Kɛlɛ-Kurugbɛnu 3 - ALLALA KUMƐ

Isirɛla Mɔgɛnu Kɔrɔbɔ-Koe

^1-2 Mari ya sibolo-gbɛrɛ donu to nyɔ alako ka Isirɛla mɔgɛnu kɔrɔbɔ minnuta wati ma bɛn Kenan nyamani-kuma-kɛlɛ ma, alako ka wonu fanan karan kɛlɛ-kɛ-nya ma.

³ Sibolo-gbɛrɛ minnu tora anu tɛma nyamanɛ wo rɔ, wonu denu denu bi kɛnu na, Filisitinuna so-kun lolɛ wo, Kenan kɛnu wo, Saidon so-burɔ-mɔgɛnu wo, anubɛ Hefa minnu siginɛ Lɛbanan kɔnkɔ-nyamanɛ wara la ka a dabira Beyali-Hɛrɔman kɔnkɛ ma ha ka ta a sigi Hamati kɔnkɔ-gbɛran la.

⁴ Mari ya a ma, sibolo-gbɛrɛ kɛnu denu si ma Isirɛla mɔgɛnu kɔrɔbɔlɛnu na ka a lɔn ni anu si ata kumɛ bira le iko Musa ya a latenbi anu benbanu ma nya min.

⁵ Woletɔ Isirɛla mɔgɛnu sigini tora sibolo-gbɛrɛ kɛnu tɛma, Kenan kɛnu wo, Hɛtinu wo, Amoranu wo, Perasanu wo, Hefanu wo, anubɛ Yebusinu.

⁶ Anu ma anu halaki fɔ ka anu ma anu furu-nyɔgɛnu na. Isirɛla keminɛnu ya anuna dunmusinu furu. Anu denu fanan ya Isirɛla mɔgɛnuna dunmusinu furu. A ma mɛ lefan, Isirɛla mɔgɛnu bilara anuta bɛsi-kɔ-koenu tɔ.

⁷ Wo ya a ma, anu bilara anuta Mari Alla la ka anu kan-kɔ sɔ a la ka wonuna bɛsɛnu Beyali anubɛ Asitɔra kɔ.

⁸ Wo ya a ma, Mari fonde bɔra anu kuma. A sɔnta ko Mɛsopotemiya nyamani-tigi Kusan-Risatam ni anu nɔ. San segin, a ye anu kun na.

Ɔtiniyɛli Wara-Koe

⁹ Isirɛla mɔgɛnu dira Mari dala. Mari ya Kelabu dɔgɔ-keminɛ Kenasila den Ɔtiniyɛli yabɔ ka ma kɛlɛ-kurugbɛ la Isirɛla mɔgɛnu ye ka anu kunka.

¹⁰ Marita sɛnbɛ yigira a kuma. A mara Isirɛla mɔgɛnuna kɛlɛ-kurugbɛ la. A tɛ Mɛsopotemiya nyamani-tigi anubɛ ala kɛlɛ-dannu kɛlɛ tinɛ, Mari ya a ma, a ya wonu nɔ.

¹¹ San bi-nani kɔrɔ, anu bi yisi-kimɛ rɔ anuna nyamanɛ rɔ Ɔtiniyɛlita wati rɔ. Wo fagara tumɛ min,

¹² Isirɛla mɔgɛnu bilara Mari la tun. Woletɔ Mari ya a ma, Mohabu nyamani-tigi Ɛkilɔn ya Isirɛla mɔgɛnu nɔ.

¹³ Mansɛ wo ya Amonnu anubɛ Amalɛkinu kele alako wonu ni ta a dɛnbɛ Isirɛla mɔgɛnu kɛlɛ tinɛ. Anu ya Isirɛla mɔgɛnu nɔ ka Tamaro Kɔrɔ bɔ anu bolo.

¹⁴ Mansa Ɛkilɔn taranta Isirɛla mɔgɛnu kuma san tan-ni-segin kɔrɔ.

Ehudi Wara-Koe

^15-16 Isirɛla mɔgɛnu dira Mari dala tun. Mari ya kɛlɛ-kurugbɛ do yabɔ anu ye tun alako wo ni anu kumafunfan. A ya Kɛrala den Ehudi yabɔ ka bɔ Bɛnyamɛ bɔnsɔn rɔ. Bolo-maranna-wɔli-kɛlɛ le ale Ehudi la. Ehudi ya solomuri ladan a nyɛrɛ ye. Wola yanyɛ nunkan-nya kelen. A ya wo kiri ala kurusi kɔrɔ a bolo-nyimɛ rɔ. Isirɛla mɔgɛnu ya Mansa Ɛkilɔn sanbɛnu don ale Ehudi bolo.

¹⁷ Ehudi ya ale mansɛ sanbɛ wonu bi ka ta anu don a bolo. (Mansɛ wo kunba dɔgɔma-ma-de!)

¹⁸ A ban sanbɛ wonu donna a bolo, anubɛ dunu-bilɛnu sɛgimatoe anu barɛ, a ya wonu nata a yarɔ.

¹⁹ A ke kuru-bɛsi-malɛsɛnɛnu ma minnu bi Kiligali soe dafɛ, a sɛgira a kɔma ale mansɛ wara. A ya a fɔ ale Mansa Ɛkilɔn ye ko, “Nyamani-tigi, sarakanɛ ye n bolo ka a fɔ ma mɔgɔ filɛ tɛma.” Mansɛ ya a fɔ ala wɔli-kɛlɛnu ye ko, “Wo ni wo masɛgi bɛ min na fɔlɔn.” Ala wɔli-kɛlɛnu bɔra nyɔ.

²⁰ Mansɛ wo kelen pe tora siginɛ ala konko-kimanɛ la san-bɔn la. Ehudi ya a madon a la ka a fɔ a ye ko, “Allala kilayɛ ye n bolo ka a fɔ i ye.” Mansɛ wo ya a lakɔɛnma.

²¹ Ehudi ya ala solomuri sagan a bolo-nyimɛ rɔ ala kurusi kɔrɔ a maran la. A ya a sɔrɔngbɔ mansɛ wo buyi rɔ. Muri wo donta mansɛ buyi rɔ.

²² Mansɛ wo kɛɛn ya muri wo kalɛ yamatogon kɔnɔ a sungban bɔra a kɔma kilɛ la. A ya solomuri wo to a buyi rɔ.

²³ Ehudi bɔra ka da-wala-dɛ latogon mansɛ wo ma ka a rasɔgɔ. A tara a ye.

²⁴ Ehudi tani kɔmɛ, mansɛ wola wɔli-kɛlɛnu nara, anu ya a taran, dɛ wo rasɔgɔnɛ. Anu miri ko a ara ta da kɔma.

²⁵ Anu mɛra ale mansɛ makɔnɔna ha! Kɔnɔ tɔ-a-la, anu ya da-nyin bi ka dɛ laka. Anu tɛrɛnara ka mansɛ wo suyi sanɛ taran bon-kole ma.

²⁶ Kɔnɔ anu denu bi mansɛ wo makɔnɔna tumɛ min, Ehudi wo ye tala a ye. A tenbira kuru-bɛsi-malɛsɛnɛ wonu na ka ta Siyarati soe burɔ

²⁷ Ifɛrɛm kɔnkɔ-nyamanɛ rɔ. A ke nyɔ, a ya kɛlɛ-kɛ-buri fɛ ka Isirɛla kɛlɛ-dannu nadɛn. A sɔra anu yarɔ ka bɔ kɔnkɛ wonu tɔ.

²⁸ A ya a fɔ wonu ye ko, “Wo ni bila n fɛ. Mari ara wo yoge Mohabunu don wo bolo tɔ bi.” Anu bilara Ehudi fɛ. Mohabunu si Yorodan bɛ tɛgɛ kan min, anu ya nyɔ bira-a-la. Anu ma sɔn Mohabunu ni tenbi nyɔ mumɛ!

²⁹ Mohabu kɛlɛ-dan minnu tagbɛlɛ, wulɔn tele nyɛrɛ rɔ, anu ya wonu mɔgɔ waga tan nyɔgɔn faga. Hali Mohabu kɛlɛ-dan mɔgɔ kelen kunyɛ ma bɔ a rɔ.

³⁰ Isirɛla mɔgɛnu ya Mohabunu nɔ. Wo kɔma, san bi-segin, Isirɛla mɔgɛnu yisi kimanɛ tora.

Samiga Wara-Koe

³¹ Ehudita wati bannɛ, Anatila den Samiga sigira Ehudi gbɛ rɔ. Samiga ya sara-ninki lagbengben fan bi ka Filisiti mɔgɔ kɛmɛ wɔrɔ faga wo la. Ale fanan ya Isirɛla mɔgɛnu kumafunfan.