Isikiyɛli 7 - ALLALA KUMƐ

Isirɛla Ban-Wati Ke-Koe

¹ Mari ya a fɔ nde, Isikiyɛli ye ko,

² “Ile hadama-dan, nde, wo Tigi Mari Alla ye nala min fɔla Isirɛla mɔgɛnu ye, wo le kɛ la. Isirɛla nyamanɛ mumɛ lato-wati ara ke.

³ “Wole Isirɛla mɔgɛnu laban-wati ara ke. Wo si nna yisi-bɔɛ lɔn ka a tɛgɛ wo ara min ma. Wo ara kisimiriya-koe minnu nadan, n bi wo sarala wonuna ko la.

⁴ N ti n yɛ labelen wola hakɛnu kuma ka kinikini wo ma. N ti wo to wo niyi la. Fɔ n ba wo tɔrɔ ka a tɛgɛ wola kisimiriya-koenu ma woletɔ wo si a lɔn ko Mari le nde la.

⁵ “Nde, wo Tigi Mari Alla ko halaki-su-siyaman si to sigila wo la.

⁶ A ara ban. Woletɛ ara ban. Kuma sa wole ma tun.

⁷ Wole min siginɛ Isirɛla nyamanɛ kɛ rɔ, wo lato-wati ara ke. Wo ti ladiya-wo-ladiya kɛ tun wola bɛsi-kɔ-tinɛnu tɔ kɔnkɛnu kuma fɔ halakiyi tun!

⁸ “A ti mɛ tun, wo ye nala nna diminyɛ bɛɛ yenna. Wo ara kasarɛ anubɛ kisimiriya-koe minnu nadan, n bi nala wole kitila ka wo yili sara wo la.

⁹ N ti n yɛ labelen wola hakɛ ma ka kinikini wo ma. N ti wo to wo niyi la. Fɔ n ba wo tɔrɔ ka a tɛgɛ wola kisimiriya-koenu ma alako wo ni a lɔn yati, ko Mari le nde la. Fɔ wo wa a lɔn de ko wo tɔrɔlɛ le nde la.

¹⁰ “Halakiyi ye nala wole Isirɛla mɔgɛnu ma. Wo ara karagbɛlɛyɛ dan-natenbi. Wo ara wasɛ dan-natenbi.

¹¹ Wola karagbɛlɛyɛ ara sɛgi wo ma iko gbeleka-kundi. Wola fen-kolomɛ wo, wola kinyɛ wo, wola gbiliyɛ wo, wo bɛɛ si tunu yen!

¹² “Wati ye nala kɔɔ! Fen-sannɛnu kana nyagalen anuna tɔnɛla ko la. Fen-mayiralɛnu yisi kana tɔrɔ anuna bɔnɛla ko la bawo nde, Marita tɔrɔyɛ si taran anu bɛɛ kuma nya-kun-kelen.

¹³ Tuluma-tigi ti ke ala tulumɛ kunkala bawo anu filɛ siyi-fɛ ti yanya. Nna yisi-bɔɛ ko rayen ye mɔgɛ bɛɛ kuma. Mɔgɔ-wo-mɔgɔ siyi-fɛ ti ke yanyala ka a tɛgɛ anu hakɛnuna ko ma.

¹⁴ Hali kɛlɛ-buri wa fɛ alako kɛlɛ-dannu ni anu tabɛn yɔnyɔn, mɔgɔ-wo-mɔgɔ ti ta kɛlɛ rɔ bawo nna diminyɛ ye Isirɛla mɔgɛ bɛɛ kuma nya-kun-kelen.”

Isirɛla Mɔgɛnu Tɔrɔ-Koe Anu Hakɛla Ko La

¹⁵ Mari ya a fɔ nde, Isikiyɛli ye ko, “Kɛlɛ ye belenna soe kɔma. Kirayɛ anubɛ kɔnkɛ ye soe burɔ. Minnu bi binyɛ rɔ, wonu kunyɛ ye tola kɛlɛ rɔ. Minnu bi soe tɛma, kirayɛ anubɛ kɔnkɛ ye wonu maforongbanna.

¹⁶ Minnu bi bɔla folenu tɔ ka anu buri kɛlɛ kɔrɔ, wonu si ta kɔnkɛnu tɔ. Anu si to dila nyɔ iko purulan ka a tɛgɛ anu hakɛla ko ma.

¹⁷ Mɔgɛ bɛɛ bole ra si faga. Anu kunbelannu si to gbesila anu nyɔgɔn na kumakɔɛ bolo.

¹⁸ Anu si kasa-kurɛnu don anu kan na yakɔrɔ-mamɔɛ bolo. Anu si yɛrɛyɛrɛn kilan bolo ka anu kunyɛnu gbana miliyɛ bolo.

¹⁹ Anu si anuna sɛnɛ anubɛ anuna wodi-gbɛnu nakɛ a rɔ luyinu ma iko bin-gbalɛ bawo nde, Mari wa wuli anu tɔrɔla, wo fenfen ti ke anu kunyɛ bɔla a rɔ. Fen-kolomɛ wonu ti anu mako nyinya. Anu buyi la ti fa wonu na, ado anuna sɛnɛ anubɛ anuna wodi-gbɛ, wonu denu ya anu nadon hakɛ rɔ.

²⁰ Wati donu tɔ nun, anu wasinɛ anuna dugu-kɔrɔ-nɔnfulinu tɔ kɔnɔ anu ya wonu denu bi ka wonu ma anuna bɛsi-yogoyanɛnu makiri-fan la. Woletɔ Mari ara a ma, anuna fen-kolomɛnu bara gboya anu ye.”

²¹ Mari ara a fɔ n ye ko, “N si a ma, sundannu ni wo kankan. Telenbɛlɛnu si wola nɔnfuli toronde wo la ka anu nadon kulufu-kalafa-koenu tɔ.

²² Hali sundan wonu ba n Bato-Bɔn konko-don-dɛ keri ka nyɔ latinya, n ya lata tina ma.

²³ “Kɔndɔfili ye kan-tinɛ bɛɛ rɔ. Fagalɛ dɔrɔn, wo le nyamanɛ rɔ. Soenu nafanɛ karagbɛlɛyɛnu denu na.

²⁴ Sibole minnu wunduyogo hoo, n si wonu natugu wo ma ka wola bɔnnu bi wo bolo. Sibolo-gbɛrɛnu ba wola bato-tinɛnu natinya, n si a ma, wola kolo-gbɛlɛnu yigi si tɛgɛ gbede!

²⁵ Yigi-tɛgɛ ye nala. Wo si yisi-kimɛ nyini kɔnɔ wo ti a sɔrɔn dɛɛ!

²⁶ Tɔrɔyɛ do tenbi banna, do ye nala. Yisi-tinya-kumɛ ye nala dɛɛ! Wo si to wola nɛbinu madiyala alako anu ni to yarɔ-koenu fɔla wo ye kɔnɔ anu ti wo kɔntɔ-diya-kuma fenfen fɔ. Wo karan-fen fenfen ti taran wola saraka-masɔlɛnu bolo. Hɛnkili-wo-hɛnkili ti taran wola kun-tiginu na.

²⁷ Wola mansɛnu si to dila. Anuna dannu kumakɔnɛ si to. Mɔgɛ bɛɛ ra si maga kilan bolo. N si wo tɔrɔ ka a tɛgɛ wo ara minnu ma. N si wo kiti iko wo duruta doinu kitila nya min. Wo si a yira wo la wo rɔ ko Mari le nde la.”