Isikiyɛli 4 - ALLALA KUMƐ

Yerusalɛm Kɛlɛ-Ko-Tamasere Isikiyɛli Bolo

¹ Mari ya a fɔ n ye ko, “Ile hadama-dan, bɔnku-bulɔku bi. I ni a sigi i yakɔrɔ. I ni Yerusalɛm soela muninyɛ ladan a ma.

² Wo kɔma, ka a yira ko kɛlɛ ye soe burɔ, i ni denkɛnu sin ala foolɛ rɔ. I ni bɔnkɛ layɛlɛ a tarɛ ma. I si kɛlɛ-dagɛnu nadan ala foolɛ rɔ ka tarɛ-da-keri-kɔlɔmanu sɔ don-dɛnu dafɛ.

³ I ni nɛgɛ-walan do sɔ wobɛ so-ladannɛ wo tɛma sansanyɛ la. Soe wo min nadannɛ bulɔku wo ma i bolo, i ni i ya-lamunun wo la. Soe wo si taran de kɛlɛ kɔrɔ, ado a si ma iko ile le ye soe wo kɛlɛ tinɛ. I bolo gbɛ kɛnu si ma tamasere la Isirɛla mɔgɛnu ye.

^4-5 “Wo kɔma, i ni i sa i bolo-maran kuma. N si Isirɛla bɔnsɔn-mɔgɛnu bɛɛ hakɛ sigi i kuma. I si to sani nyɔ tele kɛmɛ sawa tele bi-kɔnɔntɔ (390) kɔrɔ. I ye tɔrɔla ka le anu hakɛla ko la. I ye tele kelen-kelan min bɛɛ bɔla nyɔ, wo si ma anu ma iko san kelen-kelen tɔrɔyɛ.

⁶ Wo wa ka-a-la, i ni i sa i bolo ma i bolo-nyimɛ kuma tele bi-nani (40) ka a tɛgɛ Yuda bɔnsɔn-mɔgɛnuna hakɛla ko ma. I ye tele kelen-kelan min bɛɛ bɔla nyɔ, wo si ma anu ma iko san kelen-kelen tɔrɔyɛ.

⁷ “I yɛ bɛn Yerusalɛm so-ladannɛ wo ma min bi kɛlɛ kɔrɔ. I tenbi wɔlɔyiya-kumɛ fɔla anu kan ma, i ye i bolo-lagbunɛ lamagala.

⁸ Wo kɔma, n si ile kiri woletɔ i ti i maga ha kɛlɛ si ka-a-la.

⁹ “Fui-fan donu bi, bɔlɔkɔ wo, bali wo, sɔsɛ wo, konse wo, fona wo, anubɛ kasakole. I ye wonu denu yabasanna ka wo lamara miran do rɔ alako ka a ma biredi la. I tenbi sani tele kɛmɛ sawa tele bi-kɔnɔntɛ (390) wo kɔrɔ, i ye wo le dɔnna.

¹⁰ Tele-wo-tele, i ni dɛgɛ-munke wo yi-lafɛ-nya kelen bi ka a ma biredi la i nyɛrɛ ye. I ye telenna wo le ma, i ye kila wo le ma, fɔ wo banda kɛ.

¹¹ Yi fanan yi-lafɛ fila pe, i ye wo le dɔrɔn minna tele kelen kɔrɔ a wati sanɛnu ma.

¹² I si to mɔgɛnu bo-gbalɛ madɛnna ka to tɛ kɛla a rɔ ka wo ma ila biredi kɛ mintan-fan la. I ni biredi wo ladan ka a dɔn mɔgɛ bɛɛ ya la sa!

¹³ Tamasere le kɛ la ko Isirɛla mɔgɛnu tenbi biralɛ rɔ nyamani-gbɛrɛnu tɔ, anu bi dɔn-fen-kɔsɔnɛnu dɔnna ka le.”

¹⁴ Kɔnɔ n ya Mari sɔsɔ, n ko, “N Tigi Mari Alla, i yandi, n kana wo ma. Ha bi, n ma n bole don bɛ ko-kɔsɔni ko rɔ. Ka a bi n dennɛ ma ha kaka, n ma yifɛ dɔn bɛ, ado ha bi, dɔn-fen-sɛninyabɛlɛ ma don bɛ n da rɔ.”

¹⁵ Woletɔ Mari ko, “Tana ma wo la. Yanni i ni mɔgɛnu bo-gbalɛ bi, n si a ma, i ni ninki nyɛ-gbalɛ bi ka ila biredi mintan wo la.”

¹⁶ Wo kɔma, a ko, “Ile hadama-dan, n bi nala kilɛ tɛgɛla Yerusalɛm dɔn-fen-koe ma. Anubɛ min nɛ ye anu bolo, anu si to wo makisila ka a dɔn haminyɛ la anu bolo.

¹⁷ Yi anubɛ dɔn-fannu si dasa anu ma. Mɔgɛnu yisi si tinya anu nyɔgɔn fɛ barɛ bolo. Kɛ bɛɛ ye tɛgɛla anu hakɛ le ma.”