Isikiyɛli 45 - ALLALA KUMƐ

Marita Niyi Isirɛla Nyamanɛ Rɔ

¹ Isirɛla nyamanɛ wa tala tumɛ min, bɔnsɔn bɛɛ ni atɛ sɔrɔn. Mari fanan ni atɛ sɔrɔn. Kan-tinɛ min bi tola Mari ye, wo lɔngbɔn mɛli tan, a kɔnɛ, mɛli segin. Marita dugi wo si ma kan-tina-sɛnimɛ la.

² Kan-tinɛ kɛ rɔ, dugi do si ma Bato-Bɔn sɔ-tinɛ la. Wo lɔngbɔn, nunkan-nya kɛmɛ loli, a kɔnɛ fanan, nunkan-nya kɛmɛ loli. Gbɛkole si to ala foolɛ rɔ min kɔnɛ nunkan-nya bi-loli.

³ Marita kan-tinɛ kɛ talɛ wa suman, a lɔngbɔn, mɛli tan, a kɔnɛ, mɛli nani. Bato-Bon-sɛnimɛ si taran nyɔ rɔ Sɛnima-Sɛnima-Tinɛ ye kan min.

⁴ Nyɔ si ma kan-tina-sɛnimɛ do la nyamanɛ wo rɔ. A talɛ wo si ma kan-tina-yabɔnɛ la saraka-masɔlɛnu ye minnu bi wɔli kɛla Mari ye Bato-Bɔn la. Anuna bɔnnu anubɛ Mari Bato-Bɔn si taran nyɔ.

⁵ Nyɔ-dugi toe si ma Lifayinutɛ la minnu bi wɔlila Mari ye Bato-Bɔn la a lɔngbɔn mɛli tan, a kɔnɛ mɛli nani. Anuna soenu si taran nyɔ.

⁶ Dugi min tugunnɛ Marita dugu-sɛnimɛ wo la, wo lɔngbɔn mɛli tan, a kɔnɛ, mɛli fila. Nyɔ si ma Isirɛla mɔgɛ donuna sigi tinɛ la.

Mansɛ Halala-Dugi Wara-Koe

⁷ Ka a bi kan-tina-sɛninyanɛ tele-yigi waralɛ ma ha ka ta a sigi Mɛdetereniyan kɔgɔ-yi la, nyamanɛ wo si to a dan na min si ma mansɛ halalɛ la. Wo kɔma, ka a bi kan-tina-sɛninyanɛ tele-bɔɛ waralɛ ma, ha ka ta a sigi nyamanɛ tele-bɔɛ dan la, wonu si ma mansɛ wo halalɛ la. Nyɔ-lɔngbɔn anubɛ Isirɛla bɔnsɔn-mɔgɛ toenutɛ rakɛn de!

⁸ Ni nyɔ tora mansɛ ye, wo si a ma, a ti a mɔgɛ toenu yakɔrɔ-mamɔ tun dugila ko la. Nyamanɛ toe si to Isirɛla bɔnsɔn-mɔgɛ toenu ye.

Mansɛta Sereyanu Bara-Koe

⁹ Ko-rayirɛ kɛ rɔ, ma Tigi Mari ko, “Wole Isirɛla kun-tiginu, wo ara mɛ hakɛ kun na. Wo ni wo fara mɔgɔ-tɔrɛ anubɛ karagbɛlɛyɛ la. Wo ni ko-telennɛ anubɛ ko-nyimɛ kɛ. Wole kun-tiginu, wo ni wo fara nta mɔgɛnu gbenna anuta nyamanɛnu tɔ.” Ale ma Tigi Mari kan le kɛ la.

¹⁰ A ko, “Mɔgɛ bɛɛ ni fen-suman-kɛ a kilɛ fɛ, yɔ!

¹¹ Fui-fannu anubɛ fen-yilamɛnu suman-nya ra ni kɛnya wo bolo. Pani-tan-kunan anubɛ pani-tan-digi ni ma sumanni-fen-bɛrɛbɛrɛ la. Pani-kunbɛ nya tan le bɛnnɛ pani-tan-kunan-nya kelan ma. Pani-kunbɛ-nya tan le bɛnnɛ pani-tan-digi-nya kelan ma fanan.

¹² “Wo wa fenna gbiliyɛ suman, wo dɔgɔmani mogan gbiliyɛ si bɛn a bɛnmata kelen ma. A bɛnmatɛ gbiliyɛ fanan bi-wɔrɔ si bɛn a kinama kelen ma. A kinamɛ-nya tanta gbiliyɛ anubɛ yi kalɔn kelanla gbiliyɛ rakɛn de!

^13-15 “A bɛnta, mɔgɛ ni to min dila ala mansɛ ma, wo suman-nya le kɛ la. Fui-fan bɔrɔ-kelen wo bɔrɔ-kelen, a ni pani-kunbɛ-nya kelen bɔ a la. A wa ala tuli suman kunan rɔ, a nya-kɛmɛ wo nya-kɛmɛ, a ni kelen bɔ a la ka a di mansɛ ma. A suman kunan-nɛ nya tan de bɛnnɛ kunan-ba kelen ma. Saga-kɛmɛ-fila wo saga-kɛmɛ-fila, a ni kelen bɔ a la ka a di mansɛ ma ka bɔ Isirɛla nyamanɛla kolo-fannu de-nyini-tinɛnu tɔ. “Kɛnu si ma kɔ-fan la, a fui-fen-saraka wo, a saraka-mintanta wo, anubɛ a yisi-kima-sarakɛ la. Mɔgɛnu si wonu bɔ alako anu hakɛnu ma si koto nya min. Nde, Isirɛla Tigi Mari kan le kɛ la.”

¹⁶ Isirɛla nyamanita-mɔgɛ bɛɛ ni kɛnu di anuta mansɛ ma.

¹⁷ A saraka-mintanta wo, a fui-fen-saraka wo, a minni-saraka wo, mansɛ wo le ye sarakɛ wonu bɔla Isirɛla mumɛ bɛɛ ye. Anu ba anu kundɛn Karɛ-Tele-Fɔlɛ-ladiyɛ rɔ anubɛ Sulen-Tele ma anubɛ ladiyɛ toenu ma, mansɛ wo ye tola sarakɛ wonu bɔla. Wo bɛɛ si ma Isirɛla hakɛ-yamatogon-fan la.

Ladiyɛnu Bara-Koe

¹⁸ Ma Tigi Mari ko, “San-karɛ-kurɛ, a tele fɔlɛ ma, wo ni tura kelen bɔ, fɛɛ sa min na ka wo ma Bato-Bɔn sɛninya-fan la.

¹⁹ Saraka-masɔlɛ si hakɛ-sarakɛ kɛ yele do bi ka a sisa Bato-Bɔn don-dɛ kankan-kiri-kɔnnu ma. Wo kɔma, a si do sisa saraka-mintan-tinɛ wo tonko nanɛ ma. Wo kɔma, a si do sisa Bato-Bon-luyi ma tenbi-bolɔn kankan-kiri-kɔnnu ma.

²⁰ Karɛ wo tele wɔrɔnfilɛ ma, a si wo sufa ma mɔgɛ bɛɛ ye, hali min ma hakɛ kɛ lawuli a ma, ado a sa a kalama. Ni wo ya wo ma, wo si a ma, Bato-Bɔn sɛninyanɛ ni to.

²¹ “Karɛ fɔlɛ, a tele tan-ni-nanɛ ma, wo si Lakanan-Koe Ladiyɛ fɔlɔ wulɔn. Tele wɔrɔnfila dɛgɛdɛgɛ, bɛɛ ye biredi-yɛlɛbɛlɛ dɔnna.

²² Ladɛn wo tele fɔlɛ ma, mansɛ si turɛ ma hakɛ-sarakɛ la anubɛ ala nyamanita-mɔgɛnu ye.

²³ Tele wɔrɔnfilɛ kɛ tele kelen-kelan bɛɛ ma, mansɛ wo si tura wɔrɔnfila anubɛ saga-yigi wɔrɔnfila ma saraka-mintantɛ la ka anu mintan gburr! Fɛɛ kana taran wonu fenfen na. Wo kɔma, tele-wo-tele, a si baa-kɔrɔn kelen bɔ ka wo ma hakɛ-sarakɛ la bɛɛ ye.

²⁴ A ye turɛ anubɛ saga-yigi minnu mala sarakɛ la, a ni dɛgɛ-munke pani-kunbɛ-nya tan-tan sa wonu kuma ka tuli kilasi-nya tan-ni-wɔrɔ tan-ni-wɔrɔ sa wo fanan kuma.

²⁵ “Lele-Sɔɛ-Ladɛn min bi a dabirala karɛ wɔrɔnfila nyɔgɛ, wo tele tan-ni-loli nyɔgɛ ma, mansɛ wo si wo nyɔgɔn saraka-mintantɛ anubɛ hakɛ-sarakɛ anubɛ dɛgɛ-munke anubɛ tuli bɔ iko a ya tele wɔrɔnfilatɛ ma nya min.”