Kɛlɛ-Kurugbɛnu 4 - ALLALA KUMƐ

¹ Ehudi fagara tumɛ min, Isirɛla mɔgɛnu ya ko-yogomɛ kɛ ka bila Mari la tun.

² Kenan Mansa Yebin min siginɛ Hesɔ soe burɔ, Mari sɔnta ko wo ni Isirɛla mɔgɛnu nɔ. Mansɛ wota kɛlɛ-den-kun-tigi Sisara, min siginɛ Harosɛti-Hagoyim soe burɔ,

³ nɛgɛ-kirindi kɛmɛ kɔnɔntɔ taranta a bolo. Mansɛ wo ya Isirɛla mɔgɛnu bira boloko-yogomɛ-kɛ san mogan kɔrɔ. Woletɔ Isirɛla mɔgɛnu dira Mari dala.

Dɛbora anubɛ Bɛraki Wara-Koe

⁴ Lapidɔtila musi Dɛbora, nɛbi le wo la nun min bi kiti-tɛgɛlayɛ la Isirɛla mɔgɛnu kun na wo wati rɔ.

⁵ Tuma-wo-tuma nun, a si a sigi tamaro-kuri do kɔrɔ min bi Rema soe anubɛ Bɛtɛli soe tɛma Ifɛrɛm kɔnkɔ-nyamanɛ rɔ ka ata kiti-tɛgɛya-wɔlɛ kɛ nyɔ. Mɔgɛnu si ta a wara ka hɛnkili sɔrɔn a bolo.

⁶ Lunyɛ do, a ya Abinowamta den Bɛraki kele min siginɛ Kidɛsi soe burɔ Nafatalita nyamanɛ rɔ. Bɛraki nanɛ a wara, a ya a fɔ a ye ko, “Isirɛla mɔgɛnuta Mari Alla le ya kumɛ kɛ di n ma ka a fɔ i ye, a ko i ni kei waga tan (10,000) bi Nafatali bɔnsɔn anubɛ Sɛbulɔn bɔnsɔn rɔ. A ko i ni wonu bi ka yɛlɛ anu na Tebɔ kɔnkɛ kuma.

⁷ A ko a si Mansa Yebinta kɛlɛ-den-kun-tigi Sisara anubɛ ala kɛlɛ-dannu nana wo kan ma. Anu si wo kɛlɛ Kisɔn bɛ dala. Anu si na kirindinu na kɔnɔ hali wo, Mari ko a si a ma, wo ni anu nɔ.”

⁸ Kɔnɔ Bɛraki ya a fɔ Dɛbora ye ko, “Ni mabɛ tara, n si ta kɔnɔ n ti ta muk, ni ile sa n fɛ.”

^9-10 Dɛbora ko, “Tana ma wo la. N si ta i fɛ. Kɔnɔ ile ti tɔgɔ-wo-tɔgɔ sɔrɔn kɛlɛ kɛ rɔ fɔ musi, wo le ye Sisara nɔla.” Dɛbora tara Bɛraki fɛ Kidɛsi soe burɔ. Anu ke soe wo burɔ, anu ya mɔgɔ waga tan (10,000) wonu kele ka bɔ bɔnsɔn filɛ wonu tɔ ko anu ni bila anu mɔgɔ filɛ fɛ.

¹¹ Wo wati nyɛrɛ rɔ, kei do ye nyɔ min tɔgɛ Hibera. Kena mɔgɛ do le ale la. Musa biran-kei Hobabu kebila-nyɔgɛ le ale la. Hibera kɛ ya a bɔ a na-kelen-nyɔgɛnu kurun tɔ ka ta ala fani-bɔn sɔ a dan na kɔlɔma-kuri-latankani-wɛ do kɔrɔ min bi Seyanim soe burɔ Kɛdɛsi soe telen tɔ.

¹² Sisara ya a lamɔɛn tumɛ min ko Bɛraki anubɛ ala kɛlɛ-dannu bara yɛlɛ Tebɔ kɔnkɛ kuma,

¹³ a ya ala kɛlɛ-dannu anubɛ nɛgɛ-kirindi kɛmɛ kɔnɔntɔ makele ka bɔ Harosɛti-Hagoyim soe burɔ. Anu tara Kisɔn bɛ fɛ kɛlɛ-kɛ-tinɛ.

¹⁴ Dɛbora ya a fɔ Bɛraki ye ko, “Ta, Mari ye i fɛ. Mari si Sisara don i bolo tɔ bi.” Bɛraki anubɛ ala kɛlɛ-den waga tan yigira ka bɔ Tebɔ kɔnkɛ kuma.

¹⁵ Bɛraki anubɛ ala kɛlɛ-dannu ya anu yogenu tagbɛrɛn wati min, Sisara anubɛ ala kɛlɛ-dannu kumakɔra. Sisara bɔra ala kirindi rɔ. A yigira ka buru-kɛ bi.

¹⁶ Bɛraki anubɛ ala kɛlɛ-dannu ya Sisarala kɛlɛ-dannu sagaran ha Harosɛti soe burɔ anu bɔra kan min. Anu ya Sisarala kɛlɛ-dan bɛɛsi faga tɛrr!

Sisara Faga-Koe Musi Bolo

¹⁷ Sisara ya a buri ka ta Hiberala fani bɔn la, ado Hesɔ Mansa Yebin anubɛ Hibera, wonu filɛ ye kan kelen de rɔ nun. A ya Hiberala musi Yeyɛli taran bɔn la.

¹⁸ Musi wo ya a fɔ a ye ko, “N fa, don bɔn la. I kana kilan.” Ale Sisara donta bɔn la. Yeyɛli ya birinkan burun a ma ka a dogon.

¹⁹ Sisara ya musi wo tara yi ma. Musi wo ya gbolo-bɔrɛ dɛ laka ka nonɛ do di a ma. A ban nonɛ wo minna, a ya birinkan burun ale Sisara ma tun.

²⁰ A ya a fɔ musi wo ye ko, “Sɔ fani-bɔn kɛ dɛ la. Ni mɔgɛ do nara ka mɔgɔ manyinikɛ-kɛ, a fɔ a ye ko, ‘Ade.’ ”

²¹ Sisara bandannɛ dɔgɔma-ma-de! Wo le ya a to, kinɔgɛ tenbira a ma peru! Yeyɛli ya fani-bɔn wo balan-kɔlɔma-lasulennɛ do bi anubɛ kundu-wɛ. Musi wo ya a madon Sisara la sɛɛ, ka kɔlɔma wo gbangban a kunyɛ rɔ. Kɔlɔma wo tenbira a kunyɛ rɔ ka yigi dugu rɔ saru! A fagara.

²² Bɛraki ye Sisara lanyinina tumɛ min, Yeyɛli bɔra luyi ma ka a fɔ a ye ko, “Na bɔn la yan. I ye nyinina kei min ma, n si wo yira i la.” A donta musi fɛ bɔn la. Bɛraki ya Sisara suyi taran bɔn la kɔlɔma gbangbannɛ a kunyɛ rɔ bon-kole ma.

²³ Tele wo nyɛrɛ rɔ, Alla ya sɛnbɛ di Isirɛla mɔgɛnu ma ka Kenan Mansa Yebin nɔ.

²⁴ Isirɛla mɔgɛnu sɛnbɛ ma tora kofula ka to Mansa Yebin ragbɛrɛnna ha a fagara.