Isikiyɛli 35 - ALLALA KUMƐ

Idɔm Tɔrɔ-Koe Alla Bolo

¹ Mari ya a fɔ n ye ko,

² “Ile hadama-dan, i ya-lamunun Idɔm kɔnkɛnu na ka Idɔm nyamanita-mɔgɛnu makuma.

³ Nde, i Tigi Marita kumɛ latenbi anu ma ko Idɔm mɔgɛnu yogo-fin-bɛ le nde, Mari la. N si anuna nyamanɛ ma nyamani-halakinɛ la pɔ!

⁴ N si Idɔm so-kunbɛnu ma tonbɔn la. N si ale nyamanɛ kasara pɔ! Wo wa ma tumɛ min, anu bi a lɔnna wo le ma ko Mari le nde la.

⁵ “Isirɛla yogo-fin-bɛ le Idɔm mɔgɛnu na bawo anu sɔnta ko sibolo-gbɛrɛnu ni Isirɛla mɔgɛnu faga anu tɔrɔ-wati rɔ, ado anu tɔrɔ-wati-laban anuna hakɛla ko la, anu ya anu yɛ gbala anu na dɔrɔn.

⁶ Woletɔ nde, Mari min bi n niyi la, n bara n keli n nyɛrɛ rɔ ko anuna ban le sayɛ la, ado anu ti ke anu kunyɛ bɔla wo kɔrɔ. Anu ya mɔgɛnu faga min kɛ, fagalɛ ti bɔ anu denu denu fɛ.

⁷ N si Idɔm kɔnkɔ-nyamanɛ ma nyamani-tinyanɛ la. Mɔgɔ-wo-mɔgɔ wa tenbi nyɔ, n si a ma, a ni faga.

⁸ N si kɔnkɛnu yamatogon furinu na. Minnu kunyɛ tora kɛlɛ rɔ, kɔni, wonu furi ranyɛnsɛnnɛ si to kɔnkɛnu anubɛ lɛɛnu tɔ.

⁹ N si a ma nyamani-halakinɛ la tolon, ado mɔgɔ-wo-mɔgɔ ti sigi ala soenu tɔ tun! Wo wa ma tumɛ min, anu si a lɔn wo le ma ko Mari le nde la.

¹⁰ “Hali Isirɛlata Mari le nde, Alla la, ale Idɔm ya a fɔ ko atɛ le Yuda anubɛ Isirɛla anubɛ anuna duginu na.

¹¹ Woletɔ nde, i Tigi Mari min bi n niyi la, n bara n keli n nyɛrɛ rɔ ko anuta yisi-bɔɛ wo, anuta keliyɛ wo, anuta gboyanayɛ nta mɔgɛnu bara la wo, n si wo yili sara anu na. Anu si a lɔn wo le ma ko nde le ye nala anu tɔrɔla ka a tɛgɛ anu ya min sigi Isirɛla mɔgɛnu ma.

¹² Idɔm kɛnu bara a fɔ nun ko Isirɛla kɔnkɛnu mara nyamani-tinyanɛ la. Anu bara a fɔ fanan ko anu denu denuta ye wonu na. N ba anu tɔrɔ, anu si a lɔn wo le ma ko nde, Mari nyɛrɛ ya anu yen de a fɔla.

¹³ N bara anu yen mankan tugula n makuma-tinɛ.”

¹⁴ “Nde, i Tigi Mari ko n si a ma, Idɔm nyamanɛ ni bui, ado duninya mumɛ si sewa anuna buiyi wola ko la

¹⁵ iko anu sewara Isirɛlala buiyila ko la nya min, n halala-nyamanɛ, kɔni. Idɔm kɔnkɔ-nyamanɛ bɛɛ si ma nyamani-kasaranɛ la. Wo kɔma, bɛɛ si to a lɔnna ko Mari le nde la.”