Isikiyɛli 6 - ALLALA KUMƐ

Mari Ban-Koe Bɛsi-Kɔ-Koe Ma

¹ Mari ya a fɔ n ye ko,

² “Ile hadama-dan, i ya-lamunun Isirɛla kɔnkɛ kɛnu na ka nna kilayɛ lake anu ma.

³ A fɔ anu ye ko anu ni anu tole masɔ nde, Mari kuman-kan la. A kɔnkɔ-layan-ba wo, a gburukulu wo, a folo wo, a lɛɛ wo, anu ni anu tole masɔ nde, anu Tigi Mari Alla kan la. Mɔgɛnu bi bɛsɛnu kɔla kan minnu tɔ anu tɛma, n bi kɛlɛ lanala ka nyɔnu halaki.

⁴ Anuna saraka-mintan-tinɛnu si tii mɛmɛ! Hali isɛnti mintan tinɛ, wonu fanan si tii. A kɔlɛnu fanan si faga anuna bɛsɛ wonu yakɔrɔ.

⁵ N si Isirɛla mɔgɛnu furi yuluyulu belenna nyɔ. N si anu kolenu tanyɛnsɛn saraka-mintan-tinɛ wonu dafɛ.

⁶ Isirɛla soe bɛɛ si halaki pɔ! Wo si a ma, saraka-mintan-tinɛnu anubɛ bɛsɛnu si tinya pɔ! Anuna isɛnti mintan tinɛnu si tii mɛmɛ! Anu bara min bɛɛsi ladan, wonu si tunu yen!

⁷ Mɔgɛnu si faga da-wo-da. Minnu bi tola anu niyi la, wonu si n lɔn Mari la yati!

⁸ “N si a ma, donu ni bɔ muri kɔrɔ ka anu tanyɛnsɛn sibolo-gbɛrɛnu tɛma.

⁹ Minnu si to biralɛ rɔ nyɔ rɔ, wonu si anu miri n ma. Anu si a lɔn yati, ko nde le ya anu tɔrɔ ka anu nayarabi bawo bɛsi-kɔ-koe diyara anu ye nde bato koe ko, ado anu bara anu kan-kɔ sɔ nde la. Anu si tɛgɛ anu nyɔgɔn tɔ kasikasi, ka a tɛgɛ anuna wunduyogoyɛ anubɛ kisimiriya-koenu ma.

¹⁰ Anu si a lɔn yati, ko Mari le nde la, ado tolon-ko ma nna kawandilɛnu na.”

¹¹ N Tigi Mari Alla ya a fɔ nde, Isikiyɛli ye ko, “I bole sa i kuma ka i kiannu matɛn di-kɛ-tinɛ bawo Isirɛla bɔnsɔn-mɔgɛnu bara kisimiriya-ko-siyaman ma. Kɛlɛ wo, kɔnkɔ wo, kiraya wo, anu kunyɛ si to wo dama rɔ.

¹² Minnu bi wula-yan la, kirayɛ le tala wonu na. Minnu bi i dafɛ, wonu kunyɛ si to kɛlɛ rɔ. Minnu bi tola anu niyi la, kɔnkɛ le wonu natola. Anu dama si a lɔn n yisi-bɔɛ ye nya min.

¹³ Anu bi isɛnti mintanna anuna bɛsɛnu ye kan min bɛɛ rɔ, a kɔnkɔ-layan-ba kuma wo, a gburukulu kuma wo, a kɔlɔma-kuru-wa kɔrɔ wo, a kɔlɔma-nɔrɔnni kɔrɔ wo, furinu ta si nyɛnsɛn bɛsɛ wonu damala foolɛ rɔ. Wo wa ma, bɛɛ si a lɔn worɔ ko Mari le nde la.

¹⁴ Tonyɛ le wo la. N si n bole lata ka anuna nyamanɛ tinya. Ka a bi anuna wula-da-rakolɔn dugu la, ha ka ta a sigi Ribila soe kan tɔ pon, Isirɛla mɔgɛnu siginɛ kan tinɛ min bɛɛ rɔ, n si wo bɛɛ halaki pɔ! Mɔgɛ bɛɛ si a lɔn worɔ ko Mari le nde la.”