Isikiyɛli 48 - ALLALA KUMƐ

Nyamanɛ Tala-Koe Sibolenu Tɛma

^1-7 Mari ya a fɔ tun ko, “Nyamanɛ-kantɔ-waralɛ-dan ye a dabirala Mɛdetereniyan kɔgɔ-yi ma ka ta tele-bɔɛ wara la furr, ha Hɛtilɔn soe ka tenbi Hamati kɔnkɔ-gbɛran la. A si bɔ nyɔ ka ta Hesa-Inan soe ha ka ta ke kan-tinɛ do ma min bi Damasika anubɛ Hamati nyamanɛnu tɛma. Sibole bɛɛ ni ata dugi sɔrɔn ka a bi tele-bɔɛ waralɛ-dan ma ka a sigi Mɛdetereniyan kɔgɔ-yi la. Ka a bi a kantɔɛ ma ka yigi, Dan bɔnsɔn fɔlɔn ni atɛ sɔrɔn, wo kɔma, Asɛra bɔnsɔn. Asɛra bɔnsɔn tatugunnɛ le Nafatali bɔnsɔn la. Nafatali bɔnsɔn tatugunnɛ le Manasa bɔnsɔn la. Manasa bɔnsɔn tatugunnɛ le Ifɛrɛm bɔnsɔn la. Ifɛrɛm bɔnsɔn tatugunnɛ le Rubɛn bɔnsɔn la. Rubɛn bɔnsɔn tatugunnɛ le Yuda bɔnsɔn la.

Dugu-Latankanɛ Wara-Koe Nyamanɛ Tɛma

⁸ “Dugi min tugunnɛ Yuda bɔnsɔntɛ la, dugu-latankanɛ le wo la. Wo kɔnɛ ni ma mɛli tan. Nyɔ-lɔngbɔn anubɛ Isirɛla bɔnsɔn toetɛ rakɛn de! Bato-Bɔn ye sɔla dugu-latankanɛ kɛ le tɔ.

⁹ “Dugu-latankanɛ kɛ tɛma, kan-tinɛ do dantɛgɛnɛ nde, Mari ma. A lɔngbɔn, mɛli tan, a kɔnɛ, mɛli segin.

¹⁰ Saraka-masɔlɛnu si anutɛ sɔrɔn dugu-sɛnimɛ kɛ rɔ. Ka a bi tele-yigi waralɛ ma ka ta a sigi tele-bɔɛ waralɛ la, anuna dugi si ma mɛli tan. Ka a bi kantɔ-waralɛ ma ka ta a sigi dugula-waralɛ la, anuna dugi si ma mɛli nani na. Nta Bato-Bɔn ye tola dugi kɛ le tɛma den!

¹¹ Dugu-sɛnimɛ kɛ ye Sedoki kebilɛ saraka-masɔlɛnu denu ye. Isirɛla mɔgɛ toenu ya ko-yogomɛ ma tumɛ min, anubɛ Lifayi bɔnsɔn toenu, Sedoki kebilɛ kɛ le dɔrɔn ya anu natelen n ye. Anu ma kofu doinu ma wulɔn.

¹² Anuta dugi si tugun Lifayi bɔnsɔntɛ la, ado wo si sɛninya ka tenbi dugi toe bɛɛ la.

¹³ Wo kɔma, Lifayi bɔnsɔnta dugi si tugun saraka-masɔlɛnutɛ la dugu la. Ka a bi tele-bɔɛ ma ha tele-yigi, wo si mɛli tan bɔ. Ka a bi kantɔ ha dugu la, a si mɛli nani bɔ.

¹⁴ Dugi min dantɛgɛnɛ nde, Mari ma, dugi wo tenbira dugi bɛɛ la nyamanɛ wo rɔ. Hali a pɛtɛrɛ-kundini ma ti yira, ado a ma ti felen fanan, ani a ti bɔ n bolo mumɛ! Nyɔ sɛnima, ado nde, Mari halalɛ le.

¹⁵ “Dugu-latankanɛ min tonɛ, wo sɛninyani ma. A ye nyɔ-mɔgɛ bɛɛ le ye. A lɔngbɔn, mɛli tan, a kɔnɛ, mɛli fila. Anu si to dugi wo rɔ ka nyɔ ma kolo-fen de-nyini-tinɛ la. Yerusalɛm soe si taran dugi wo tɛma den!

¹⁶ A tonko nanɛ kelen-kelennamɛ-bɛɛ bɛnnɛ nunkan-nya waga nani, ani nunkan-nya kɛmɛ loli (4,500).

¹⁷ Gbɛkole ye soe wola foolɛ rɔ min kɔnɛ nunkan-nya kɛmɛ fila ani nunkan-nya bi-loli (250).

¹⁸ Anu ban soe wo sɔla dugu-sɛnimɛ wo dugulɛ rɔ, dugi toe wo min tonɛ, wo si ma so-burɔ-mɔgɛnuna sɛni-sa-tinɛ la. A lɔngbɔn, mɛli nani, a kɔnɛ, mɛli fila. Dugi min bi soe tele-bɔɛ wara la, wo le nyɔgɔn fanan bi tele-yigi wara la.

¹⁹ Mɔgɔ-wo-mɔgɔ taranta soe wo burɔ, a mara bɔnsɔn wo bɔnsɔn na, a bɛnta, a ni sɛnɛ sa dugi wo rɔ.

²⁰ “Woletɔ dugu-latankanɛ wo si to sigisɔn wo tɛma den! A lɔngbɔn anubɛ a kɔnɛ, mɛli tan, ado Yerusalɛm soe wo ye sigisɔn wo le tɔ.

^21-22 “Bato-Bɔn dugi wo, saraka-masɔlɛnuta dugi wo, Lifayi bɔnsɔnnuta dugi wo, soe ye dugi min tɔ wo, wonu bɔnɛ dugu-latankanɛ wo ma, a toe, mansɛtɛ le wo la. Dugi wo ye tala tele-bɔɛ wara la ha ka ke a dan ma. Dugi wo ye tala tele-yigi wara la ha ka a labila Mɛdetereniyan kɔgɔ-yi ma. Yuda bɔnsɔn ye nyɔ-kantɔɛ-waralɛ rɔ. Bɛnyamɛ bɔnsɔn ye nyɔ-dugula-waralɛ rɔ.”

Bɔnsɔn Toenuta Dugi Wara-Koe

^23-27 Mari ko, “Dugu-latankanɛ kɛ dugu la, bɔnsɔn toe kelen-kelennamɛ-bɛɛ ni ata dugi sɔrɔn kɛ rɔ. Ka a dabira tele-bɔɛ waralɛ-dan ma, a si ta furr, ha Mɛdetereniyan kɔgɔ-yi. Ka a bi kantɔ ka yigi, Bɛnyamɛ bɔnsɔn tatugunnɛ le Simiyɔntɛ la. Simiyɔn bɔnsɔn tatugunnɛ le Isakaritɛ la. Isakari bɔnsɔn tatugunnɛ le Sɛbulɔntɛ la. Sɛbulɔn bɔnsɔn tatugunnɛ le Kaditɛ la.

²⁸ “Kadi bɔnsɔn dugula-dan-dabirɛ le Tama soe la. Dan wo le tara furr, ha Sɔnkɔ-Sɔnkɔ-Tenke min bi Kɛdɛsi soe dala. Wo kɔma, wo le bilara Iyipiti kɛnuna dan fɛ ka ta ke Mɛdetereniyan kɔgɔ-yi ma.”

²⁹ Ma Tigi Mari ko dugi kɛ tala-nya le kɛ la Isirɛla bɔnsɔnnu na.

Yerusalɛm Soe Don-Dɛ Wara-Koe

^30-34 Mari ko, “Tarɛ mininɛ Yerusalɛm soe tɔnkɔn nanɛ bɛɛ ma. A tɔnkɔn nanɛ kɛ bɛɛ nunkan-nya waga nani ani kɛmɛ fila. Don-da tan-ni-fila le ye tarɛ wo ma. Don-da sawa-sawa ye a tɔnkɔn bɛɛ ma. Isirɛla bɔnsɔn tan-ni-fila tɔgɛ le sɛbɛnɛ don-dɛ kɛ bɛɛ ma. Don-da sawɛ minnu bi kantɔɛ, wonu tɔgɛ le kɛnu na, Rubɛn, Yuda anubɛ Lifayi. Don-da sawɛ minnu bi tele-bɔɛ, wonu tɔgɛ le kɛnu na, Yusufu, Bɛnyamɛ anubɛ Dan. Don-da sawɛ minnu bi dugula wara la, wonu tɔgɛ le kɛnu na, Simiyɔn, Isakari anubɛ Sɛbulɔn. Don-da sawɛ minnu bi tele-yigi wara la, wonu tɔgɛ le kɛnu na, Kadi, Asɛra anubɛ Nafatali.

³⁵ Tarɛ wola foolɛ bɛnta mɛli wɔrɔ ma. Ka a dabira wati kɛ ma, soe kɛ si to kelela, ‘Mari ye yan.’ ”