Kalesiya 1 - ALLALA KUMƐ

¹ Nde, Pɔli le ye kɛdi kɛ sɛbɛla, ado mɔgɔ ma n sɔ wɔlɛ kɛ la. Mɔgɔ ma n ma kilayɛ la fɔ Yisa Kirasiti anubɛ ma Fa Alla min ya Yisa lawuli ka bɔ furinu tɛma.

² Mabɛ ma na-kelen-nyɔgɔ dɛnkɛninya-mɔgɛ min bɛɛ ye yan, ma ye wole Kalesiya dɛnkɛninya-mɔgɛnu kɔndɔnna.

³ Alamɛ ma Fa Alla anubɛ ma Mari Yisa, Allata-Mɔgɔ-Yabɔnɛ ya hinɛ yira wo la ka yisi-kimɛ di wo ma.

⁴ Kirasiti ya ma Fa Alla sako kɛ ka a nyɛrɛ niyi ni male hakɛ-tiginuna ko la. A ya wo ma alako ma ni hɔrɔya wati-yogomɛ kɛ ma.

⁵ Gbiliyɛ ni to Alla ye habadan! Amina.

Kibara-Nyimɛ, Kelen De

⁶ N kawanɛ wole Kalesiya kɛnu ma! Wo ara Allata kilɛ boloka tiriya, ado ale le ya wo yabɔ ata hinɛ fɛ kɔnɔ wole lara ko-gbɛrɛkɛ la, anu bi min kelela ko kibara-nyimɛ.

⁷ Kɔnɔ kibara-nyima-gbɛrɛkɛ sa mumɛ! Mɔgɛ donu bi nyɔ minnu bi wo tɔrɔla. Anu bi anu tayala ka foninyɛ basan Kirasitila kibara-nyimɛ la.

⁸ Ni mɔgɔ ya kibara-nyima-gbɛrɛkɛ kawandili bɔ wo ye min faranɛ mala kawandili kɛ la, alamɛ a yilikira nyahanama rɔ pɔ! Hali male le ya wo ma, ni wo ma, melika ka bɔ Arinyɛni tɔ, alamɛ a yilikira.

⁹ Ma ara kɛ fɔ nun, ado kaka, n bi a fɔla tun. Ni mɔgɔ-wo-mɔgɔ ya kibara-nyima-gbɛrɛkɛ kawandili bɔ wo ye, alamɛ a yilikira nyahanama rɔ pɔ!

¹⁰ N sa n tayala ka mɔgɛ hɛnɛ koe kɛnu tɔ! N bi a fɛ ka Alla kelen pe le hɛnɛ. Wo miri ko n bi n tayala ka diya mɔgɛnu ye, wa? Ni n bi n tayala ka diya mɔgɛnu ye, n ti ma Kirasitila wɔli-kɛlɛ la nun mumɛ!

Pɔli Ma-Koe Kilayɛ La

¹¹ N na-kelen-nyɔgɛnu, n ni kɛ fɔ wo ye. N bi kibara-nyima-kawandili min bɔla, wo ma bɔ hadama-den-miriya rɔ.

¹² N ma a sɔrɔn mɔgɔ bolo, ado n ma wo karan mɔgɔ bolo. Yisa Kirasiti nyɛrɛ, wo le ya a labɔ gbɛ rɔ n ye.

¹³ N bi nya min nun, wo tumɛ n bi Yahudiyanuna dina rɔ, wo ya wo lɔn. N ya a lagbɛlɛya Allata chɔchi kuma nun dɔgɔma-ma-de, ado kinikini-wo-kinikini sa n tɔ nun anuna ko la fɔ anu kasara-koe.

¹⁴ N tenbira n ta-nyɔgɔn siyaman na Yahudiyanuna dina rɔ. Ma benbanuna namunyɛ hɔnya taranta n na bɛrɛkɛ!

¹⁵ Kɔnɔ yanni n ni sɔrɔn, Alla le ya n yabɔ ata hinɛ fɛ. A ya n kele ko n ni wɔlɛ a ye.

¹⁶ A ya a latɛgɛ ko a ni ala dan labɔ gbɛ rɔ n ye. A ko n ni ala kibara-nyima-kawandili bɔ wole sibolo-gbɛrɛnu ye, ado n ma ta mɔgɔ-wo-mɔgɔ wara alako n ni hɛnkili sɔrɔn.

¹⁷ Minnu mara kilayɛnu na n yarɔ nun Yerusalɛm, n ma ta wonu fanan bara. N tara Arebiya nyamanɛ le rɔ kelenna. Wo kɔma, n sɛgira Damasika soe burɔ.

¹⁸ San sawa wo kɔma, n tara Yerusalɛm ka kuma Pita ye. N tora a fɛ lɔgɔkun fila.

¹⁹ N ma kilaya-gbɛrɛ yen fɔ Mari Yisa dɔgɛ Yemesi.

²⁰ Alla le n sere la! N bi min sɛbɛla kɛ, tonyɛ le serr! N sa foninya fɔla.

²¹ Wo kɔma, n tara Siriya anubɛ Salesiya nyamanɛnu tɔ.

²² Wo wati bɛɛ kɔrɔ, dɛnkɛninya-mɔgɛ minnu bi Yudiya nyamanita chɔchinu tɔ, wonu ma n yen bɛ nun.

²³ Anu bi a lamɔɛnna le dɔrɔn ko, “Kei min ya a lagbɛlɛya ma kuma fɔlɔ-nun, a ye dɛnkɛninya-ko-kawandili bɔla kaka, ado a ya a raya ka mala dɛnkɛninyɛ wo tinya nun!”

²⁴ Woletɔ anu ya Alla tanto ndela ko la.