Kɛlɛ-Kurugbɛnu 15 - ALLALA KUMƐ

Samsin Ma-Koe Kɛlɛ-Kurugbɛ La

¹ Fui-fen-tɛgɛ-wati kenɛ, Samsin ya baa-bulan do bi ka ta wo la ala musi kɔndɔn tinɛ. A ya a fɔ a biran-kei ye ko, “A ma, n ni ta nna musi yen bɔn la.” A biran-kei ma sɔn,

² a ko, “N ya a lɔn ko nna den ma di i ye, wo le ya a to, n ya a di i ta-nyɔgɛ ma. I ma a dɔgɔ-sunkurɔn yen? Wo kin ale ko pirr! I ti wo furu?”

³ Samsin ya a fɔ a ye ko, “N ba ko-wo-ko ma wole Filisitinu na gbɛ, anu ti anu tɛgɛ sigi nde ma wo rɔ tun.”

⁴ A tara fira-wulu kɛmɛ sawa bira. A ya wonu kɔɛ kiri fila-filanyɛ ma ka kala-kirinu kiri anu kɔma kilɛ la.

⁵ A ya tɛ tugu kala-kiri wonu na ka fira-wuli wonu nagbengben Filisitinuna sɛnɛnu tɔ. Tɛ ya anuna sɛnɛ bɛɛ mintan, a tɛgɛni wo, a tɛgɛbɛli wo, hali anuna nɔnbɔ-kurinu anubɛ anuna ki-fannu.

⁶ Filisitinu tora ta-tugulɛ wo nyinina. Tɔ-a-la, anu ya a lɔn ko Samsin gbɛ le bawo a biran-kei, Filisiti Timina kɛmɔgɛ, kɔni, wo ya ala dunmusi bi a bolo ka a di ale Samsin ta-nyɔgɛ ma. Woletɔ Filisitinu ya anu kundɛn ka ta kei wo anubɛ ala dunmusi wo mintan bɔn la.

⁷ Samsin ya a fɔ anu ye ko, “E, wo ara a ma ka le? N ti n fara wo la fɔ n ba ban n tayili sarala wo la feufeu!”

⁸ A kɛra anu ma wuyan, ka anu siyaman faga. Wo kɔma, a tara mɛ Itam faran la.

Filisitinu Kɛlɛ-Koe Samsin Bolo

⁹ Filisitinu nara ka anu daga makɛ Yuda nyamanɛ rɔ. Anu nara Gbaga-Gbaga-Koloya mɔgɛnu tagbɛrɛn.

¹⁰ Yuda bɔnsɔn-mɔgɛnu ya anu manyinika ko, “Nfenna wo ye ma kɛlɛla?” Filisiti wonu ko, “Ma nara Samsin bira tinɛ ka ma tayili sara a la iko a ya min ma ma la nya min.”

¹¹ Yuda bɔnsɔn-mɔgɔ waga sawa tara Samsin taran Itam faran la. Anu ya a fɔ a ye ko, “I wara nfen ma ma la kɛ la? I ma a lɔn ko ma ye Filisitinu denu kɔrɔ, wa?” Samsin ya a fɔ anu ye ko, “N ya a ma Filisiti wonu na le dɔrɔn iko anu ya a ma n na nya min.”

¹² Yuda bɔnsɔn-mɔgɛ wonu ko, “Ma nara yan ka i kiri ka i don anu bolo.” Samsin ya a fɔ anu ye ko, “Wo ni lanyiri kiri n ye ni wole ti na n faga.”

¹³ Anu ya a fɔ a ye ko, “Male ti i faga! Ma ye i kirila le ka i don Filisitinu bolo.” Anu ya yili-kura fila bi ka a kiri wonu na lɛnlɛn! Anu ya a labɔ faran la.

¹⁴ Anu ke Gbaga-Gbaga-Koloya soe ma, Filisitinu burimatoe le nara a magbenna. Anu bi sɛrɛn-sɛrɛnna a ma. Marita sɛnbɛ yigira Samsin kuma. A ya fanka sɔrɔn. A ya yili wo ratɛgɛ a bole ma iko yesekari-lamurunnɛ.

¹⁵ A ya sofɛlɛ gbaga-gbaga-kole sanɛ yen. A ya wo bi ka Filisiti mɔgɔ waga kelen faga wo la.

¹⁶ Samsin ya sigi sa, a ko, “N bara sofɛlɛ gbaga-gbaga-kole bi ka mɔgɔ waga kelen faga wo la. Wo kɔma, n ya anu suyi ladɛn kan-tina fila anu nyɔgɔn kuma iko sendi sofɛlɛ gbaga-gbaga-kole wo la.”

¹⁷ Wo kɔma, a ya kole wo lakɛ a rɔ. Kɛ bɛɛsi mara kan tinɛ min tɔ, anu nara nyɔ kele ko “Gbaga-gbaga-kolo-kɔnkɛ.”

¹⁸ Ale Samsin kan lagbalata dɔgɔma-ma-de! A ya Mari rakele, a ko, “I wara a ma, n bara mɔgɛ kɛnu nɔ bi. Kɔnɔ n kan la ara gbala nya min kɛ la, Filisiti-kemininyabɛlɛ kɛnu si na n suyi taran kɔrɛ, yɔ!”

¹⁹ Alla ya dugu punsɔgɔ Gbaga-Gbaga-Koloya nyɔ. Yi bɔra duk! Samsin ya yi wo do min tumɛ min, a niyi sara a fɛrɛ rɔ ka sɛnbɛ sɔrɔn. Anu ya nyɔ kele ko, “Keleli Kɛlata tenke.” Ha bi, tenke kɛ ye Gbaga-Gbaga-Koloya.

²⁰ San mogan kɔrɔ, Samsin ye kɛlɛ-kurugbayɛ la Isirɛla mɔgɛnu kun na wo tumɛ anu bi Filisitinu kɔrɔ.