Isikiyɛli 36 - ALLALA KUMƐ

Alla Duwa-Koe Isirɛla Ye

¹ Mari ko, “Ile hadama-dan, kuma Isirɛla kɔnkɛnu ye. A fɔ anu ye ko anu ni anu tole masɔ nde,

² anu Tigi Marita sarakanɛ la. Isirɛla yogenu bi anu nyɛrɛ matɔgɔla ko anutɛ le Isirɛla kɔnkɛnu na.

³ I ni nna wɔlɔyiya-kumɛ kɛ latenbi anu ma ko Isirɛla mɔgɛnu dan-masa-nyɔgɛnu nara bui Isirɛla nyamanɛ ma tumɛ min ka a kɔnkɔrɔ-fannu kankan, anu ya Isirɛla lafɛya dɔgɔma-ma-de!

⁴ Kɔnkɛnu anubɛ gburukulinu wo, folenu anubɛ lɛɛnu wo, kan-tina-tinyanɛnu wo, tonbɔn minnu nafɛyanɛ sibolo-gbɛrɛnu bolo wo, anu ni anu tole masɔ nde, anu Tigi Mari ye nala min fɔla anu ye.

⁵ Nde, anu Tigi Mari ara sibolo-gbɛrɛnu makuma n sɛbɛ-kuna-wɛ la, katarala Idɔm ma. Anu buira nna kolo-fannu de-nyini-tinɛnu ma ka wonu bi nna mɔgɛnu bolo bɔrɔbɔnteyɛ anubɛ sewɛ la.

⁶ “Woletɔ i ni wɔlɔyiya-kumɛ fɔ Isirɛla nyamanɛ ye. A kɔnkɔ wo, a gburukulu wo, a folo wo, a lɛɛ wo, nde, anu Tigi Mari ye min fɔla anu ye keliyɛ anubɛ yisi-bɔɛ la, wo fɔ anu ye. N bi wo fɔla le ka a tɛgɛ sibolo-gbɛrɛnu bara Isirɛla lafɛya nya min ka anu namiliya.

⁷ Woletɔ nde, anu Tigi Mari ara ban a latɛgɛla ko nde si anu dan-masa-nyɔgɛ wonu namiliya.

⁸ Kɔnɔ Isirɛla kɔnkɔrɔ-kɔlɔmanu si yanba-kun-nyimɛ anubɛ gbɔ-hakikɛnu nabɔ nta Isirɛla mɔgɛnu ye tun, ado a ti mɛ tun, Isirɛla mɔgɛnu si sɛgi anu barɛ.

⁹ N bi anu fɛ, yɔ! N si a ma, anuna dugi ra ni sin tun ka suginu fui anu tɔ.

¹⁰ N si a ma fanan, anu ni siyaya tun. Anu si to sigini soe wonu tɔ tun, ado soe min bɛɛ ara tinya, anu si wo bɛɛ sɔ tun!

¹¹ A mɔgɔ wo, a ninki wo, n si a ma, wo bɛɛ ni yiri tun bui! Anu si siyaya ka tenbi a fɔlɔtɛ la. N si a ma, anu ni sigi nyɔ lafɛrɛ rɔ iko anu bi nyɔ nya min kɔrɔma la. N si anu nasabati ka tenbi a fɔlɔtɛ la. Wo kɔma, anu si a lɔn ko Mari le nde la.

¹² N si nta Isirɛla mɔgɛnu nasɛgi anuna nyamanɛ rɔ tun. A si ma anu halalɛ la, ado n ti sɔn anuna dannu ni kɔnkɔ tun!

¹³ “Nde, i Tigi Mari ko mɔgɛnu bi a fɔɛ min kɛla ko Isirɛla dugi si ata mɔgɛnu dɔn de, tonyɛ le! Anu bi a fɔla fanan ko anuna dugi ye anuna dannu kankanna.

^14-15 Kɔnɔ nde, anu Tigi Mari ara ban a fɔla ko dugi ti a lafɛya-kan lamɔɛn tun mɔgɛnu bolo. A ti mɔgɛ yen a wululula tun. Ka a dabira bi ma, anuna dugi si dɔn-fan labɔ duk! Nde, i Tigi Mari ara ban kɛ fɔla.”

Isirɛla Nyamanɛ Kuraya-Koe

¹⁶ Mari ya a fɔ n ye ko,

¹⁷ “Ile hadama-dan, Isirɛla mɔgɛnu bi anuna nyamanɛ rɔ tumɛ min, anu ya a latinya anuna ko-ladan-nya fɛ. Anu kɛ-nya sɛninyabɛlɛ n yala iko musi tenbi ala wati rɔ.

¹⁸ Anu bara fagalɛ min kɛ nyamanɛ rɔ ka nyamanɛ latinya bɛsi-kɔ-koe la fanan, anu ya nna fanka dan-natenbi lɔn wo le ma.

¹⁹ N ya anutɛ bɔ tɔn rɔ ka a tɛgɛ anu kɛ-nya-yogomɛnu ma woletɔ n ya anu tanyɛnsɛn nyamani-gbɛrɛnu tɔ.

²⁰ Anu tara kan-tinɛ min bɛɛ rɔ, anu ya tɔgɔ-tinyɛ sanba n ma. Mɔgɛnu kɛnɛna a fɔla ko, ‘Marita mɔgɛ le kɛnu na kɔnɔ hali wo, a ara anu gben ata nyamanɛ rɔ.’

²¹ Wo ya a ma, n yisi tinyanta n tɔgɔ-sɛnimɛla ko la bawo Isirɛla mɔgɛnu tara kan-bo-kan, mɔgɛnu si n nafɛya-kumɛ wo fɔ.

^22-23 “Woletɔ nde, i Tigi Marita kumɛ kɛ latenbi Isirɛla mɔgɛnu ma. A fɔ anu ye ko anu tara kan-tinɛ min bɛɛ rɔ, anu ya a ma, n tɔgɛ tinyanta wo dama rɔ. Kɔnɔ n bi Isirɛla mɔgɛnu nawɔlila alako ka a yira sibolo-gbɛrɛnu na ko n sɛnima. N sa wo mala Isirɛla mɔgɛnu tɔgɔ la. N bi wo mala n tɔgɔ-sɛnimɛ lela ko la ka a yira sibolo-gbɛrɛnu na ko n sɛnima. Anu si a lɔn wo le ma ko anu Tigi Mari le nde la. Nde ara ban kɛ fɔla.

²⁴ N si anu bɔ sibolo-gbɛrɛnu tɛma kan-tinɛ bɛɛ rɔ ka anu nasɛgi tun anu halala-nyamanɛ rɔ.

²⁵ N si yi-sɛnimɛ purupuru anu ma alako anu ni sɛninya bɛsi-kɔ-koe anubɛ anu kɛ-nya-yogomɛ bɛɛ ma min bara anu natinya.

²⁶ N si a ma, anu sɔndɔmɛ ni sa anu nyɔgɔn kuma ka miriya-nyimɛ di anu ma. N si anuna sɔndɔma-gbɛlɛyɛ bɔ anu burɔ ka anu ma kuma-biralɛnu na.

²⁷ N si nta sɛnbɛ di anu ma min si a ma, anu ni nta tɔn bira a kilɛ fɛ, n ya minnu di anu ma nun, kɔni.

²⁸ Wo kɔma, n ya nyamanɛ min di anu benbanu ma, anu si sigi nyɔ rɔ. Anu si ma nta mɔgɛnu na. Nde fanan si ma anuta Alla la.

²⁹ Koe min bɛɛ si anu natinya, n si anu nakanan wonu ma. N si a ma, fui-fannu ni sabati alako kɔnkɔ kana na nta mɔgɛnu bira tun.

³⁰ N si a ma, anuna sɛnita-fannu anubɛ anuna ki-fannu ni sabati alako anu kana na yarabi sibole doi wonu yala kɔnkɔ-fitinɛ bolo.

³¹ Anu hɛnkili si to anuna ko-yogomɛnu anubɛ anu sɔn-yogomɛnu ko. Anu ba anu miri wonu ma, anu si nyima anu nyɛrɛ rɔ.

³² A sɔgɛ ye n na le, Isirɛla ni a lɔn ko n sa wo mala Isirɛla mɔgɛnu tɔgɛ la. A sɔgɛ ye n na le, anu ni yarabi ka miliya ka a tɛgɛ anu bi koe minnu kun na. Nde, anu Tigi Mari ara ban kɛ fɔla.

³³ “Nde, anu Tigi Mari ko n ba ban anu sɛninyala ka anu bɔ anu hakɛ rɔ, n si sɔn worɔ ko anu ni sigi anuna soenu tɔ tun ka anuna tonbɔnnu sɔ a kurɛ la tun.

³⁴ Minnu tenbi tenbila Isirɛla nyamanɛ rɔ, wonu bara a yen nun ko nyɔ ara ma fira-gbansan na. Kɔnɔ n si a ma, anu ni nyɔ lanfan tun.

³⁵ Mɔgɔ ti nyamani-tinyanɛ kɛ yen tun. Anu si a fɔ ko a mafɛlɛn di iko Idɛn nakɔɛ ye nya min nun. Mɔgɛnu ti anuna soenu yen tonbonyɛ la. Anu si soe wonu fanan yen tun tarɛ mininɛ anu ma.

³⁶ Wo kɔma, sibolo-gbɛrɛ minnu bi tola anuna foolɛ rɔ, wonu si a yen ko nde, anuta Mari ara tonbɔn wonu sɔ ka anuna sɛnɛnu nasɛgi anu gbɛ rɔ. Nde, anu Tigi Mari ara kɛ latɛgɛ ko n si kɛ ma, ado fɔ n ba kɛ ma, yɔ!

³⁷ “Nde, i Tigi Mari si sɔn Isirɛla mɔgɛnu ni n madiya tun. N si a ma, anu ni to siyayala iko saga wɔrɛ.

³⁸ Bi ma, soe minnu tinyata, wonu na si fa mɔgɛnu na iko Yerusalɛm na si fa saraka-sagɛnu na nya min ladɛn-wati rɔ. Wo kɔma, anu ni to a lɔnna wo le ma ko nde le Mari la.”