Isikiyɛli 34 - ALLALA KUMƐ

Isirɛla Saga-Fɛ-Biralayɛ Wara-Koe

¹ Mari kumara n ye ko

² “Ile hadama-dan, wɔlɔyiya-kumɛ kɛ latenbi Isirɛla mɔgɛnuna kun-tiginu ma. Nde, anu Tigi Mari ye min fɔla, wo fɔ anu ye. Gbalo ye anu denu Isirɛla fɛ-biralɛnu ma. Anu bi anu nyɛrɛ fɛ-birala kɔnɔ anu sa anuna sagɛnu fɛ-birala, Isirɛla mɔgɛnu, kɔni.

³ Anu bi sagɛ wonu nonɛ minna. Anu bi sagɛ wonu siyi tɛgɛla anu ma ka a ma kurɛ la anu nyɛrɛ ye. Anu bi saga-hakikɛnu fagala ka wonu dɔn. Kɔnɔ anu sa sɔnna sagɛ wonu fɛ-birala muk!

⁴ Minnuta ma gbɛlɛ, anu sa wonu dɛnbɛna. Minnu kirɛ, anu sa sɔnna wonu dandanna. Minnu tanbannɛ, anu sa wonuna tɛlɛnu makirila. Minnu tara anu kun fɛ, anu sa wonu kunyɛ lasɛgila a rɔ. Minnu tununta, anu sa wonu nyinina. Anu ti wo fenfen ma fɔ ka anu bira boloko-yogomɛ-kɛ.

⁵ Saga-fɛ-birala sa sagɛnu kun na min kɛ, woletɔ anu mara sogenu harayɛgɛ la.

⁶ Woletɔ nta sagɛnu tara anu kun fɛ kɔnkɔ-layan-bɛnu anubɛ gburukulinu ma. Anu ta ara nyɛnsɛn dugi kuma, ado mɔgɔ-wo-mɔgɔ ma anu nyini.

⁷ “A fɔ saga-fɛ-biralɛnu ye ko anu ni anu tole masɔ nde, Marita kumɛ la.

⁸ Nde, Mari min bi n niyi la, n bara n keli n nyɛrɛ rɔ ko fɔ anu ni anu tole masɔ le serr! Sogo-feremɛnu bara nna sagɛnu dɔn bawo anu fɛ-birala sa. Nna saga-fɛ-biralɛnu ma anu nyɛrɛ tɔrɔ sagɛnu nyinina lefan! Anu bi anu nyɛrɛ le dɔrɔn fɛ-birala, sagɛnu ma de!

⁹ Anu ni anu tole masɔ!

¹⁰ Nde, anu Tigi Mari ara ban a latɛgɛla ko anu yogo-fin-bɛ le nde la. N si nna sagɛnu bɔ anu bolo. N ti sɔn tun anu denu fanan ni ma nna sagɛnu fɛ-biralɛnu na. N ti sɔn anu ni to anu nyɛrɛ fɛ-birala wo nya na tun. N si nna sagɛnu kumafunfan anu bolo, ado n ti sɔn anu ni anu dɔn tun!

Saga-Fɛ-Birala-Nyimɛ Wara-Koe

^11-12 “Nde, i Tigi Mari ya a fɔ ko iko saga-fɛ-biralɛ si ala saga-tanyɛnsɛnnɛnu nadɛn nya min, nde nyɛrɛ si nna sagɛnu nyini ka anu fɛ-bira wo nya na le. Anu ta ara nyɛnsɛn kan tinɛ min bɛɛ rɔ kasara-tele ma, n si anu kundɛn ka bɔ nyɔnu tɔ.

¹³ N si anu bɔ sibolo-gbɛrɛnuna nyamanɛ rɔ ka anu kundɛn kan-tina-kelen ka na anu na anuta nyamanɛ rɔ. N si na anu na Isirɛla kɔnkɛnu anubɛ a yi-nɛnu fɛ. N si anu de-nyini bin-nɔrɔnni-hakikɛ la.

¹⁴ N si a ma, anu nafɛrɛnɛ ni to anu de-nyinina kɔnkɔ-tɛma-lɛɛnu tɔ Isirɛla nyamanɛ mumɛ rɔ.

¹⁵ Nde nyɛrɛ-nyɛrɛ si ma nna sagɛnu fɛ-biralɛ la. N si sulen-tina-hakikɛ di anu ma. Nde, anu Tigi Mari ara ban kɛ fɔla.

¹⁶ “Minnu tununta, n si wonu nyini. Minnu tara anu kun fɛ, n si wonu kunyɛ lasɛgi a rɔ. Minnu tanbanta, n si wonuna tɛlɛnu makiri. Minnu kirɛ, n si wonu dandan. Kɔnɔ minnu kunba, ado anu tagbɛlɛ wɛ kɛ, n si wonu wara-koe ka-a-la bawo saga-fɛ-birala ko-telenni-kɛlɛ le nde la.

¹⁷ “Woletɔ a fɔ nna sagɛnu ye ko n bi nala anu kitila ka a nyimɛnu bɔ a yogomɛnu yala. N si baanu bɔ sagɛnu tɛma.

¹⁸ Sagɛ donu bi anu tɔ, wonu ti wasa bin-nɔrɔnni-dɔn la fɔ ka binyɛ toe wo tinya anu kian la. Anu ba ban yi minna, anu si yi wo dundunɛ to.

¹⁹ Nna sagɛ toenu, fɔ anu ba bin-tinyanɛ dɔn ka yi-dundunɛ min anu kɔma.

²⁰ “Woletɔ nde, anu Tigi Mari ye a fɔla anu ye ko n si kiti sa saga-tɔlɔnɛnu anubɛ saga-baranɛnu tɛma.

²¹ Minnu baranɛ, saga-tɔlɔnɛnu tora wonu tɔntɔnna anu kunyɛ la ka anu gben anu kurun tɔ.

²² Kɔnɔ n si nna sagɛnu nakanan alako anu kana taran bira-boloko-yogomɛ rɔ tun. N si nna sagɛ bɛɛ kiti ka a nyimɛnu bɔ a yogomɛnu yala.

²³ N si mansɛ di anu ma iko nta wɔli-kɛla Dawuda ye saga-fɛ-birayɛ la nya min nun. Wo kelan si anu fɛ-bira a kin na!

²⁴ Nde si ma anuta Alla la. Anuna mansɛ wo si taran anu kun na iko nta wɔli-kɛla Dawuda taranta anu kun na nya min. Nde, Mari ara ban wo fɔla.

²⁵ Ma si sarama-kan kiri ma nyɔgɔn tɛma alako anu nakanannɛ si to nya min. Sogo-nyɛɛnɛ minnu bi anuta nyamanɛ wo rɔ, n si wo bɛɛ lato dogbe! Woletɔ nna sagɛnu si to lafɛrɛ rɔ bin-dɔn-tinɛ, ado anu si ke kila-gbɔngbɔn kɔrɔ lafɛrɛ rɔ fanan.

²⁶ “N si duwa anu ye, ado anu si taran nna kɔnkɔ-sɛnimɛla foolɛ rɔ. Anu makoe wa bila bandɛ la tuma-wo-tuma, n si bandɛ lana anu ye.

²⁷ Anuna kɔlɔmanu si gbɔ, anuna sɛnɛnu si sabati. Bɛɛ si sigi a halala-dugi rɔ lafɛrɛ rɔ. N ba yɔlɔkɛnu tatɛgɛ nta mɔgɛnu ma tumɛ min ka anu hɔrɔya yɔɔn-tiginu ma, anu bi a lɔnna wo le ma ko Mari le nde la.

²⁸ Sibole minnu ma nde, Alla lɔn, wonu ti anu kankan wo rɔ tun, ado sogo-nyɛɛnɛnu ti anu faga tun ka anu dɔn. Anu si to lafɛrɛ rɔ. Mɔgɔ-wo-mɔgɔ ti anu kumakɔ.

²⁹ N si wɔli-kɛ-tina-hakikɛ di anu ma alako dɔn-fan ni wara nyamanɛ rɔ. Sibolo-gbɛrɛnu yɛ ti tɛgɛ anu tɔ tun ka anu mayɛlɛn.

³⁰ Bɛɛ si a lɔn ko nde le ye Isirɛla nyamani-kumafunfannɛ la. Anu si a lɔn yati, ko nta mɔgɛ le anu denu na. Nde, anu Tigi Mari ara ban kɛ fɔla.”

³¹ N Tigi Mari ko wole min bi ata sagayɛ la, ata mɔgɛ le wole la. Wole fananta Alla le ale la.