Kɛlɛ-Kurugbɛnu 1 - ALLALA KUMƐ

Bɛsɛki Mansɛ Nɔ-Koe

¹ Yasowata fagɛ kɔmɛ, Isirɛla mɔgɛnu ya Mari manyinika, anu ko, “Ma bɔnsɔn nyamintan fɔlɔn si ta Kenan kɛ-toenu kɛlɛ tinɛ?”

² Mari ya a fɔ anu ye ko, “Yuda bɔnsɔn-mɔgɛnu fɔlɔn ni ta. N si sɛnbɛ di wonu ma, anu ni anu nɔ. Anuna nyamanɛ si ma anutɛ la.”

³ Yuda bɔnsɔnnu ya Simiyɔn bɔnsɔnnu kele, anu sigi-nyɔgɛnu, kɔni. Anu ko, “Wo ta ma dɛnbɛ Kenan kɛ-toenu kɛlɛla minnu siginɛ mala nyamanɛ kɛ rɔ. Ma wa ban anu kɛlɛla, male fanan si ta wo dɛnbɛn kɛlɛ-kɛ-tinɛ wola nyamanɛ rɔ.” Woletɔ Simiyɔn bɔnsɔn bilara Yuda bɔnsɔn fɛ kɛlɛ rɔ.

⁴ Mari ya sɛnbɛ di anu ma kɛlɛ rɔ. Anu ya Kenan kɛnu anubɛ Perasanu nɔ. Anu ya kei mɔgɔ waga tan (10,000) faga Bɛsɛki soe burɔ.

⁵ Anu ya Bɛsɛki mansɛ taran nyɔ ka a kɛlɛ tumɛ min,

⁶ mansɛ wo ya a buri kɔnɔ a ma mɛ, kɛlɛ-dannu ya a bira. Anu ya a bolo-gbungburu-wɛnu anubɛ a kin-gbungburu-wɛnu tɛgɛ a la.

⁷ Ale mansɛ ya a fɔ anu ye ko, “Nde fanan bara mansa bi-wɔrɔnfila bolo-gbungburu-wɛnu anubɛ anu kin-gbungburu-wɛnu tɛgɛ anu na nun. Mansɛ wonu tora dɔn-fen-pɛrɛnu denu matɔnbɔnna nna tebulu kɔrɔ. Kɔnɔ n ya min ma wonu na, Alla ara wonu denu tayili sara n na kɛ la.” Anu tara ale mansɛ la Yerusalɛm, a fagara kan min.

Yerusalɛm Mɔgɛnu Nɔ-Koe Yuda Bɔnsɔn-Mɔgɛnu Bolo

⁸ Yuda bɔnsɔn kɛlɛ-dannu ya Yerusalɛm soe bira-a-la ka anu nɔ. Anu ya nyɔ-mɔgɛnu faga ka tɛ tugu soe wo la.

⁹ Wo kɔma, Kenan kɛ minnu siginɛ kɔnkɔ-nyamanɛ rɔ anubɛ kɔnkɔ-gburukulinu bi kan min, anu tara wonu kɛlɛ. Anu tara anu kɛlɛ tinɛ fɔ dugu la ha ka ke wula-da-rakolɔn rɔ.

¹⁰ Anu tara Kenan kɛ donu fanan kan ma Hiburɔn soe burɔ min tɔgɛ nun Araba. Kebila sawɛ minnu bi nyɔ, anu ya wonu nɔ, Sɛsayinu wo, Ahaimannu wo, anubɛ Talamayinu.

Diba Soe Nɔ-Koe Ɔtiniyɛli Bolo

¹¹ Yuda bɔnsɔnnu bɔra Hiburɔn soe ka ta Diba soe bira-a-la min tɔgɛ nun Sifa.

¹² Yuda bɔnsɔn-mɔgɛ do min tɔgɛ Kelabu, wo ko, “Ni kei min ya Sifa soe nɔ, n si nna dunmusi Akasa di wo ma.”

¹³ Kelabu dɔgɔ-keminɛ Kenasi, wola den-kei Ɔtiniyɛli wo ya Sifa kɛnu nɔ. Woletɔ Kelabu ya ala dunmusi Akasa di Ɔtiniyɛli ma iko a ya a fɔ nya min.

¹⁴ Lunyɛ do, Akasa siginɛ sofɛlɛ la, a tamatoe kei-wara-sigi rɔ, ala kei kumara a tole rɔ. A ko, “A fɔ i fa ye ko a ni kan-tina-gbɛrɛkɛ di ma ma ala nyamanɛ kɛ rɔ.” Akasa yigira sofɛlɛ la ka ta kuma a fa la. A fa Kelabu ya a yen wati min, a ya a manyinika ko, “I ye nyinina nfen ma?”

¹⁵ A ya a fɔ a fa ye ko, “I ya kan tinɛ min di ma ma, dugu-magbalanɛ le wo la. I ni kan-tina-nyima di ma ma tenkenu bi kan min.” A fa ya kan tinɛ do di anu ma kɔnkɔ-nyamanɛ rɔ tenkenu bi kan min. Tenke kelen bi kan tɔ, kelen bi dugu la.

Yuda anubɛ Bɛnyamɛ Bɔnsɔnnuna Kɛlɛ-Kɛ-Koe

¹⁶ Nɛbi Musa biran-kei min bɔra Kena bɔnsɔn rɔ, wo kegeyɛnu bilara Yuda bɔnsɔn-mɔgɛnu fɛ ka bɔ Tamaro Kɔrɔ ka ta anu sigi Yuda bɔnsɔn anubɛ Amalɛkinu fɛ dugu la wula-da-rakolɔn rɔ Aradi soe dafɛ.

¹⁷ Simiyɔn bɔnsɔn anubɛ Yuda bɔnsɔn kɛlɛ-dannu wulita Sifati soe kan ma ka ta Kenan kɛnu faga nyɔ. Anu ya soe wo tinya feu, ka a tɔgɔ sa “Kasara Soe.”

¹⁸ Anu ya so sawa bira-a-la ka a mɔgɛnu nɔ, Kesa wo, Asikilɔn wo, Ɛkirɔn wo anubɛ anu dafɛ-so-mɛsɛnɛnu.

¹⁹ Mari ya sɛnbɛ di Yuda bɔnsɔn ma. Anu ya kɔnkɔ-nyamanɛ damasi bi anu yogenu bolo kɔnɔ mɔgɛ minnu siginɛ lɛɛ rɔ, anu ma ke wonu gbenna bawo nɛgɛ-kirindinu bi wonu bolo.

²⁰ Anu ya Hiburɔn soe di Kelabu ma iko Musa ya lanyiri kiri a ye nya min nun. Kelabu ya Anaki kebila sawɛ gben nyɔ.

²¹ Kɔnɔ Yebusi minnu siginɛ Yerusalɛm soe burɔ Bɛnyamɛ bɔnsɔnta nyamanɛ rɔ, Bɛnyamɛ bɔnsɔn-mɔgɛnu ma wonu gben nyɔ. Yebusi wonubɛ Bɛnyamɛ bɔnsɔn-mɔgɛnu siginɛ nyɔ ka a bi wo wati ma ha kaka.

Bɛtɛli Soe Nɔ-Koe Ifɛrɛm Bɔnsɔn anubɛ Manasa Bɔnsɔn Bolo

^22-23 Mari ya Ifɛrɛm bɔnsɔn anubɛ Manasa bɔnsɔn dɛnbɛ. Anu tara Bɛtɛli soe kan ma min tɔgɛ nun Lusi. Anu bi soe wo manɛgɛnna tumɛ min, anu ya ko-lakɔrɔsilɛnu nata soe wo mafɛlɛn tinɛ.

²⁴ Wonu bɛnta kei do la min bɔnɛ soe wo burɔ. Anu ya a fɔ wo ye ko, “Ni i ya duguranya-kilɛ sa ma kɔrɔ, ma ti ko ma ile la.”

²⁵ Kei wo ya kilɛ yira anu na. Bɔnsɔn filɛ wonu tara mɔgɛ damasi faga soe wo burɔ kɔnɔ anu ya kei wonubɛ ala denbayɛnu boloka.

²⁶ Kɔnɔ tɔ-a-la, kei wo yirindira Hɛtinuna nyamanɛ rɔ. A ya soe do datɛgɛ nyɔ ka a tɔgɔ sa Lusi. Ha kaka, anu bi soe wo kelela wo nya.

Isirɛla Mɔgɛnu Ma Anu Yoge minnu Gben

²⁷ Manasa bɔnsɔn ma so-kun loli mɔgɛnu gben, Bɛti-San soe wo, Teyanaka soe wo, Dɔɔ soe wo, Ibiliyam soe wo, Magidɔ soe wo, anubɛ anu dafɛ-so-mɛsɛnɛnu. Kenan kɛnu sigini tora nyɔ

²⁸ kɔnɔ Isirɛla mɔgɛnu ya fanka sɔrɔn tumɛ min, anu ma ban Kenan kɛ wonu gbenna fɔ ka anu ma yɔɔnnu na.

²⁹ Ifɛrɛm bɔnsɔn-mɔgɛnu ma Kenan kɛnu gben Kisari soe burɔ. Kenan kɛ wonu sigini tora Ifɛrɛm bɔnsɔn-mɔgɛnu tɛma.

³⁰ Kenan kɛ minnu siginɛ Kitiron soe anubɛ Nahalali soe burɔ, Sɛbulɔn bɔnsɔn ma wonu gben. Woletɔ wonu tora yɔɔnyɛ rɔ Sɛbulɔn bɔnsɔn-mɔgɛnu kɔrɔ.

³¹ Asɛra bɔnsɔn-mɔgɛnu ma so-kun wɔrɔnfila mɔgɛnu gben, Ako wo, Saidon wo, Alabu wo, Akisibu wo, Hɛlaba wo, Afɛki wo, anubɛ Rihobu.

³² Wonu sigini tora Asɛra bɔnsɔn-mɔgɛnu tɛma bawo anu ma anu gben.

³³ Nafatali bɔnsɔn-mɔgɛnu ma so-kun fila mɔgɛnu gben, Bɛti-Simɛsi anubɛ Bɛti-Anati fɔ ka wonu ma anuna yɔɔnnu na.

³⁴ Amoranu ya kilɛ tɛgɛ Dan bɔnsɔn-mɔgɛnu ma ko anu ti yigi anuna lɛɛ rɔ. Dan bɔnsɔn-mɔgɛnu tora kɔnkɔ-nyamanɛ rɔ.

³⁵ Amoranu sigini tora Hɛrɛsa kɔnkɛla foolɛ rɔ anubɛ Aiyalɔn anubɛ Salibim soenu tɔ kɔnɔ tɔ-a-la, Ifɛrɛm anubɛ Manasa bɔnsɔnnu ya sɛnbɛ sɔrɔn ka Amora wonu ma anuna yɔɔnnu na.

³⁶ Akiribin kɔnkɛ ragbɛrɛnnɛ kan min, Amoranuna nyamani-dan ya a dabira nyɔ ka ta furr, ha ka ke Sela soe kɔma.