la kɔnɔ 53 musi do ya kuru-belebele labui Abimɛlɛki kunyɛ rɔ. A kunyɛ ratiira. 54 Tiriyante wo rɔ, Abimɛlɛki ya ala keminɛ do kele min bi ala kɛlɛ-mirannu dununa. A ya a fɔ wo ye ko, “Ila faan sagan a lɛɛ rɔ. I ni n faga alako anu kana na a fɔ ko n tɔgɛ tora musi le la.” Keminɛ wo ya ala faan sagan a rɔ ka a laban. 55 Ala kɛlɛ-dannu ya a yen min kɛ ko a ara faga, anu dama nyɛnsɛnta. Anu tara anu barɛnu tɔ. 56 Alla ya Abimɛlɛkita ko-yogomɛ tayili sara a la wo nya na le bawo a ya a fa Kidiyɔnla dan mɔgɔ bi-wɔrɔnfila faga. 57 Alla ya a ma, Sɛkɛm mɔgɛnu ya tɔrɔyɛ sɔrɔn anuna wunduyogoyɛla ko la iko Kidiyɔnla den Yɔtam ya anu danka nya min. |
Kuranko Common Language Bible © The Bible Society in Sierra Leone, 2006.
Bible Society in Sierra Leone