Kɛlɛ-Kurugbɛnu 8 - ALLALA KUMƐ

Midiyan Kɛnu Nɔ-Laban-Koe

¹ Ifɛrɛm bɔnsɔn-mɔgɛnu ya anu tɛgɛ sigi Kidiyɔn ma, anu ko, “I wara nfen ma ma la kɛ la? Nfenna i wulita Midiyan kɛnu kɛlɛla, i ma ma kele?” A ya anu tɛgɛ sigi a ma dɔgɔma-ma-de!

² Kidiyɔn ko, “Nde ya min ma, anubɛ wole ya min ma, mɔgɔ ti wonu sanka anu nyɔgɔn ma. Wole ara koe min ma, wo tenbira maletɛ la pirr!

³ Marita sɛnbɛ ara a ma, wo ara Midiyan nyamani-tigi filɛ kɛnu faga, Ɔrɛbu anubɛ Sibi. Nde ya nfen ma wulɔn tele rɔ nun?” Kidiyɔn ban wo fɔla, anu yisi-kimara pɔi!

⁴ Kɛ wati ya a taran gbɛ, Kidiyɔn anubɛ ala kɛlɛ-dan mɔgɔ kɛmɛ sawɛ ara Yorodan bɛ kɛ tɛgɛ nun. Anu bandannɛ dɔgɔma-ma-de kɔnɔ hali wo, anu bi anu yogenu sagaranna.

⁵ Anu ke Sukɔti soe ma, Kidiyɔn ya Sukɔti-so-burɔ-mɔgɛnu tara biredi ma alako ala kɛlɛ-dannu si min dɔn. A ya a fɔ anu ye ko, “Anu bandannɛ dɔgɔma-ma-de kɔnɔ hali wo, ma ye Midiyan mansa fila sagaranna, Salamuna anubɛ Siba.”

⁶ Kɔnɔ Sukɔti-so-burɔ-mɔgɔ-banu ya a fɔ ko, “Ma si biredi di wo ma kama? Wo ma mansɛ kɛnu bira wɛ.”

⁷ Kɔnɔ Kidiyɔn ya a fɔ ko, “Ni Mari ya mansɛ kɛnu don n bolo tɔ tumɛ min, n si wole latɛn wɔnɔ-bosɛ la ka bɔ dugu ragbalanɛ wo rɔ.”

⁸ Kidiyɔn anubɛ ala kɛlɛ-dannu bɔra nyɔ ka ta Pɛnuwɛli soe burɔ. Anu ya soe wo mɔgɛnu fanan tara. Sorɔ-mɔgɛ wonu fanan ya a yabi iko Sukɔti mɔgɔ-banu ya a yabi nya min.

⁹ Kidiyɔn ya a fɔ wonu fanan ye ko, “Ni n kɛndɛ nara, n si wola san-bon-nayan-bɛ tii.”

¹⁰ Mansa Siba anubɛ Mansa Salamuna anubɛ anuna kɛlɛ-den-toenu, wonu mɔgɔ waga tan-ni-loli (15,000) ye Karakɔ lɛɛ rɔ. Wo ya a taran, mɔgɔ waga kɛmɛ ani mɔgɔ waga mogan (120,000) bara faga sibolo-gbɛrɛnu tɔ tele-bɔɛ wara la.

¹¹ Kilɛ min bi Noba soe anubɛ Yɔgabɛha soe tele-bɔɛ wara la wula-da-rakolɔn dan la, Kidiyɔn anubɛ ala kɛlɛ-dannu bilara wo fɛ. Anu tara mansɛ wonubɛ anuna kɛlɛ-dan wonu natɛrɛna.

¹² Mansa Siba anubɛ Mansa Salamuna ya anu buri tun. Kɔnɔ Kidiyɔn ya anu sagaran ka ta anu bira. Anu yogenu tatɛrɛgbɛnta anu kɔrɔ.

¹³ Kidiyɔn sɛgimatoe ka bɔ kɛlɛ rɔ, a bɔra Hɛrɛsa kila-masangbɛ fɛ.

¹⁴ A ya Sukɔti keminɛ do bira ka a ragbɛrɛn. Keminɛ wo ya mɔgɔ-ba bi-wɔrɔnfila ani mɔgɔ-ba wɔrɔnfilɛ (77) wonu tɔgɛ sɛbɛ Kidiyɔn ye minnu bi Sukɔti soe burɔ.

¹⁵ Kidiyɔn tara Sukɔti mɔgɔ-ba wonu taran. A ya a fɔ anu ye ko, “Wo ya wo ban dɔn-fan dila nna mɔgɔ-bandannɛnu ma tumɛ min, wo yili ye wo ko tun? Wo ya a fɔ ko wo ti sɔn ma fandala bawo ma ma Mansa Siba anubɛ Mansa Salamuna bira wɛ. Kɔnɔ wo ma anu yen? Ma ara na anu dununa.”

¹⁶ Ale Kidiyɔn nara wɔnɛ minnu na a bolo ka bɔ wulɛ rɔ, a ya kun-tigi wonu gbesi wonu na ka anu tɔrɔ.

¹⁷ Wo kɔma, a tara Pɛnuwɛli soe burɔ ka anuna san-bon-nayan-bɛ tinya ka keinu faga soe wo burɔ.

¹⁸ Kidiyɔn ya mansa biranɛ wonu manyinika, a ko, “Wo ya mɔgɔ filɛ minnu faga Tebɔ kɔnkɛ kuma wulɔn, wo ya nfen lɔn wonuna ko rɔ?” Mansɛ wonu ko, “Ma ya mɔgɔ filɛ minnu faga, wonubɛ mansa-dannu munta, ado anu munta i la fanan.”

¹⁹ Kidiyɔn ya a fɔ ko, “N na kelen sɔrɔn le wonu na. N bara n keli Mari-nimɛ rɔ, ni wo ma wonu faga nun, n ti na wole fanan faga nun.”

²⁰ A ya a fɔ ala sarɛ Yɛta ye ko, “Ile ni anu faga.” Kɔnɔ Yɛta kilanta ala faan saganna a lɛɛ rɔ bawo a dɔgɔ fɔlɔn.

²¹ Mansa filɛ wonu ya a fɔ Kidiyɔn ye ko, “Ile le nyɛrɛ-nyɛrɛ ye ma fagala bawo kina si kinaya-wɔlɛ le kɛ.” Kidiyɔn ya anu faga. A ban anu fagala, yɔlɔkɔ-kinyɛ minnu bi anuna nyomɛnu kan la, a ya wonu bi.

²² Isirɛla mɔgɛnu ya a fɔ Kidiyɔn ye ko, “I wara ma lakisi Midiyan kɛnu masibɛ ma min kɛ, a sɔgɛ ye ma la, i ni ma mala mansɛ la, ado mansayɛ ni to ita bɔn la.”

²³ Kɔnɔ Kidiyɔn ya a fɔ anu ye ko, “Maleta bɔn ti ma mansaya-bɔn la wo kuma. Fɔ Mari, wo le dɔrɔn si ma wota mansɛ la.”

²⁴ Wo kɔma, Kidiyɔn ya anu manyinika ko kelen ma, a ko, “Min sɔgɛ ye n na dɔrɔn, wo ya sɛnɛ-fore minnu bi ma yogenu bolo, wo kelen-kelennamɛ-bɛɛ ni wotɛ di n ma.” (Midiyan keinu si sɛnɛ-fore le don anu tole la iko anu sigi-nyɔgɛnu si a ma nya min.)

²⁵ Isirɛla mɔgɛnu ko, “Ka wonu di i ma, ma diyana-koe le wo la.” Anu ya kura-belebele do rasa dugi ma. Mɔgɛ bɛɛ ya sɛnɛ-fore minnu bi kɛlɛ rɔ, anu nara ka anutɛ sa nyɔ rɔ.

²⁶ Anu ya sɛnɛ-fore minnu nadɛn Kidiyɔn ye, wo damasi lakofunɛ gbiliyɛ manɛ le iko yi kalɔn nani. A dɛɛn-kɔlɔnɛ sa kɛ ma, a bolo-kalama-dɛɛn sa kɛ ma, a kan-na-fen sa kɛ ma, hali a yɔlɔkɛ minnu bi nyomɛnu kan na. Hali Midiyan kɛnuna mansaya-duruki da-gbɛlɛnu bɔnɛ kɛnu na.

²⁷ Kidiyɔn ya sɛnɛ wonu nalee ka a ma fɔlɔnfalan-kundi la. A tara wo la a warɛ Ɔfara soe burɔ. Isirɛla mɔgɔ damasi ya hakɛ kɛ ka don sɛnɛ-fɔlɔnfalan-kundi wo batoe rɔ. Sɛnɛ min manɛ fɔlɔnfalan-kundi wo la, wo mara gbɛrɛ la Kidiyɔn anubɛ ala denbayɛ ye.

²⁸ Isirɛla mɔgɛnu ya Midiyan kɛnu nɔ. Yakɔrɔ-mamɔ ma taran anu ma tun. Wo kɔma, san bi-nani Isirɛla mɔgɛnu bi yisi-kimɛ rɔ Kidiyɔn kɔrɔ.

Kidiyɔn Faga-Koe

²⁹ Kidiyɔn tara ala bɔn la ka a sigi nyɔ.

³⁰ A ya den-kei mɔgɔ bi-wɔrɔnfila sɔrɔn bawo a ya musu-siyaman furu.

³¹ Yɔɔn-musi do ye a bolo min siginɛ Sɛkɛm soe rɔ. Wo ya den-kei do sɔrɔn a ye. Anu ya dan wo tɔgɔ sa Abimɛlɛki.

³² Yowasila den Kidiyɔn kɔrɔyara kɔbɔkɔbɔ, a nara to fagala. Anu ya a togon a fa kaburu dafɛ Ɔfara soe burɔ. Abiyɛsa kebila-mɔgɛnu barɛ le nyɔ la.

³³ Kidiyɔnna fagɛ kɔmɛ, Isirɛla mɔgɛnu ya Alla-batoe boloka bɛrɛbɛrɛ-wɛ-kɛ ka Beyali bɛsɛnu kɔ. Anu ya bɛsɛ wo kelen tɔgɔ sa “Ma sarama-kan kirinɛ Beyali min ye.”

³⁴ Anuta Mari Alla min ya anu kisi anu yogenu masibɛ ma anuna foolɛ rɔ, anu ma sɔn wo sako kɛ-koe ma tun.

³⁵ Min sanɛ wo kuma, anu mara fisiriwɔlɛnu na. Anu ma anu miri Kidiyɔn kebilɛ ma min ya Isirɛla mɔgɛnu kunka.