Kɛlɛ-Kurugbɛnu 20 - ALLALA KUMƐ

Isirɛla Mɔgɛnu Mabɛn-Koe Kɛlɛla Ko La

¹ Isirɛla bɔnsɔn tan-ni-kelan bɛɛsi ya anu kundɛn ka a dabira Dan soe ma kan tɔ, ha ka ke Biri-Siba soe ma dugu la, hali minnu bi Kaliyadi nyamanɛ rɔ tele-bɔɛ wara la. Anu damasi ya anu kundɛn Mari yakɔrɔ Misipa soe burɔ.

² Isirɛla bɔnsɔn-kun-tigi damasi ye nyɔ anubɛ kɛlɛ-dan mɔgɔ waga kɛmɛ nani. Anu mabɛnnɛ kɛlɛ-kɛ-koe la.

³ Wo wati rɔ, Bɛnyamɛ bɔnsɔn-mɔgɛnu ya a lamɔɛn ko Isirɛla mɔgɛ bɛɛsi la ara dɛn Misipa soe burɔ. Isirɛla mɔgɛ wonu ya Lifayi-kei wo manyinika a fɛ-sigi-musi wola ko ma ko, “Ko-yogoma-su kɛ mara nya min, wo rakaran ma ye.”

⁴ Musi wola kei ko, “Mabɛ n fɛ-sigi-musi nara ka ki Kibiya soe burɔ Bɛnyamɛ nyamanɛ rɔ.

⁵ Suyi rɔ, Kibiya keminɛnu nara ka kurɔn mini bɔn ma. A sɔgɛ ye anu na, anu ni n faga bawo anu ma nde masɔrɔn, woletɔ anu kira anu sala n fɛ-sigi-musi fɛ ha a fagara.

⁶ Woletɔ n ya a suyi bi ka a ratɛgɛtɛgɛ ka a ratala Isirɛla bɔnsɔn tan-ni-fila bɛɛ la bawo anu bara ko-yogoma-su kɛ ma male Isirɛla mɔgɛnu tɛma.

⁷ Male Isirɛla mɔgɔ-gbansan le kɛ la. Ma si nfen ma kɛ ko-su rɔ?”

⁸ Isirɛla mɔgɔ damasi kunta kan kelen ma. Anu ko, “Male min bi yan kɛ la yɛ, mɔgɔ-wo-mɔgɔ kana sɛgi a warɛ tun.

^9-10 Ma ye min mala ka Kibiya kɛnu kɛlɛ, wo le kɛ la. Mɔgɔ-kɛmɛ wo mɔgɔ-kɛmɛ, ma si mɔgɔ tan bi wonu tɔ koron-nakɛ fɛ. Wonu si ta kɛlɛ-mirannu anubɛ dɔn-fannu makele ka na anu don kɛlɛ-dannu bolo. A toe minnu bi tola, wonu si ta bui Bɛnyamɛ-Kibiya kɛnu ma ka a tɛgɛ anuna ko-yogoma-su kɛ ma, anu ya min ma Isirɛla mɔgɛnu na.”

¹¹ Isirɛla mɔgɛnu tora kan kelen tɔ soe wo kan ma.

¹² Isirɛla bɔnsɔn-mɔgɛnu ya kilayɛnu nata Bɛnyamɛ bɔnsɔn-mɔgɛnu ma, anu ko, “Ko-yogoma-su kɛ ara ma wola nyamanɛ rɔ, wo si ma kama?

¹³ Karagbɛlɛ minnu bi wo tɛma Kibiya soe burɔ, wo ni wonu don ma bolo. Ma si anu faga alako ko-yogoma-su kɛ ni bɔ male Isirɛla mɔgɛnu tɛma.” Kɔnɔ Bɛnyamɛ bɔnsɔn-mɔgɛnu ya anu tengberenya. Anu ma sɔn wo mala.

¹⁴ Bɛnyamɛ bɔnsɔn-mɔgɔ damasi ya anu nadɛn Kibiya soe burɔ Isirɛla mɔgɛ doinu kɛlɛ-koe la.

^15-16 Bɛnyamɛ kɛlɛ-dan yatɛ bɛnta mɔgɔ waga mogan-ni-wɔrɔ (26,000) ma. Anu ya kɛlɛ-dan minnu sɔrɔn Kibiya soe burɔ, wonu yatɛ bɛnta mɔgɔ kɛmɛ wɔrɔnfila (700) ma. Kɛlɛ-dan kɛ damasi rɔ, anu ya mɔgɔ kɛmɛ wɔrɔnfila (700) yabɔ minnu kusan lenfiran gbesila anu maran la. Mɔgɔ kɛmɛ wɔrɔnfilɛ kɛ, hali wonu ya lenfiran gbesi mɔgɔ kun-sigi kelan le ma, kuri ti foo a la.

¹⁷ Isirɛla bɔnsɔn tan-ni-kelan kɛlɛ-dan yatɛ bɛnta mɔgɔ waga kɛmɛ (400,000) nani ma. Kɛ bɛɛ kusan kɛlɛ kɛla.

Bɛnyamɛ Bɔnsɔn-Mɔgɛnu Kɛlɛ-Koe Anu Ta-Nyɔgɛnu Bolo

¹⁸ Isirɛla bɔnsɔnnu tara Bɛtɛli soe burɔ Alla madiya tinɛ. Anu ya Alla manyinika, anu ko, “Bɔnsɔn nyamintan fɔlɔn si ta ma yarɔ Bɛnyamɛ bɔnsɔn kɛlɛ tinɛ.” Mari ya Yuda bɔnsɔn yabɔ anu ye.

¹⁹ Wo wulun sɔgɔma, Isirɛla mɔgɛnu ya anu nasɔ ka ta anu daga makɛ Kibiya soe tɔgɔfɛ.

²⁰ Anu ya anu sɔ-bole rabɛn alako anu si Bɛnyamɛ bɔnsɔn-mɔgɛnu kɛlɛ nya min Kibiya soe ya-telen tɔ.

²¹ Kɔnɔ tele wo nyɛrɛ rɔ, Bɛnyamɛ bɔnsɔn-mɔgɛnu wulita ka ta mɔgɔ waga mogan-ni-fila (22,000) faga Isirɛla bɔnsɔn tan-ni-kelan wo rɔ.

^22-24 Isirɛla mɔgɛnu yisi magboyanɛ tara kan-tina-kelan wo rɔ anu si Mari bato kan min. Anu telenta dila Mari dala nyɔ ha wurɛ la. Anu ya Mari manyinika ko, “Ma ni ta ma na-kelen-nyɔgɛ Bɛnyamɛ bɔnsɔn-mɔgɛnu kɛlɛ, ka, ma kana ta?” Mari ya a fɔ anu ye ko, “Wo ta.” Bɔnsɔn tan-ni-kelan wonu ya anu yisi ragbɛlɛya ka ta Bɛnyamɛ bɔnsɔn kan ma ka anu sɔ-bole rabɛn tun iko a fɔlɔtɛ.

²⁵ Bɛnyamɛ bɔnsɔn-mɔgɛnu fanan wulita tun. Anu bɔra Kibiya soe burɔ ka ta anu kɛlɛ kan ma. Anu tara mɔgɔ waga tan-ni-segin (18,000) faga Isirɛla bɔnsɔn tan-ni-kelan kɛ rɔ tun.

²⁶ Isirɛla mɔgɛnu dimatoe sɛgira Bɛtɛli soe burɔ tun. Anu telenta sunyɛ rɔ ha wurɛ la. Anu ya saraka-mintantɛnu anubɛ yisi-kima-sarakɛnu bɔ Mari ye wulɔn.

^27-28 Allala tɔn-kenkirɛ ye Bɛtɛli soe burɔ wo wati rɔ. Ɛliyasala den Finihasi, Aruna mamanɛ, kɔni, wo le tɔn-kenkirɛ wo kun na wo wati rɔ. Anu ya Mari manyinika tun ko, “Ma ni anu kɛlɛ le, ka, ma ni ma fara anu kɛlɛla?” Mari ko, “Wo ta anu kɛlɛ tinɛ. Sina wo si anu nɔ.”

^29-30 Anu ta sawa nyɔgɛ, anu tara anu sɔ-bole rabɛn anu gbɛ rɔ tun. Donu ya anu dogon Kibiya soela foolɛ rɔ.

³¹ Bɛnyamɛ kɛlɛ-dannu bɔra soe burɔ ka ta anu kɛlɛ-tina gbɛkole wo ma. Anu donta Isirɛla bɔnsɔn tan-ni-kelan fagɛ rɔ iko a fɔlɔtɛ. Anu ya mɔgɔ bi-sawa nyɔgɛ faga bɔnsɔn tan-ni-kelan rɔ. Anu ya donu faga Bɛtɛli kilɛ la. Anu ya donu faga Kibiya kilɛ la.

³² Bɛnyamɛ bɔnsɔn-mɔgɛnu donta anu nyɛrɛ-matɔgɛ rɔ, anu ko, “Ma ara anu nɔ. Anu bi anu burila ma kɔrɔ iko a fɔlɔtɛ.” Bɔnsɔn tan-ni-kelan mɔgɛnu ya anu tabɛn nun ko, “Ma ni mɔlɔnɛ sigi anu na ha anu si bɔ soe burɔ nya min ka ma sagaran.”

³³ Kɛlɛ-den-kurɔn minnu bi mɔlɔnɛ kɛ sigila anu na, wonu ya anu buri Bɛnyamɛ bɔnsɔn-mɔgɛnu kɔrɔ doni ka ta anu nadɛn kan tinɛ do rɔ min tɔgɛ Beyali-Tema. Bɛnyamɛ bɔnsɔn-mɔgɛnu tara anu kɛlɛ tinɛ nyɔ. Isirɛla bɔnsɔn tan-ni-kelen tɔnkɔn kelan min dogonnɛ Kibiya soe tele-yigi wara la, wonu burimatoe bɔra ka bui Kibiya soe ma.

³⁴ Minnu dogonnɛ Kibiya soela foolɛ rɔ, wonu yatɛ bɛnta mɔgɔ waga tan (10,000) ma, ado anu kusan kɛlɛla. Anu buira soe wo ma. Kɛlɛ gbɛlɛyara anu tɛma. Bɛnyamɛ bɔnsɔn-mɔgɛnu ma a lɔn nun ko anu bi nala fagala le.

³⁵ Mari ya a ma, anu ya Bɛnyamɛ bɔnsɔn-mɔgɛnu nɔ. Anu ya kɛlɛ-dan mɔgɔ waga mogan-ni-loli ani mɔgɔ kɛmɛ kelen (25,100) faga Bɛnyamɛ bɔnsɔn rɔ tele wo rɔ.

³⁶ Bɛnyamɛ bɔnsɔn-mɔgɛnu ya a lɔn ko anu ti nɔ-ko sɔrɔn kɛlɛ wo rɔ. Isirɛla bɔnsɔn tɔnkɔn minnu ya mɔlɔnɛ ladan, wonu ya anu buri Bɛnyamɛ bɔnsɔn kɔrɔ bawo anu lara anu ta-nyɔgɔnnu na minnu dogonnɛ Kibiya soela foolɛ rɔ.

³⁷ Kɛlɛ-dan minnu dogonnɛ nun Kibiya soela foolɛ rɔ, wonu burimatoe nara soe wo bira-a-la ka a kasara.

³⁸ Isirɛla bɔnsɔn tɔnkɔn kelan minnu ya anu buri, wonu ya a fɔ anu ta-nyɔgɛnu ye minnu dogonnɛ Kibiya soela foolɛ rɔ ko, “Ni ma ya ta-sisi yen yɛlɛla soe kuma tumɛ min,

³⁹ ma si ma ya-lamunun ka na anu kɛlɛ.” Wo wati ya a taran, Bɛnyamɛ bɔnsɔn-mɔgɛnu bara mɔgɔ bi-sawa (30) nyɔgɔn faga Isirɛla bɔnsɔn tan-ni-kelan rɔ. Wo wati rɔ, anu yili latɛgɛnɛ ye a fɔla ko, “Ma ara anu nɔ iko a fɔlɔtɛ.”

⁴⁰ Wo kɔma, ta-sisi-wɛ yɛlɛta anuna soe kuma. Bɛnyamɛ bɔnsɔn-mɔgɛnu ya anu yɛ lasɛgi tumɛ min, anu tɛrɛnara tɛ la anuna soe wo kuma.

⁴¹ Isirɛla bɔnsɔn tan-ni-kelan wonu sɛgira anu kan kɔma. Bɛnyamɛ bɔnsɔn-mɔgɛnu kumakɔra kilan bolo bawo anu bara a lɔn ko anu bi nala fagala le.

⁴² Anu ya anu buri Isirɛla bɔnsɔn tan-ni-kelan wo kɔrɔ ka wularɔ-kilɛ bira kɔnɔ anu ma ke bɔla anu bolo tɔ. Anu taranta kɛlɛ-kurun filɛ tɛma ha anu ya ale Bɛnyamɛ bɔnsɔn lato.

⁴³ Bɔnsɔn tan-ni-kelan kɛnu ya kurɔn mini Bɛnyamɛ bɔnsɔn-mɔgɛnu ma. Anu faga-koe ma gbɛlɛya anu kuma lefan! Anu ya nɔ-ko sɔrɔn anu ma Kibiya soe tele-bɔɛ wara la.

⁴⁴ Kɛlɛ-kurugbɛ minnu bi Bɛnyamɛ bɔnsɔn rɔ, anu ya wonu mɔgɔ waga tan-ni-segin (18,000) faga nyɔ rɔ.

⁴⁵ A toe wonu ya anu buri ka ta kan tinɛ do rɔ Rimɔn farɛ dafɛ wulɛ rɔ. Wonu burimatoe ye tala nyɔ, anu ya mɔgɔ waga loli (5,000) faga anu tɔ kilɛ la tun. Isirɛla kɛlɛ-dannu tara anu sagaranna ha Kidɔm soe burɔ. Anu ya mɔgɔ waga fila faga (2,000) anu tɔ tun kilɛ wo la.

⁴⁶ Bɛnyamɛ bɔnsɔn kɛlɛ-kurugbɛ minnu fagara wulɔn tele kelan, wonu yatɛ bɛnta mɔgɔ waga mogan-ni-loli (25,000) ma.

⁴⁷ Mɔgɔ kɛmɛ wɔrɔ (600) pe wonu denu kera anu burila ka ta ha Rimɔn farɛ wo dafɛ wulɛ rɔ. Karɛ nani wonu siginɛ nyɔ.

⁴⁸ Isirɛla bɔnsɔn tan-ni-kelan kɛnu yisi ma sa. Anu sɛgira basanna Bɛnyamɛ nyamanɛ la. Anu ya mɔgɛ bɛɛsi faga, kei wo, musi wo, anubɛ anuna kolo-fannu. Anu ya anuna soe bɛɛsi mintan tɛrr Bɛnyamɛ nyamanɛ rɔ.