Kɛlɛ-Kurugbɛnu 19 - ALLALA KUMƐ

Lifayi Mɔgɛ Do anubɛ A Fɛ-Sigi-Musi Wara-Koe

¹ Wati wo ya a taran, mansa mumɛ sa Isirɛla mɔgɛnu bolo anuna nyamanɛ rɔ. Lifayi mɔgɛ do siginɛ Ifɛrɛm kɔnkɔ-nyamanɛ rɔ wula-yan la. A ya sunkurɔn do bi Bɛtalehɛm soe burɔ Yuda nyamanɛ rɔ ka wo ma a fɛ-sigi-musi la.

² Lunyɛ do, musi wo yisi bɔra ala kei kuma ka ta a fa warɛ Bɛtalehɛm. Karɛ nani a siginɛ a fa warɛ.

³ Wo kɔma, kei wo bɔra Ifɛrɛm nyamanɛ rɔ ka ta a fɛ-sigi-musi wo sagaran a fa warɛ. A sɔgɛ ye a la, a ni ta kuma-diyamɛ fɔ a fɛ-sigi-musi ye alako a ni sɛgi a warɛ bɔn la tun. A ya sofɛlɛ fila bi anubɛ ala wɔli-kɛlɛ. Anu tara. Anu ke a biran-kei warɛ Bɛtalehɛm soe burɔ, a fɛ-sigi-musi wo ya anu nabɛn ka anu yiya bɔn la. A biran-kei ya a yen tumɛ min, a nyagalenta a la ka a kɔndɔn bolo-nyimɛ-kɛ.

⁴ A biran-kei ya anu nasɛgi. Tele sawa, wonu bi a gba ma. A ya anu yiya ka anu de-nyini.

⁵ A tele nani nyɔgɛ sɔgɔma subaga, anu ya anu nasɔ. Anu bi anu mabɛnna tumɛ min, a biran-kei ya a fɔ a ye ko, “A to, wo ni wo da raka. Wo wa ban, wo ni na to tala.”

⁶ Anu kɛmɔgɔ filɛ sigira ka fen-dɔn-kɛ ka anu min. Anu ban, a biran-kei ya a madiya tun, a ko, “I yandi, bi su kelan ki n fɛ yan. N ni i ladiya.”

⁷ Anu kira. Banda kara. Anu ko anu ni ta. A biran-kei ya a madiya alako anu ni to a fɛ fɔlɔn. Anu kira tun.

⁸ A tele loli nyɔgɛ banda-ka-da-pinpi ma, anu ya anu nasɔ. Anu ko anu ni ta. A biran-kei ya a fɔ ko, “Fen-ni dɔn. Tele rɔ, i ni ta.” Anu ya fen-dɔn-kɛ anu nyɔgɔn fɛ.

⁹ Anu ban fen dɔnla tele rɔ, keinubɛ a fɛ-sigi-musi anubɛ ala wɔli-kɛlɛ wonu wulita. A biran-kei ko, “Wurɛla-tumɛ le wara ke kɛ la. Min fisa, ki yan bi. N ni i ladiya. A la sa mɛla finna tun. Sina i si suru tala i warɛ.”

^10-11 Kɔnɔ sundan wo ma sɔn ki-koe ma nyɔ tun. Wo ya a fɛ-sigi-musi bi anubɛ ala wɔli-kɛlɛ anubɛ ala sofɛlɛ filɛ, kirikɛ ye anu kɔ tɛma. Anu tara. Anu tara furr! Anu bi kela Yɛbusinuna soe ma Yerusalɛm tumɛ min, suyi ara gbɛrɛn. Ala wɔli-kɛlɛ wo ko, “Ma ti ki Yɛbusinuna soe kɛ burɔ yan bi?”

^12-13 A tigi ko, “Ma ti ki mɔgɛnu tɛma ni Isirɛla mɔgɛnu ma minnu na. Ma ta doni. Ma si ki Kibiya soe burɔ, ni wo ma, Rema soe.”

¹⁴ Anu tenbira Yebusinuna soe wo la. Anu kera Kibiya soe tele-kolo-wulan ma. Kibiya soe kɛ, Bɛnyamɛ bɔnsɔn-mɔgɛnuna soe do le.

¹⁵ Anu ya kilɛ boloka ka ta ki nyɔ. Anu ke soe burɔ, anu sigira soe wo tɛma kɔnɔ mɔgɔ-wo-mɔgɔ ma anu yiya.

¹⁶ Anu bara mɛ sigini nyɔ gbɛ! Kɛmɔgɛ do min telenta wɔlila ala sɛnɛ rɔ, wo nara anu taran nyɔ wurɛ la. Ifɛrɛm kɛ le wo la nun kɔnɔ a bɔra nyɔ le ka na a sigi Kibiya soe wo burɔ Bɛnyamɛ bɔnsɔn-mɔgɛnu tɛma.

¹⁷ Kɛmɔgɛ wo ya sundan wonu kɔndɔn ka anu manyinika ko, “Wole bɔra mintɔ? Wo ye tala mintɔ?”

¹⁸ Lifayi kei wo ko, “Ma bɔra Bɛtalehɛm le. Ma ye sɛgila ma warɛ wula-yan la Ifɛrɛm kɔnkɔ-nyamanɛ rɔ. Mɔgɔ ma ma yiya yan.

¹⁹ Mala dɔn-fannu bi ma bolo, hali mala sofɛlɛnu de-nyini fannu. Kɔnɔ hali wo, mɔgɔ ma ma yiya wɛ. Ma makoe ye fan minnu na, wonu bi ma bolo.”

²⁰ Kɛmɔgɛ wo ko, “Hali wo ma ki luyi ma soe tɛma. Wo warɛ le n barɛ la. Wo dunɛ si to nde kuma.”

²¹ A ya anu bi ka ta anu na a warɛ bɔn la. A ya anuna sofɛlɛ wonu de-nyini ka yi di ala sundannu ma. Anu ya anu kiannu maku ka fen-dɔn kɛ.

Kemini-Karagbɛlɛnu Wara-Koe

²² Anu bi nyɛrɛ-ladiyɛ wo kun na, kemini-karagbɛlɛ donu nara kurɔn mini bɔn wo ma. Anu bi dɛ matugula anu ma. Anu bi a fɔla kɛmɔgɛ wo ye ko, “Kei min donta i kuma, a labɔ ma ma. Ma ni ma sa a fɛ.”

²³ Kɛmɔgɛ wo bɔra luyi ma anu bara, a ko, “N bɔnu, wo yandi, wo kana ko-yogoma-su kɛ ma. Koe minnu ma daga, wo kana wonu ma nna sundan la.

²⁴ Yanni wo ni wo ma, wo ni a to, n ni nna den-sunkurun-nasɔlɔnɛ anubɛ kei wo fɛ-sigi-musi labɔ wo ma. Min ba diya wo ye, wo si wo ma wonu na. Kɔnɔ wo kana ko-yogoma-su kɛ ma nna sundan la.”

²⁵ Keminɛ wonu ma sɔn anu tole masɔla kɛmɔgɛ wo la. Lifayi-kei wo ya a fɛ-sigi-musi wo labɔ anu ma luyi ma. Anu kira anu sala musi wo fɛ ka miliya-ko-su bɛɛ ma a la ha bandɛ kara. Banda-ka-dɛ ma, anu ya a boloka.

²⁶ Musi wo ya a lasɔ ka ta a yiyɛ magbenna. A gbɛrɛn kɛmɔgɛ wola bɔn ma, a buira bonda-dɛ rɔ. A tora sani nyɔ ha banda kara.

²⁷ Ala kei wo ya a lasɔ min kɛ sɔgɔmɛ wo rɔ, a ya dɛ laka alako a ni ta a warɛ. A ya a fɛ-sigi-musi wo sanɛ taran bonda-dɛ rɔ. A ya a bole lagburunɛ taran tinadakalɛ kuma.

²⁸ A ya a fɔ a ye ko, “I lasɔ. Ma ni ta.” Kɔnɔ musi wo ma fenfen fɔ. Kei wo ya a fɛ-sigi-musi wo furi bi ka a kiri ala sofɛlɛ kɔ tɛma. Anu tara anu barɛ.

²⁹ A ke a warɛ, a ya muri bi ka musi wo ratɛgɛtɛgɛ ka a soge sigi sigi-tina tan-ni-fila la. A ya a sigi kelen-kelan bɛɛsi lata Isirɛla bɔnsɔn kelen-kelan bɛɛ ma.

³⁰ Minnu ya wonu yen, wonu ko, “Kebi ma bɔra Iyipiti ka na yan, ha bi, ma ma kɛ nyɔgɔ rayen bɛ. Kɛ rakolɔn ti to wo nya fufafu! Fɔ ma wa koe do ma kɛ rɔ.”