Yɔni 19 - ALLALA KUMƐ

¹ Nba, Pailɛti ya Yisa bi ka a lata a gbesi tinɛ.

² Kɛlɛ-dannu ya mansaya-fulɛ ladan wɔnɛ la ka a don a salɛ la. Anu ya duruki-yalawulan bila a kan na.

³ Anu nara a wara ka a mayɛlɛn, anu ko, “Yahudiyanuna mansɛ, alamɛ i mɛra!” Anu ya anu bole layigi a ma.

⁴ Pailɛti bɔra luyi ma tun ka a fɔ nyama ye ko, “Wo ni wo tole masɔ, n si a ma, anu ni Yisa labɔ wo ma alako wole fanan ni a yen ko n ma a yiliki-nya yen hali!”

⁵ Yisa bɔra luyi ma. Anu ya mansaya-fulɛ min nadan wɔnɛ la, wo donnɛ a salɛ la anubɛ duruki-yalawulan ye a kan na. Pailɛti ya a fɔ anu ye ko, “Wo ma a yen?”

⁶ Saraka-masɔla-wɛnu anubɛ Alla-Bato-Bon kandannɛnu ya a yen tumɛ min, anu ya a lasɔnkɔ ko, “A gbangban kɔlɔma ma! A gbangban kɔlɔma ma!” Pailɛti ya a fɔ anu ye ko, “Wole nyɛrɛ ni a bi ka ta a gbangban kɔlɔma ma. Nde ma a yiliki-nya yen hali!”

⁷ Yahudiyanu ya a yabi ko, “Mala tɔn ko fɔ a ni faga bawo a ara a nyɛrɛ ma Allatalata dan la.”

⁸ Pailɛti ya kɛ lamɔɛn tumɛ min, a kilanta ha ka a dan natenbi.

⁹ A donta bɔn la tun ka Yisa manyinika ko, “Ile bɔra mi?” Kɔnɔ Yisa ma fenfen fɔ.

¹⁰ Pailɛti ya a fɔ a ye ko, “I sa nyinina kumala n ye, wa? I yili ni to kɛ ko. Sɛnbɛ ye n bolo ka i boloka. Sɛnbɛ ye n bolo fanan ka i gbangban kɔlɔma ma.”

¹¹ Yisa ya a yabi ko, “Sɛnbɛ ye i bolo n kuma bawo Alla le ya wo di i ma. Woletɔ minnu ya n don i bolo, wonu hakɛ kolo itɛ ko.”

¹² Pailɛti ya kɛ lamɔɛn tumɛ min, Yisa boloka-sɔgɛ ya a bira kɔnɔ Yahudiyanu ya a lasɔnkɔ tun ko, “Ni i ya a boloka, Romu-nyamanita-mansa-wɛ diyana-mɔgɔ ma i la hali, ado ni min bi a nyɛrɛ mala mansɛ la, kun-tigi wo yoge le wo la, yɔ!”

¹³ Pailɛti ya kumɛ kɛnu namɔɛn tumɛ min, a ya Yisa labɔ luyi ma. A sigira kiti-tɛgɛ-waganɛ rɔ. Kan tinɛ wo tɔgɛ le ko, “Kilɛ min nadannɛ kurinu na.” (A tɔgɛ Hiburu-kan rɔ ko, “Kabata.”)

¹⁴ A tora doni, tele-latelan ni ke nun, yanni Kanan-Ko-Ladiyɛ ni ke wo banda kɛ. Pailɛti ya a fɔ Yahudiyanu ye ko, “Wo ma wola mansɛ yen!”

¹⁵ Anu ya a lasɔnkɔ tun ko, “A faga! A gbangban ka a faga kɔlɔma ma!” Pailɛti ya anu manyinika ko, “Wo ye a fɛ, n ni wola mansɛ gbangban kɔlɔma ma, wa?” Saraka-masɔla-wɛnu ya a yabi ko, “Mansa-gbɛrɛ sa ma bolo fɔ min bi Romu nyamanɛ kun na!”

¹⁶ Wo kɔma, Pailɛti ya Yisa don kɛlɛ-dannu bolo a gbangban-koe la. Kɛlɛ-dannu ya Yisa bi.

Yisa Gbangban-Koe Kɔlɔma Ma

¹⁷ Anu bi a gbangbanna kɔlɔma min ma, a nyɛrɛ ya wo duni ka ta a la ha ka ke kan tinɛ min tɔgɛ ko, “Kun-kole.” (A tɔgɛ Hiburu-kan rɔ ko, “Kɔlɔkata.”)

¹⁸ Anu ya a gbangban kɔlɔma ma nyɔ. Anu ya mɔgɔ fila fanan gbangban a dafɛ, kelen a bolo-nyimɛ rɔ, kelen a bolo-maran rɔ. Yisa tora anu tɛma.

¹⁹ Pailɛti ya fan do sɛbɛ walan ma ko anu ni a gbangban kɔlɔma ma a kun kan tɔ. Sɛbɛlɛ wo ko, “Yisa, Nasarɛti kɛ, Yahudiyanuna Mansɛ.”

²⁰ Yahudiya siyaman ya a karan bawo Yisa gbangbanta kɔlɔma ma kan min, wo fɛ ma yan soe la. A sɛbɛnɛ kan sawa le tɔ nun, Hiburu-kan anubɛ Latin-kan anubɛ Kiriki-kan.

²¹ Yahudiyanuna saraka-masɔla-wɛnu ya a fɔ Pailɛti ye ko, “I kana a sɛbɛ ko, ‘Yahudiyanuna Mansɛ.’ A sɛbɛ ko, ‘Ale le ko Yahudiyanuna mansɛ le ale la.’ ”

²² Pailɛti ya anu yabi ko, “N bara min sɛbɛ, wo ti yɛlɛma muk!”

²³ Kɛlɛ-dannu banta Yisa gbangbanna kɔlɔma ma tumɛ min, wo kɔma, anu ya ala kurɛnu fara sigi tina nani. Anu ya ala duruku-kɔrɔ-don fanan bi. Duruku-kɔrɔ-don wo, a dan-gbere sa, a kara-yili sa.

²⁴ Kɛlɛ-dannu ya a fɔ anu nyɔgɔn ye ko, “Ma kana a rafara wona. Ma ni korɔn lakɛ ala ko la. A si to min ye, ma ni wo lɔn.” Wo mara le alako min sɛbɛnɛ Allata kitabu rɔ, wo ni bɔ-a-la bawo a sɛbɛnɛ ko, “Anu ya nna kurɛnu fara anu nyɔgɔn tɛma ka korɔn lakɛ nna duruku-kɔrɔ-donla ko la.” Kɛlɛ-dannu denu ya wo le ma.

²⁵ Nba, minnu sɔnɛ Yisa faga-kɔlɔma kɔrɔ nun, wonu denu bi kɛnu na—a na Mariyama wo, wo na-kelen-nyɔgɔn-musi wo, Kaliyofala musi Mariyama wo, anubɛ Mariyama Magadala kɛ.

²⁶ Yisa ya a na sɔnɛ yen nyɔ anubɛ a diyana-karan-dan. A ya a fɔ a na ye ko, “N na, ila dan le kɛ la.”

²⁷ Wo kɔma, a ya a fɔ ala karan-dan wo ye ko, “I na le kɛ la.” Ka a dabira wo tumɛ ma, ala karan-dan wo ya Yisa na bi ka ta a la ala bɔn la. A ni ta to a fɛ nyɔ.

Yisa Faga-Koe

²⁸ Wo kɔma, Yisa ya a lɔn ko Alla ara wɔli min bɛɛ di a ma, a ara wo bɛɛ kanbali feu! A ko, “N kan la ara gbala.” A ya wo fɔ alako min sɛbɛnɛ Allata kitabu rɔ, wo ni bɔ-a-la.

²⁹ Miran do siginɛ nyɔ, wo lafanɛ gbɛɛ-kunayanɛ la. Anu ya kɔlɔli-munke layigi gbɛɛ wo rɔ ka a kimɛ. Anu ya kɔlɔli-munke sɔ kɔlɔma do kun na ka a layɛlɛ alako a ni ke Yisa dɛ ma.

³⁰ Yisa ya gbɛɛ wo min nya min, a ko, “Koe bɛɛ ara ban!” A ya a salɛ layigi ka a niyi latenbi a Fa ma.

³¹ Nba, Yahudiyanu ya Pailɛti madiya ko anu ni mɔgɛ wonu gbɛlannu takeri ka anu furinu nayigi kɔlɔmanu ma. Anu ya wo fɔ bawo Nyima le nun. Nba, anu sa a fɛ, furinu ni to kɔlɔma ma Sulen-Tele ma. Anuna Sulen-Tele-kolomɛ le wo la anu bolo.

³² Mɔgɔ filɛ minnu gbangbannɛ kɔlɔma ma Yisa dafɛ, kɛlɛ-dannu nara ka wonu kelen-kelennamɛ gbɛlannu takeri.

³³ Kɔnɔ anu kera Yisa ma tumɛ min, anu ya a yen ko a ara faga, woletɔ anu ma a gbɛlannu takeri.

³⁴ Hali wo, kɛlɛ-dan do ya tanbɛ bi ka Yisa sɔgɔ a tɔnkɔn rɔ. Yele anubɛ yi tugura anu nyɔgɔn fɛ.

^35-37 Kɛ bɛɛ mara nun alako min sɛbɛnɛ Allata kitabu rɔ, wo ni bɔ-a-la ko, “Hali a kolo kelen ra ti rakeri.” A sɛbɛnɛ fanan ko, “Anu ya ale min sɔgɔ, mɔgɛnu si wo mafɛlɛn.” (Kɛ bɛɛ mara min ya la, wo le ya wo bɛɛ rakaran. A ya min fɔ, wo bɛɛ tonyɛ le. A ya tonyɛ kɛ bɛɛ rakaran alako wo fanan ni dɛnkɛninya.)

Yisa Togon-Koe

³⁸ Wo kɔma, Yusufu min bɔra Arimatiya soe burɔ, wo ya Pailɛti madiya ko ni a si Yisa furi bi. (Nba, Yusufu wo, Yisala karan-dan do le wo la nun. Kɔnɔ a tora dogɔn rɔ bawo a kilannɛ Yahudiyanu na.) Pailɛti sɔnta ko a ni Yisa furi bi. Yusufu tara a layigi kɔlɔma ma ka ta a la.

³⁹ Nikodimasi, min tara Yisa yen suyi rɔ fɔlɔ-nun, wo tara Yusufu fɛ. Kɛnɛ-suma-diyamɛ dunu fila minnu tɔgɛ mira anubɛ alo, a ya wonu yabasan ka ta wo la a bolo.

⁴⁰ Mɔgɔ filɛ wonu ya Yisa furi sa kasankɛ rɔ ka kɛnɛ wonu kɛ a ma bawo Yahudiyanuna namu le wo la ka furinu togon.

⁴¹ Nba, anu ya Yisa faga kan min, ki-fannu bi nyɔ. Faran-kanba-kurɛ ye nyɔ, mɔgɔ ma sa wɛ min tɔ nun.

⁴² Nba, Sulen-Tele le wo banda kɛ la min kɛ, ado kanbɛ wo fɛ ma yan nyɔ la nun, anu ya Yisa togon nyɔ.