Kɛlɛ-Kurugbɛnu 17 - ALLALA KUMƐ

Isirɛla Mɔgɛnu Kɔndɔfili-Koe Alla Bato-Koe Rɔ

¹ Kei do ye nyɔ, a tɔgɔ Maika. A siginɛ Ifɛrɛm kɔnkɔ-nyamanɛ rɔ.

^2-3 A ya a fɔ a na ye ko, “Kankan min ya ila wodi-gbɛ waga kelen kɛmɛ kelen (1,100) kankan, i ya wo danka, ado n ya i dankali-kɛ-kan lamɔɛn. Woletɔ i ma ila wodi-gbɛ wo yen? Nde le ya a bi.” A ya wodi-gbɛ wo don a na bolo tumɛ min, a na ya a fɔ a ye ko, “Nna den, alamɛ i ya Marita duwɛ sɔrɔn. Min si dankɛ kɛ bɔ nna dan kɛ kuma, n si nna wodi-gbɛ kɛ dantɛgɛ Mari ma. Ma si kɔlɔma-malɛsɛnɛ do bi ka wodi-gbɛ lalee ka a sa a ma. Wo ni ma mata bɛsɛ la.”

⁴ A ban wodi-gbɛ wo donna a na bolo tumɛ min, siyaki min bi wɔlɛ wo kɛla, a na ya wodi-gbɛ-gbu kɛmɛ fila bi ka a don siyaki wo bolo. Siyaki ban bɛsɛ wo ladanna wodi-gbɛ wo la, anu tara a lamara Maika wola bɔn la.

⁵ Maika kɛ, kan-tinɛ do ye a bolo a si ala bɛsɛnu kɔ kan min. Fɔlɔnfalan do lamaranɛ a bolo nyɔ, min manɛ iko saraka-masɔlɛtɛ. Wo kɔma, a ya bɛsɛ do ladan fanan ka wo lamara bɔn wo la. A ya ala dan do yabɔ ka wo ma saraka-masɔlɛ la a nyɛrɛ ye.

⁶ Wo wati ya a taran, mansa sa Isirɛla mɔgɛnu bolo. Woletɔ Isirɛla mɔgɛ bɛɛsi ye anu diyana-koe mala wo wati rɔ.

⁷ Wo wati rɔ, Lifayi bɔnsɔn keminɛ-mɛsɛ do siginɛ Bɛtalehɛm soe burɔ Yuda nyamanɛ rɔ.

⁸ A bɔra nyɔ ka ta a sigi-tina-kura nyini-tinɛ. A ye a sigi-tina-nyinɛ kɛ la, a tara Maika kɛla bɔn la Ifɛrɛmta kɔnkɔ-nyamanɛ rɔ.

⁹ Maika ya ale keminɛ manyinika a bɔ-tinɛla ko ma. A ko, “Lifayi bɔnsɔn-mɔgɛ do le nde la ka bɔ Bɛtalehɛm soe burɔ Yuda nyamanɛ rɔ. N bi n sigi-tina-nyinɛ le la.”

¹⁰ Maika ko, “Nba, to nde fɛ yan. Ile si ma n hɛnkili-kɔlɛ la ka saraka-masɔ-wɔlɛ kɛ n ye. San-bo-san, n si wodi-gbɛ-gbu tan di i ma anubɛ i fɛrɛya-bɔɛ anubɛ i beli-fan.”

^11-12 Lifayi-keminɛ wo sɔnta a sigi-koe ma a fɛ. Maika ya a ma ala saraka-masɔlɛ la ka a bira iko ala dan. Lifayi-keminɛ wo tora sigini Maika fɛ bɔn la.

¹³ Maika ya a fɔ a nyɛrɛ ma ko, “N bara Lifayi bɔnsɔn-mɔgɔ-bɛrɛbɛrɛ sɔrɔn min si ma n halalɛ la ka saraka-masɔ-wɔlɛ kɛ n ye. Fɔ Mari wa n wara-koe lata yarɔ.”