Kɛlɛ-Kurugbɛnu 7 - ALLALA KUMƐKidiyɔn anubɛ Ala Kɛlɛ-Dannu Ta-Koe Kɛlɛ Rɔ 1 Wo wulun sɔgɔma, anu bi Kidiyɔn min kelela Yɛruba-Beyali, wonubɛ ala kɛlɛ-dannu tara anu daga makɛ Harodi tenke dafɛ. Kɔnɔ Midiyan kɛnuna kɛlɛ-dannu tara anu daga makɛ anu denu ma kantɔ lɛɛ do rɔ min bi More kɔnkɛ dafɛ. 2 Mari ya a fɔ Kidiyɔn ye ko, “Bawo ila kɛlɛ-dannu siya, n ti a ma, anu ni Midiyan kɛnu nɔ. Ni anu ya Midiyan kɛnu nɔ, anu bi anu mirila anuna siyayɛ le ma. Nde, Mari ti gbiliyɛ sɔrɔn worɔ. 3 A fɔ ila kɛlɛ-dannu ye ko ni minnu kilandɔgɔ anu tɛma, wonu ni sɛgi anu kɔma. Kɔnɔ minnu ti kilan, wonu ni to sigini Kaliyadi kɔnkɛ dafɛ yan.” Mɔgɔ waga mogan-ni-fila (22,000) tɛgɛra anu na purunsan! Wonu sɛgira anu kɔma. Fɔ mɔgɔ waga tan (10,000) pe, wo le tora nyɔ. 4 Mari ya a fɔ Kidiyɔn ye tun ko, “Hali wo, ila kɛlɛ-dannu siya fɔlɔn. Anu bi, i ni yigi anu na yi-worɔn la. N si anu yabɔ nyɔ. Ni n ya a fɔ minnu ma ko anu bi tala le, i ni wonu bi. Kɔnɔ ni n ya a fɔ minnu ma ko anu ti ta, i ni wonu nasɛgi.” 5 Kidiyɔn yigira anu na yi-worɔn la. Mari ya a fɔ Kidiyɔn ye ko, “Ni minnu ya anu nyɛnkin ka anu min anu bolo tɔ, i ni wonu bi. Ni minnu ya anu dɛ burun yi ma iko wuli, i ni wonu nasɛgi.” 6 Mɔgɔ kɛmɛ sawa (300) pe, wonu denu ya anu min anu bolo tɔ. A toe wonu ya anu dɛ burun yi ma. 7 Mari ya a fɔ Kidiyɔn ye tun ko, “Wobɛ mɔgɔ kɛmɛ sawɛ minnu ya anu min anu bolo tɔ, wonu denu si Midiyan kɛnu nɔ. I ni a fɔ a toenu ye ko anu ni sɛgi anu kɔma kilɛ la.” 8 Kidiyɔn ya Isirɛla kɛlɛ-den-toe wonu nasɛgi anu barɛnu tɔ fɔ mɔgɔ kɛmɛ sawa pe (300) wo. Anu ya anuna kɛlɛ-kɛ-buri anubɛ anuna kɛlɛ-kɛ-miran bɛɛ to mɔgɔ kɛmɛ sawɛ wonu bolo. Midiyan kɛ wonu daga makɛnɛ lɛɛ rɔ anu ma dugu la. 9 Wulɔn suyi rɔ, Mari ya a fɔ Kidiyɔn ye ko, “Wo ni wo lasɔ. Wo ni ta Midiyan kɛnu kɛlɛ anu daga makɛ tinɛ. N si anu don wo bolo tɔ. 10 Kɔnɔ ni sikɛ ye i rɔ, wobɛ ila wɔli-kɛlɛ Pura ni ta ko-lakɔrɔsi kɛ ka wo tole masɔ anu na. 11 Wo ni a lɔn anu bi min fɔla. Wo si a ma, wo yisi ra ni gbɛlɛya.” Wo kɔma, Kidiyɔn anubɛ ala wɔli-kɛlɛ wo tara anu tole masɔ anu yogenu na. 12 Midiyan kɛnu anubɛ Amalɛkinu anubɛ sibolo-gbɛrɛ minnu bi tele-bɔɛ wara la nun, wonu nyɛnsɛnnɛ lɛɛ wo rɔ iko kondɔnnu. Anuna nyomɛnu siya iko ba-kɛnkɛn. 13 Kidiyɔn kera nyɔ tumɛ min, anu ya a taran, kei do ye ala kiyo rakaranna a ta-nyɔgɛ do ye. Wo ye a fɔla ko, “N kiyora biredi latintannɛ le la bi. A ye yigila kurukurunna dagɛ rɔ. A gbesira fani-bon kelen na. Fani-bɔn wo buira. A radɛnfɛra kɔgbɔ!” 14 A ta-nyɔgɛ wo ko, “Kɛ kɔrɔ-bɛrɛbɛrɛ ye min na, biredi wo, Yohasila den Kidiyɔnta faan le wo la. Alla ara ban male Midiyan kɛlɛ-dan damasi donna Isirɛla mɔgɛnu bolo tɔ.” 15 Kidiyɔn ban kiyo wo kɔrɛ lɔnna, wo diyara a ye. A ya a nyɛnkin ka Mari bato. A sɛgira ala kɛlɛ-dannu bara. A ya a fɔ anu ye ko, “Wo ni wo lasɔ. Mari ara Midiyan kɛnu don ma bolo tɔ bi, yɔ!” 16 Kidiyɔn ya mɔgɔ kɛmɛ sawɛ kɛnu tafara sigi tina sawa la. A ya kala-mɛlannu don anu damasi bolo, bɔnku-dagɛ burunnɛ kala-mɛlan wonu kun na. Wo kɔma, a ya burinu fanan don anu bolo. 17 Kidiyɔn ya a fɔ anu ye ko, “Wo ni wo yɛ bɛn n ma. N ba ke anuna dagɛ wo dala tumɛ min, ni n ya a ma nya min, wole fanan ni a ma wo nya. 18 Mabɛ nna mɔgɔ kɛmɛta buru-kan wa bɔ tumɛ min, wole fanan ni wota burinu fɛ anuna dagɛ wola foolɛ rɔ. Wo ni gbele-gbelen wo nyɔgɔn fɛ ka a fɔ ko, ‘Ma ye kɛlɛ kɛla Mari anubɛ Kidiyɔn ye.’ ” 19 Wo tumɛ anu yogenu ban-san anuna kila-kandannɛnu mayɛlɛmana, Kidiyɔn anubɛ ala kɛlɛ-dan mɔgɔ kɛmɛ kera anu yoge wonuna dagɛ wo dala yanni su-talɛ ni ke. Kidiyɔn anubɛ ata mɔgɔ kɛmɛ ya anuna buri fɛ ka anuna bɔnku-dagɛ wonu tatii. 20 Mɔgɔ kɛmɛ filɛ doi, wonu ya a ma wo nya. Anu ya anuna kala-mɛlannu bira anu bolo maran la ka burinu bira anu bolo-nyimɛ la. Anu gbele-gbelenta, anu ko, “Ma ye kɛlɛ kɛla Mari anubɛ Kidiyɔn ye.” 21 Anu tora sɔni anu gbɛ rɔ dagɛ wola foolɛ rɔ. Anu yogenu burimatoe ye belenna worondola kɔndɔfili bolo. 22 Kidiyɔn anubɛ ala kɛlɛ-dannu bi buru-fɛyɛ wo kun na, Mari ya a ma, anu yoge wonu donta anu nyɔgɔn kɛlɛla. Anu tara anu yogenu gbenna Sɛrɛrati kilɛ la ha Bɛti-Siti soe ma. Anu tara anu dan Abɛli-Mɛhola soe burɔ min bi Tabati soe dafɛ. 23 Kidiyɔn ya kilayɛ lata Nafatali anubɛ Asɛra anubɛ Manasa bɔnsɔn filɛnu ma tun ka anu kele ka na anu dɛnbɛ Midiyan kɛnu sagaranna. 24 Kidiyɔn ya kilayɛ lata Ifɛrɛm bɔnsɔn-mɔgɛnu ma minnu siginɛ nyɔ-kɔnkɔ-nyamanɛ rɔ, a ko, “Wo na ma dɛnbɛ ma yogenu kɛlɛla ka kilɛ tɛgɛ anu ma Yorodan bɛ anubɛ yi-mɛsɛnu dafɛ ma yarɔ.” Ifɛrɛm bɔnsɔn-mɔgɛnu ya Yorodan bɛ anubɛ a dafɛ yi-mɛsɛnu bira-a-la ha ka ta ke Bɛti-Bara soe burɔ iko Kidiyɔn ya a sara anu bara nya min. 25 Ifɛrɛm bɔnsɔn-mɔgɛnu ya Midiyan kɛnuna nyamani-tigi filɛ bira, Ɔrɛbu anubɛ Sibi. Anu ya Mansa Ɔrɛbu faga farɛ do kɔrɔ. Wo kɔma, anu ya nyɔ kele ko, “Ɔrɛbu farɛ.” Anu ya Mansa Sibi wo faga nɔnbɔ-gbɔ-yi burun tinɛ. Wo kɔma, anu ya nyɔ kele ko, “Sibita nɔnbɔ-gbɔ-yi burun tinɛ.” Anu tara mansa filɛ kɛnu kunyɛnu sigi Kidiyɔn kɔrɔ bɛ-kɔgɔma tele-bɔɛ wara la. |
Kuranko Common Language Bible © The Bible Society in Sierra Leone, 2006.
Bible Society in Sierra Leone