Isikiyɛli 37 - ALLALA KUMƐ

Niyi-Lasɛgi-Koe Kolo-Gbalɛ rɔ, Wo Ko-Rayirɛ

¹ Marita Sɛnbɛ yigira n kuma tumɛ min, wo ya n bi ka ta n sɔ lɛɛ do tɛma min kuma fanɛ hadama-den-kole la.

² A tara n na lɛɛ wo kan-tinɛ bɛɛ rɔ. N ya kolo-gbalanɛnu yen duk!

³ Mari ya n manyinika ko, “Ile hadama-dan, kole kɛnu niyi si sɛgi anu tɔ tun, ba?” N ya a fɔ ko, “N Tigi Mari, ile le kelen pe si ke kɛ yabila.”

⁴ Wo kɔma, a ya a fɔ n ye tun ko, “Nna kumɛ fɔ kole kɛnu ye. A fɔ anu ye ko anu ni anu tole masɔ nde, Marita kumɛ la.

⁵ Nde, anu Tigi Mari ko n si anu niyi bila anu tɔ ka anu ma kɛndɛwagɛnu na.

⁶ N si anu fasɛ anubɛ anu soge sa anu kole wonu ma tun. N si anu gbole fanan sa anu ma. N si niyi bila anu tɔ tun ka anu ma kɛndɛwagɛnu na. Wo kɔma, anu si a lɔn ko Mari le nde la.”

⁷ Woletɔ n kumara kole wonu ye iko Mari ya a fɔ n ye nya min. N bi kumɛ kɛ fɔɛ kun na, n ya a lamɔɛn gbasakara-gbasakara. Yaga, kole wonu bara wuli tugunna anu nyɔgɔn na iko anu bi nya min nun.

⁸ N bi kole wonu mafɛlan kun na, n ya a yen, anu yama ara togon fasɛ anubɛ soge anubɛ anu gbole la kɔnɔ anu sa anu niyi lafɛla.

⁹ Wo kɔma, Mari ya a fɔ n ye ko, “Ile hadama-dan, nna kumɛ fɔ fɔnyɔ ye. A fɔ a ye ko a Tigi Mari ye ale fɔnyɔ lawulila ka bɔ duninya-tonko-nanɛ bɛɛ rɔ. A ni na a lafɛ furi kɛnu tɔ alako anu ni anu niyi sɔrɔn tun.”

¹⁰ Woletɔ n kumara fɔnyɔ ye iko Mari ya a fɔ n ye nya min. Fɔnyɔ donta anu tɔ nya min, anu donta anu niyinu nafɛyɛ rɔ ka anu nasɔ. Anu yatɛ min bi nyɔ, wo kera sɛra-wɛ la.

¹¹ Wo bɛɛ kanɛ a la, Alla ya a fɔ n ye ko, “Ile hadama-dan, Isirɛla mɔgɛ bɛɛ mani de iko kole wonu. Anu bi a fɔla ko anu bara gbala, ado yigi-wo-yigi sa anu bolo tun. Anu na ara to dogbe!

¹² Woletɔ nna kumɛ fɔ nta Isirɛla mɔgɛnu ye. A fɔ anu ye ko nde, anu Tigi Mari ye nala anu kanbɛnu nakala. N si anu nabɔ anu kanbɛ wonu tɔ ka anu nasɛgi Isirɛla nyamanɛ rɔ.

¹³ N ba anu kanbɛnu naka ka anu nabɔ fɔnyɔ kɛ rɔ tumɛ min, anu si a lɔn worɔ ko Mari le nde la.

¹⁴ N si nna niyi don anu tɔ alako anu ni beli tun. Wo kɔma, n si a ma, anu ni ta sigi anuta nyamanɛ rɔ tun. Anu si a lɔn wo le ma ko Mari le nde la. Nta lanyiri le kɛ la, ado fɔ n ba a ma. Nde, Mari ara ban a fɔla.”

Yuda anubɛ Isirɛla Nyamanɛ Lakofu-Koe

¹⁵ Mari kumara n ye tun, a ko,

¹⁶ “Ile hadama-dan, i ni kɔlɔma-bolɔn do bi ka a sɛbɛ a ma ko ‘Yuda nyamanɛ anubɛ nyɔ-Isirɛla mɔgɛnutɛ le.’ Kɔlɔma-bolɔn do fanan bi ka a sɛbɛ wo fanan ma ko, ‘Yusufula dan Ifɛrɛm anubɛ nyɔ-bɔnsɔn toenutɛ le.’

¹⁷ I ni kɔlɔma wonu kun-sungban bi i bole la ka a ma iko i ye anu tugunna anu nyɔgɔn na le. I ni a filɛ bira i bolo kelan la.

¹⁸ Ila mɔgɛnu ba i manyinika wo kɔrɛ ma,

¹⁹ i ni a fɔ anu ye ko nde, anu Tigi Mari le ye Isirɛla kɔlɔma bila ka a tugun Yuda kɔlɔma la. N si anu ma kɔlɔma kelen na tun ka anu bira n bolo kelen tɔ.

²⁰ “Kɔlɔma filɛ kɛnu bira i bolo tɔ alako mɔgɛnu ni anu yen.

²¹ A fɔ anu ye ko nde, anu Tigi Mari si nta mɔgɛnu bɔ sibolo-gbɛrɛnu tɛma anu tanyɛnsɛnnɛ minnu tɛma nun. N si anu kundɛn kan-tina-kelen ka na anu na anu halala-nyamanɛ rɔ.

²² N si anu filɛ ma sibolo kelen na Isirɛla kɔnkɔ-nyamanɛ rɔ. Mansa kelen pe si taran anu kun na. Anu ti ma sibolo fila la tun. Anu ti to nyamani-filayɛ la tun.

²³ Anu ti anu nyɛrɛ latinya kisimiriya-bɛsɛ wonu fɛ. Anu ti bila hakɛ rɔ. Anu duruta hakɛ subolo-siyamɛ min bɛɛ kɛla, n si anu bɔ wonu tɔ. N si anu sɛninya alako anu ni ma nta mɔgɛnu na. Nde fanan ni ma anuta Alla la.

^24-25 Mansɛ si taran anu kun na min si bɔ nta wɔli-kɛla Dawuda bɔnsɔn rɔ. Anu dama si taran mansa kelan wo kɔrɔ, ado anu si nta tɔnnu bira a kila bɛrɛbɛrɛ fɛ. N ya nyamanɛ min di anu benba Yakoba ma, anu si sigi nyɔ rɔ. Anu denu wo, anuna dannu wo, anu kebilɛ wo, bɛɛ si sigi nyɔ rɔ tolon!

²⁶ Ma si sara koe do ma ma nyɔgɔn tɛma ka a tɛgɛ anuna habadan-sigi lafɛrɛ ma. N si anu ma dugurɛn bɛrɛbɛrɛ la ka anu nasiyaya. N si nta Bato-Bɔn sɔ nyamanɛ wo rɔ, a si to kan min tolon!

²⁷ N si to anu fɛ burubukai! N si ma anuta Alla la. Anu si ma nta mɔgɛnu na.

²⁸ Nta Bato-Bɔn wa banda laban nyɔ, sibolenu bi a lɔnna wo le ma ko nde le wara Isirɛla mɔgɛnu yabɔ ka anu ma nde, Mari halalɛ la.”