Kɛlɛ-Kurugbɛnu 13 - ALLALA KUMƐ

Samsin Sɔrɔn-Koe

¹ Isirɛla mɔgɛnu bilara Mari la ka hakɛ kɛ tun. Mari sɔnta ko anu ni to Filisitinu kɔrɔ san bi-nani.

² Dan bɔnsɔn-mɔgɛ do min siginɛ Sora soe burɔ, a tɔgɛ Manowa. Gbandɛ le ala musi la nun.

³ Mari bɔra gbɛ rɔ melikala muninyɛ rɔ musi wo ye. A ko, “Gbandɛ le ile la kɔnɔ a ti mɛ tun, i si buyi bi ka den-kei sɔrɔn.

⁴ A ma i fɛrɛma. Fenfen min si mɔgɔ kun tafin, i kana wo min. I kana fenfen dɔn min sɛninyani ma iko tɔn ya a fɔ nya min.

⁵ I kana ila dan wo kunyɛ matɛgɛ mumɛ bawo yanni a ni sɔrɔn, a dantɛgɛnɛ Mari ma iko Nansarannu. Ale fɔlɔn si Isirɛla mɔgɛnu kunka ka anu bɔ Filisitinu bolo.”

⁶ Wo kɔma, musi wo tara a fɔ ala kei ye ko, “Mɔgɛ do ara na ka bɔ Alla wara. A makilannɛ iko Allala melika. N ma a manyinika a bɔ tinɛla ko ma, ado a ma a tɔgɛ fɔ n ye.

⁷ A ya a fɔ n ye ko a ti mɛ tun, n si buyi bi ka den-kei sɔrɔn. A ko fenfen min si mɔgɔ kun tafin, n kana wo min. N kana fenfen dɔn fanan min sɛninyani ma bawo yanni dan wo ni sɔrɔn, a ko a dantɛgɛni de Mari ma iko Nansarannu ha a si faga.”

⁸ Musi ban wo fɔla, Manowa ya Mari madiya, a ko, “I yandi Mari, n bara i madiya. Ila mɔgɛ wo lana tun. A ni na ma karan dan wo makolo bole la.”

⁹ Alla ya Manowa kan wo lamɔɛn. A ya melika wo lana tun. Melika wo ya Manowala musi taran sɛnɛ rɔ kɔnɔ ale Manowa sa nyɔ.

¹⁰ Musu-burimatoe tara a fɔ ala kei ye ko, “Kei min nara n bara wulɔn, a ara na tun de!”

¹¹ Manowa ya a lasɔ. A bilara ala musi fɛ ka kei wo taran. A ya a manyinika ko, “Ile le kumara nna musi la wulɔn?” A ko, “Ɔn.”

¹² Manowa ko, “Alamɛ i kan wo bɔra a la. Kɔnɔ dan wo wa sɔrɔn, a si ko-su-nyamintan ma? A ti nyamintan ma?”

¹³ Marita melika ya a fɔ a ye ko, “Ila musi ni a ma iko n bara a fɔ a ye nya min nun.

¹⁴ Fenfen min bɔnɛ kirepu nɔnbɔ-kuri la, a kana wo gbɔɛ dɔn. Fenfen min si mɔgɔ kun tafin, a kana wo min anubɛ ka fen dɔn min ma sɛninya. A ni a ma iko n bara a fɔ a ye nya min.”

^15-16 A ya a fɔ kei wo ye ko, “I ka ta bɛ min na. A to, n ni baa-bulan do faga i ye ka a te.” A ya wo fɔ bawo a ma a lɔn melika la. Melika wo ko, “Ni n tora yan, n ti ila fen dɔn. Kɔnɔ yanni i ni a te, a ma saraka-mintantɛ la Mari ye.”

¹⁷ Manowa ya a fɔ a ye ko, “A ma, ma ni i tɔgɛ lɔn woletɔ i kan wa bɔ-a-la tumɛ min, ma si i gbiliya.”

¹⁸ Melika ya a manyinika, a ko, “N tɔgɛ-lɔn-sɔgɛ ye i la kama? N tɔgɔ nya ti yen wo bolo.”

¹⁹ Manowa ya baa-bulan wo bi anubɛ dɛgɛ-munke do. A ya anu sa farɛ do kuma ka anu ma saraka-mintantɛ la Mari ye. Manowa anubɛ ala musi yɛ tora gbalani sarakɛ wo la, kabana-koe do mara.

²⁰ Ta-mɛlan ye yɛlɛla san ma tumɛ min, melika wo, Mari, kɔni, wo yɛlɛta ta-mɛlan wo rɔ san-kole rɔ. Manowa anubɛ ala musi ya anu naburun a ma dugi ma.

²¹ Manowa ya a lɔn wati wo le tɔ ko melika le. Anu ma melika wo yen tun.

²² Manowa ya a fɔ ala musi ye ko, “Ma ye fagala le serr, bawo ma ara Alla yen ma yɛ la.”

²³ Kɔnɔ ala musi wo ya a fɔ a ye ko, “Ni ma faga-sɔgɛ le ye Mari la nun, a ti sɔn mala saraka-mintantɛ kɛnu na ma bolo nun. A ti kabana-ko-siyamɛnu yira ma la. A ti tolo-tadiya-kumɛ kɛ fɔ ma ye nun.”

²⁴ Wo kɔma, Manowala musi ya buyi bi ka den-kei sɔrɔn. A ya a tɔgɔ sa Samsin. Dan wo koloyara. Mari duwara a ye.

²⁵ Marita sɛnbɛ yigira Samsin kuma kɛlɛ-dannuna dagɛ rɔ Sora soe anubɛ Ɛsateyoli soe tɛma Dan nyamanɛ rɔ.