Isikiyɛli 38 - ALLALA KUMƐ

Fanka-Sɔrɔn-Koe Megogi Nyamanɛ Bolo

¹ Mari ya a fɔ n ye ko,

² “Ile hadama-dan, i ni Mansa Kɔgi makuma min bi Tubalinu anubɛ Misɛki sigisɔnnu kun na Megogi nyamanɛ rɔ.

³ A fɔ a ye ko a yoge le nde, i Tigi Mari la.

⁴ Mansɛ wola so-laburilɛ minnu makirinɛ wo, ala soeenu wo, wonu siya duk! Nɛgɛ-walan anubɛ faan ye ala kɛlɛ-dan wo bɛɛ bolo tɔ. N si ale mansɛ anubɛ ala kɛlɛ-dannu nabɔ anuna nyamanɛ rɔ. N si a kunyɛ bɔ a wara la ka lunyɛ bila a gbagasa-kole rɔ.

⁵ Pasiya kɛnu wo, Sudan kɛnu wo, Libiya kɛnu wo, wonu dama sɔnɛ a fɛ. Kɛlɛ-kɛ-fulɛ anubɛ nɛgɛ-walan ye anu dama bolo.

⁶ Sibolo-gbɛrɛ-siyaman si kofu Koma kɛnu anubɛ Bɛti-Togarama kɛnu ma ka bɔ kantɔ-wara la pan! Wonu dama sɔnɛ a fɛ kɛlɛ rɔ anubɛ mɔgɔ-siyaman ka bɔ kantɔ-wara la pon!

⁷ “A fɔ ale mansɛ ye ko a ni a rabɛn. Ala kɛlɛ-dan bɛɛ ni ata kumɛ bira.

⁸ San-siyaman ba tenbi, a wati-bɛrɛ wa ke, Isirɛla mɔgɛ minnu nara ka bɔ sibolo-siyamɛnu tɛma, a ni ta bui wonu ma, ado wonu bara mɛ sigini lafɛrɛ rɔ, anu yili-wo-yili sa kɛlɛ ma tun. Isirɛla kɔnkɔ-nyamanɛ min tinyanɛ ara mɛ, ado mɔgɛnu nafɛrɛnɛ siginɛ a rɔ kaka, anu si bui nyɔ ma.

⁹ Anubɛ ala kɛlɛ-dannu anubɛ sibolo-siyamɛ minnu bi a fɛ, wonu si tonkore sɔ nyɔ la iko fɔnyɔ wa tonkore sɔ soe la.”

¹⁰ N Tigi Mari ya min fɔ Mansa Kɔgi ye, wo le kɛ la. A ko wati ye kela, ale Kɔgi si a miri ko-yogomɛnu denu ma ka yanfɛ rabɛn.

¹¹ A ko ale Kɔgi si a latɛgɛ ko a ni bui Isirɛla nyamani-kimanɛ wo ma min nafɛrɛnɛ, ado tarɛ minini ma nyamanɛ wo soenu ma.

¹² A ko mansɛ wo si tugu anu na ka anu bolo-fan bɛɛ bi. Anu bi tugula minnu na wo la, wonuna soenu bi tonbonyɛ le la nun. Anu bɔra sibolo-gbɛrɛnu denu tɛma nun kɔnɔ kaka, kolo-fan anubɛ fen-siyaman bi anu bolo duk! Anu siginɛ duninya mumɛ kila-tangbɛ rɔ.

¹³ A ko Siba kɛnu anubɛ Didan kɛnu anubɛ Sipeni nyamani-yilanu si to ale mansɛ manyinikala ko, “I wara ban ila kɛlɛ-dannu kundɛnna alako anu ni ta bui mɔgɛnu ma, wa? I wara ban anu bolo-fannu torondela anu na, wa? A wodi-gbɛ wo, a sɛnɛ wo, a kolo-fen wo, a bolo-fen wo, a sɔgɛ ye i la, i ni ta wo bɛɛ la i bolo, wa?”

¹⁴ Woletɔ n Tigi Mari ya n sɔ Mansa Kɔgi wara ka kilayɛ kɛ fɔ a ye. A ko ale Marita mɔgɛnu tenbi lafɛrɛ rɔ, ale Mansa Kɔgi si wo rayen. A si wuli

¹⁵ ka bɔ a warɛ kan tɔ pon! A ko ale Mansa Kɔgila kɛlɛ-den-siyaman tɔnkɔnyɔ si na ka bɔ sibolo-siyamɛnu tɔ, bɛɛ siginɛ anuna soeenu na.

¹⁶ A ko ale Mansa Kɔgi si bui Isirɛla mɔgɛnu ma ka tonkore sɔ anu na iko banda-fin-fɔnyɔ wa tonkore sɔ soe la. San-siyaman ba tenbi, a wati-bɛrɛ wa ke, ale Mari si Mansa Kɔgi sɔ ko a ni ata nyamanɛ kɛlɛ. Wo wa ma tumɛ min, wo si a yira sibolenu na ale Mari ye nya min. A ko a si ata sɛninyɛ yira sibolenu na ka a tɛgɛ a ye min mala ale Mansa Kɔgi la.

¹⁷ A ko a ya a fɔ Isirɛla nɛbinu ye nun ko wati ye nala, a si a ma, mɔgɛ do ni na bui ata mɔgɛnu ma. A ko nba, mɔgɛ wo le ale Mansa Kɔgi kɛ la, yɔ! N Tigi Mari kan le kɛ la.

Mansa Kɔgi Tɔrɔ-Koe Alla Bolo

¹⁸ N Tigi Mari ko ale Mansa Kɔgi wa bui Isirɛla nyamanɛ ma tumɛ min, a si diminya kosɛbɛ!

¹⁹ A wa diminya-belebele-wɛ kɛ, a si a ma, dugi ni yɛrɛyɛrɛn Isirɛla nyamanɛ rɔ wo tele nyɛrɛ ma.

²⁰ A ko a yɛgɛ wo, a koni wo, a sogo-kinama wo, a sogo-mɛsɛ wo, a hadama-den wo, anu dama si yɛrɛyɛrɛn kilan bolo ka a tɛgɛ Marita kabana-koe ma wulɔn. Kɔnkɛnu si bui. Farɛnu dɛ la si ka. Tarɛ bɛɛ si ta sala a ma dundulu!

²¹ A ko a si ale Mansa Kɔgi kumakɔ nyagba-su bɛɛ la. Ale Mari kan le kɛ la. Ale Mansa Kɔgila kɛlɛ-dannu si to anu nyɔgɔn kɛlɛla.

²² A ko a si a tɔrɔ kirayɛ anubɛ fagalɛ la. Bandɛ wo, banda-kole wo, tɛ wo, munku-gbɛ wo, a si wonu basan anu nyɔgɔn na pirikali, ka a rawuya ale Mansa Kɔgi anubɛ ala kɛlɛ-dannu ma. Sibolo-siyamɛ minnu kofunɛ a ma kɛlɛ rɔ, a ra si wuya wonu fanan ma.

²³ Wo wa ma tumɛ min, ale Mari si a yira sibole bɛɛ la ko a makawara, ado a sɛnima. Anu si a lɔn ko Mari le ale la.