Yɔni 10 - ALLALA KUMƐ

Tili ka Bɛn Saga-Fɛ-Biralɛ Ma

¹ Yisa ko, “N bi tonyɛ fɔla wo ye, mɔgɔ min ti don saga-kulɛ la a dɛ la, fɔ ka yɛlɛ a ma kila-dogbɛrɛ fɛ, kankan anubɛ bui-ma-kɛlɛ le ale la.

² Kɔnɔ mɔgɛ min bi donna a dɛ la, saga-fɛ-biralɛ le wo la.

³ Da-kandannɛ si dɛ laka a ye. A wa ala sagɛnu kele anu tɔgɛ la tumɛ min, anu si a kan lamɔɛn. A si anu nabɔ.

⁴ A wa anu nabɔ tumɛ min, a si sɔ anu yarɔ, ado sagɛnu si bila a fɛ bawo anu ya a kan lɔn.

⁵ Anu ti bila mɔgɔ-gbɛrɛkɛ fɛ fɔ ka anu buri a kɔrɔ bawo anu ma a kan lɔn.”

Yisa, Saga-Fɛ-Birala-Nyimɛ

⁶ Yisa ya tili kɛ tɛgɛ anu ye kɔnɔ a ye min fɔ tinɛ, anu ma wo nya-yen.

⁷ Wo le ya a ma, Yisa ya a fɔ anu ye tun ko, “N bi tonyɛ fɔla wo ye, saga-kulɛla don-dɛ le nde la.

⁸ Min bɛɛ nara nde yarɔ, kankan le wonu na anubɛ bui-ma-kɛlɛnu. Kɔnɔ sagɛnu ma anu tole masɔ wonu kan la.

⁹ Nde le anu don-dɛ la. Min ba don nde fɛ, wo si kisi. A si ta-ni-sɛgi kɛ a de-nyini tinɛ.

¹⁰ Kankan sa nala fenfenna ko la fɔ kankanyɛ anubɛ fagalɛ anubɛ tinyalɛ. Nde nara alako anu ni ni-kurɛ sɔrɔn, ado anu si a sɔrɔn bui!

¹¹ “Saga-fɛ-birala-nyimɛ le nde la. Saga-fɛ-birala-nyimɛ si sɔn ka faga ala sagɛnuna ko la.

¹² Min bi a sarɛ birala dɔrɔn, mintan ma sagɛnu na, kɔni, saga-fɛ-birala-bɛrɛ ma wo la. Wo wa suluki yen nala tumɛ min, a si anu boloka ka a buri. Nba, suluki si sagɛ do bira ka a toenu tanyɛnsɛn.

¹³ Min bi a sarɛ birala dɔrɔn, wo si a buri bawo a ye a sarɛ nyinina dɔrɔn! Ala ko sa sagɛnuna ko rɔ.

^14-15 “Saga-fɛ-birala-nyimɛ le nde la. N Fa Alla ya nde lɔn nya min, nde fanan ya a lɔn wo nya le, ado n ya nna sagɛnu lɔn wo nya na le. Anu fanan ya nde lɔn. N si sɔn ka faga anuna ko la.

¹⁶ Saga-dogbɛrɛnu bi n bolo minnu sa saga-kulɛ kɛ rɔ. Fɔ n ni na wonu fanan na. Anu si anu tole masɔ n kan la. Wonu si ma kurun kelen na saga-fɛ-birala kelan wo kɔrɔ.

¹⁷ “N Fa Alla ya n keni bawo n si n niyi ni alako n ni a sɔrɔn tun.

¹⁸ Mɔgɔ-wo-mɔgɔ ti n niyi bi n bolo. N si n niyi ni n sako la. Sɛnbɛ ye n bolo ka n niyi ni. Sɛnbɛ ye n bolo ka a bi tun. N Fa Alla ara n sɔ kɛnu ma tinɛ.”

¹⁹ Nba, dan-nafarɛ kɛra Yahudiyanu tɛma tun kumɛ kɛnuna ko la.

²⁰ Anu siyaman ya a fɔ ko, “Nyinatoe le! A ara yuwaya! Mɔgɔ si a tole masɔ wo la nfenna?”

²¹ Kɔnɔ dogbɛrɛnu ya a fɔ ko, “Nyinato ti kuma ka! Nyinɛ si fiyɔn yɛ laka, wa?”

Yahudiyanu Ban-Koe Yisa La

²² Alla-Bato-Bɔn dantɛgɛ-tumɛ ma, wo ladiyɛ kɛra Yerusalɛm dafere-kima-wati le ma nun.

²³ Yisa ye tenbila nun tenbi-bolɔn la min tɔgɛ Mansa Silamɛnitɛ.

²⁴ Mɔgɛnu nadɛnnɛ ala foolɛ rɔ tumɛ min, Yahudiyanu ko, “I si sikɛ kɛ bɔ ma rɔ tumɛ nyamintan? I ni tonya-bɛrɛ fɔ ma ye. Alla ya mɔgɛ min yabɔ ma kisi-koe la, wo le ile la, wa?”

²⁵ Yisa ya anu yabi ko, “N bara ban wo fɔla wo ye nun kɔnɔ wo ma la n na. N ya kɛwɔlɛ minnu kɛ n Fala sɛnbɛ rɔ, kɛwɔlɛ wonu fanan bi sereyɛ bɔla nna ko la.

²⁶ Kɔnɔ wo ti la n na bawo nna sagɛnu ma wole la.

²⁷ Nna sagɛnu si anu tole masɔ n kan la. N ya anu lɔn, ado anu si bila n fɛ.

²⁸ N si habadan-nimayɛ di anu ma. Anu ti halaki mumɛ! Mɔgɔ-wo-mɔgɔ ti ke anu fɔrɔnna n bolo.

²⁹ N Fa Alla min ya anu don n bolo, wo kolo bɛɛ ko. Nba, mɔgɔ-wo-mɔgɔ ti ke anu fɔrɔnna n Fa Alla bolo.

³⁰ Mabɛ n Fa, kelen de ma la.”

³¹ Yahudiyanu ya kurinu bi tun ko ka a mabon.

³² Yisa ya a fɔ anu ye ko, “N Fa ya n sɔ ka kɛwɔli-nyimɛ siyaman kɛ wo ye. Wo ya wonu yen serr! Kɛwɔli-nyimɛ kɛ bɛɛsi rɔ, wo ye nyinina n mabonna nyamintanna ko la?”

³³ Yahudiyanu ya a yabi ko, “Ma sa i mabonna ila kɛwɔli-nyima-fenfenna ko la. Ma ye i mabonna bawo i ye Alla lafɛyala! Mɔgɛ le ile la dɔrɔn kɔnɔ i ye i nyɛrɛ mala Alla la!”

³⁴ Yisa ya anu yabi ko, “A sɛbɛnɛ wola tɔn-kitabu rɔ ko Alla ko Allala Dannu de wole la.

³⁵ Ma ya a lɔn ko min sɛbɛnɛ Allata kitabu rɔ, tonyɛ le wo la tɛban! Nba, Allala kumɛ dira mɔgɛ minnu ma, Alla ya a fɔ wonu ma ko Allala Dannu.

³⁶ Nba, nde don! N Fa ya n sɛninya ka n sɔ duninya kɛ rɔ. N ya a fɔ min kɛ ko Allala dan le nde la, wo ye a fɔla kama worɔ ko n bi n ya-donna Alla la?

³⁷ Nba, ni n sa n Fala kɛwɔlɛnu kɛla nun, wo kana la n na worɔ.

³⁸ Kɔnɔ ni n ya n Fala kɛwɔlɛnu kɛ, a bɛnta, wo ni la kɛwɔli wonu denu na. Wo ni la wonu na, hali wo ma la nde la. Wo si a lɔn worɔ ko n Fa ye nde rɔ. Nde fanan bi ale rɔ.”

³⁹ Anu ya anu taya a bira-koe ma tun kɔnɔ a tununta anu ma ka ta a ye.

⁴⁰ Wo kɔma, Yisa tenbira Yorodan bɛ kɔma tun, Yɔni ya batasili kɛ kan min nun. A tora nyɔ.

⁴¹ Mɔgɔ siyaman nara a wara nyɔ. Anu ko, “Yɔni ma kabana-ko-wɔli fenfen kɛ kɔnɔ a ya koe min bɛɛ fɔ kei kɛla ko la nun, tonyɛ le.”

⁴² Mɔgɔ siyaman dɛnkɛninyara a ma nyɔ.