Isikiyɛli 8 - ALLALA KUMƐ

Bɛsi-Kɔ-Koe Yerusalɛm Soe Burɔ

¹ Mala biralɛ san wɔrɔ nyɔgɛ a karɛ wɔrɔ nyɔgɛ wo tele loli nyɔgɛ ma, wulɔn tele ma, mabɛ Yuda mɔgɔ-biranɛnuna kun-tiginu siginɛ n barɛ bɔn la nyɔ. Tiriyante wo rɔ, n Tigi Mari Allata Sɛnbɛ yigira n kuma.

² N ya n yɛ layɛlɛ san ma. N ya hadama-danla muninyɛ yen ta-mɛlan rɔ. Ka a bi a tɛmɛ ma ka yigi, wo manɛ iko tɛ. Ka a bi a tɛmɛ ma ka yɛlɛ, wo ye malan-malanna iko sila-yesinɛ.

³ A ya fan do lana n bara la min manɛ iko bole. Wo ya n bira n kun-sigi ma. Nna ko-rayirɛ kɛ rɔ, Allata Sɛnbɛ ya n nayɛlɛ san ma ka ta n na Bato-Bɔn mafɛlɛn-tinɛ Yerusalɛm soe burɔ. A ya n nadon Bato-Bon-kata kantɛ-don-dɛ la, bɛsɛ sɔnɛ kan min, ado wo wara-koe gbo Alla ye.

⁴ N bi nyɔ tumɛ min, n ya Allata wan-takani-belebele-wɛ yen min bi a yirala ko Isirɛlata Alla ye nyɔ. N ya wan-takanɛ kelan wo le yen Kiba bɛ dafɛ ko-rayirɛ rɔ nun.

⁵ Alla ya a fɔ n ye ko, “Ile hadama-dan, i yɛ lata kantɔ-wara la.” N yɛ-latɛ nyɔ, n ya bɛsɛ yen sɔni min gbo Alla ye dɔgɔma-ma-de! A ye saraka-mintan-tinɛ dafɛ don-dɛ wara la.

⁶ Alla ya a fɔ n ye ko, “Ile hadama-dan, i wara a yen min bi mala? I wara a yen Isirɛla bɔnsɔn-mɔgɛnu bi ko-kɔsɔni-sufa min nadanna? Ko-sufa kɛnu denu bi a mala, n ni n bɔ nta kan-tina-sɛnimɛ kɛ rɔ feufeu! Nba, i si ko-yogomɛ yen anu bolo kɛ rɔ min tenbira kɛ la.”

⁷ A tara n sɔ kata-tenbi-bolɔn la. N ya kata burɔtɛ dandan wo punsɔgɔnɛ yen.

⁸ A ya a fɔ n ye ko, “Ile hadama-dan, woe wo lakoloya kata kɛ ma, i ni tenbi.” N ya woe wo lakoloya, yaga, don-dɛ ye nyɔ.

⁹ A ko, “Don, i ni a yen anu bi ko-yogoma-su minnu kun na kata burɔ.”

¹⁰ N donta. N ma fenfen taran dandan ma nyɔ fɔ duguma-fannuna muninyɛ anubɛ sogo-haramunɛnuna muninyɛnu anubɛ Alla gboyana-bɛsɛnu Isirɛla bɔnsɔn-mɔgɛnu bi minnu kɔla.

¹¹ Isirɛla bɔnsɔn-mɔgɔ-ba bi-wɔrɔnfila ye nyɔ. Safanla den Yeyasanaya ye anu tɛma. Isɛnti-mintan-fannu bi anu kelen-kelennamɛ bolo. Ta-sisi ye bɔla isɛnti wonu tɔ min sumɛ diyanɛ.

¹² Alla ya a fɔ n ye ko, “Ile hadama-dan, i wara Isirɛla bɔnsɔn-kun-tiginu yen anu bi min kɛla dogon rɔ? Anu dama ye bɛsɛnu kɔla. Anu bi a fɔla ko, ‘Alla ya sa ma la. A ara a ban mala nyamanɛ la.’ ”

¹³ Wo kɔma, Alla ya a fɔ n ye tun ko, “Nba, i si anu yen koe do kun na tun min yogo kɛ fanan ko.”

¹⁴ A tara n na Bato-Bɔn kantɔ-don-dɛ la. A ya musinu yira n na. Wonu bi dila anuna bɛsɛ do la min tɔgɛ Tamusa.

¹⁵ Wo kɔma, a ya n manyinika ko, “Ile hadama-dan, i wara wo yen? N bi nala fan do yirala i la min yogo wo fanan ko.”

¹⁶ A tara n na kata burɔ. N ya mɔgɔ mogan-ni-loli yen saraka-mintan-tinɛ anubɛ Bato-Bɔn don-dɛ tɛma. Anu kan-kɔ sɔnɛ Bato-Bɔn la. Anu yɛ lamununnɛ tele-bɔɛ la ka tele bato.

¹⁷ Mari ya n manyinika ko, “Ile hadama-dan, i wara wo yen? Anu bi ko kɔsɔnɛ min bɛɛsi mala yan tɔ wo, anu bi karagbɛlɛyɛ ranyɛnsɛnna nyamanɛ rɔ nya min wo, wo dɔrɔn sa Yuda bɔnsɔn-mɔgɛ kɛnu wasala. Anu bi sɛgila nala ko-yogomɛnu kɛla Bato-Bɔn la yan tɔ tun. Kɛ le dama ara n kɔrɔtɔ dɔgɔma-ma-de! N nanyini-koe gbansan, anu bi bɔla wonu denu na yan tɔ.

¹⁸ Anu si na nna yisi-bɔɛ dan-natɛgɛ lɔn. N ti kinikini anu ma. N ti anu to anu niyi la. Hali anu ya anu dɛ sa-a-rɔ n madiya-tinɛ, n ti anu denkun.”