Isikiyɛli 33 - ALLALA KUMƐ

Isikiyɛli Ma-Koe Kila-Kandannɛ la Isirɛla Mɔgɛnu Kun Na

¹ Mari ya a fɔ n ye ko,

² “Ile hadama-dan, n ba na kɛlɛ la nyamanɛ do rɔ tumɛ min, min bi mala, wo fɔ ila mɔgɛnu ye. Nyamanita-mɔgɛ wonu si mɔgɛ do yabɔ alako wo ni ma kila-kandannɛ la.

³ Wo wa anu yogenu yen nala, a si buri fɛ ka mɔgɛnu nalɔn.

⁴ Ni min ya buru-kan wo lamɔɛn, a ni a tengberenya, ni mɔgɛ wo fagara, a tɔgɛ tora a nyɛrɛ le la.

⁵ A gbɛ le ala fagalɛ wo la bawo a ya a tengberenya le. Ni a ma a tengberenya, bole ti sa a rɔ.

⁶ Kɔnɔ ni kila-kandannɛ wo ya anu yogenu yen nala, a ma sɔn buri fɛla, ni anu yoge nara mɔgɛ do faga, ala mɔgɛnu si a bira ka a tɛgɛ a hakɛ wola ko ma. N fanan si a bira wo yili la.

⁷ “Nba, ile hadama-dan, n bi i sigila Isirɛla mɔgɛnu kuma anu kandan-koe la. N ba min fɔ i ye, i ye anu makawandila wo le la.

⁸ Ni n ya a fɔ ko karagbɛlɛ do ye nala fagala, ile ma sɔn tala wo makawandila alako a ni a bɔ a sɔn-yogomɛ wo kun na ka kisi, ni a fagara ko-yogomɛ wo kun na, ile Isikiyɛli, i gbɛ le wo la, ado n si i bira wo yili la, yɔ!

⁹ Kɔnɔ ni i ya a makawandi, a ma a fara a sɔn-yogomɛ wo la, ni a fagara ala ko-yogomɛ wo kun na, n bolo sa ile la wo rɔ.”

Mɔgɔ Halala-Dunɛ Wara-Koe

¹⁰ Mari ya a fɔ n ye ko, “Ile hadama-dan, Isirɛla mɔgɛnu bi min fɔla, ile ni anu hɛnkili bila wonu na tun. Anu bi a fɔla ko anu kɔndɔfilinɛ anu hakɛla ko la. Anu bi a fɔla fanan ko anu bi tola kasarala anuna hakɛla ko la. Anu ko anu si ke belila kama gbɛ?

¹¹ A fɔ anu ye ko nde, anu Tigi Mari min bi n niyi la, n bara n keli n nyɛrɛ rɔ ko n ti sewa hakɛ-tigila fagɛ la. Yanni wo ni ma, a ni fara ala hakɛ-kɛ la ka to a niyi la. Wole Isirɛla mɔgɛnu, wo ni wo fara ko-yogomɛnu na wo ye minnu da kun tɔ. Nfenna fagali-sɔgɛ ye wo la?

¹² “Nba, ile hadama-dan, a fɔ Isirɛla mɔgɛnu ye ko mɔgɔ-nyimɛ tenbi hakɛ kɛla, a ara ko-nyimɛ min bɛɛ ma, wo ti a kisi. Ni sɔn-yogoma-tigi ya a bɔ ko-yogomɛ da kun tɔ, a ti tɔrɔ. Ni mɔgɔ-nyimɛ ya a bɔ ala ko-nyimɛ da kun tɔ, a ti to a niyi la.

¹³ Hali n bara mɔgɔ-nyimɛ yili-madiya ko a si to a niyi la kɔnɔ tumado, a ni a miri ko a ara ko-nyimɛ minnu ma kɔrɔma la, wonu bara a ya labɔ. Ni wo tigi donta ko-yogoma-kɛ rɔ, a ara ko-nyimɛ min bɛɛsi ma nun, n ti n miri wo do-wo-do ma tun.

¹⁴ Hali n ya sɔn-yogoma-tigi makawandi ko a ye nala fagala kɔnɔ ni a ya a bɔ ala ko-yogomɛ da kun tɔ, a ni don ko-telennɛ anubɛ ko-nyima-kɛ ladan rɔ, a ti faga.

¹⁵ Tumado, a ye tulumɛ le lasɛgila, ni wo ma, a ni kankanya-fan lasɛgi, ni a ya a bɔ ko-yogoma-kɛ da kun tɔ, a ni don nna tɔn-birɛ rɔ minnu si a ma, mɔgɛ ni to a niyi la, a ti faga worɔ. A si to a niyi la.

¹⁶ N si a makoto ala ko-yogomɛla ko la. A si to a niyi la bawo a ara ko-nyimɛ anubɛ ko-telennɛ ma.

¹⁷ “Ado nfan, ila mɔgɛnu bi a fɔla ko nde ye min kun na, wo ma telen, nyɛ? Kɔnɔ anu denu denuta kila ma telen.

¹⁸ Mɔgɔ-telennɛ wa a bɔ ko-nyima-kɛ da kun tɔ ka don ko-yogoma-kɛ rɔ, a si faga ka a tɛgɛ wola ko ma.

¹⁹ Ni sɔn-yogoma-tigi ya a bɔ ala ko-yogoma-kɛ da kun tɔ, a ni don ko-telennɛ anubɛ ko-nyima-kɛ rɔ, a ara a nyɛrɛ niyi lakisi.

²⁰ Kɔnɔ wole Isirɛla mɔgɛnu bi a fɔla ko n sa ko-telenni kun na. N bi wo kitila ka a tɛgɛ wo ara minnu ma gbɛ!”

Yerusalɛm Don-Koe Anu Yogenu Bolo

²¹ Mala birɛ san tan-ni-filɛ, wo karɛ tan nyɔgɛ, tele loli ma, mɔgɛ do ya a buri ka bɔ Yerusalɛm ka na Yerusalɛm tinya-koe fɔ n ye.

²² A nara tele min banda kɛ wurɛ la, n ya a lɔn yati, ko Marita Sɛnbɛ donta n tɔ wulɔn. Kei wo nanɛ wo banda kɛ, Mari ya a ma, n kɛra kumala tun.

Mɔgɛnu Hakɛ Wara-Koe

²³ Mari kumara n ye ko,

²⁴ “Ile hadama-dan, mɔgɛ minnu siginɛ Isirɛla so kasaranɛnu tɔ, wonu bi a fɔla ko Iburayima, mɔgɔ kelen de wo la, ado nyamanɛ bɛɛ dira ale le kelan ma. Anu ko anu denu min siya, anu halala-nyamanɛ le kɛ la gbɛ!

²⁵ “Nde, i Tigi Marita kumɛ kɛ latenbi anu ma. A fɔ anu ye ko anu bi soge anubɛ a yele dɔnna. Anu bi bɛsɛnu kɔla. Anu bi mɔgɛnu fagala. Anu miri kama worɔ ko anu halalɛ le nyamanɛ kɛ la?

²⁶ Anu bi mɔgɛnu fagala. Anu bi kisimiriya-koenu kɛla. Bɛɛ ye yɛlɛnyɛ kɛla. Nfen bi a tola, anu bi a fɔla ko anu denu denutan ye nyamanɛ wo la?

²⁷ “I ni anu makawandi ko nde, i Tigi Mari min bi n niyi la, n bara n keli n nyɛrɛ rɔ ko minnu siginɛ so kasaranɛ wonu tɔ, fɔ anu ba faga. Minnu bi binyɛ rɔ, sogenu si wonu dɔn. Minnu bɛɛ dogonnɛ kɔnkɛnu anubɛ farɛnu na, wonu si faga kirayɛ bolo.

²⁸ N si nyamanɛ wo tii mɛmɛ! Anu wasinɛ anuna fanka min tɔ, wo bɛɛ si ban feu! Isirɛla kɔnkɛnu ma si kilan ha mɔgɛ ti sisi tala anu tɔ.

²⁹ N ba ban mɔgɛnu tɔrɔla anu hakɛla ko la ka nyamanɛ tii, anu bi a lɔnna wo le ma ko Mari le nde la.”

Kawandili Kumɛ Wonu Bɔ-Koe-A-La

³⁰ Mari ya a fɔ n ye ko, “Ile hadama-dan, ila mɔgɛnu bi i wara-koe fɔla tarɛ dafɛ anubɛ anuna bonda-dɛnu na. Anu bi a fɔla anu nyɔgɔn ye ko, ‘Ma ni ta ma tole masɔ Marita sarani-kan la.’

³¹ Woletɔ nta mɔgɛnu bi nala a kinkila nta kumɛ lamɔɛn-koe la i bolo. Kɔnɔ n bi min fɔla anu ye, anu ti wo ma. Keninteyɛ ye anu da-yanbɛ le la kɔnɔ fɔ anu bi kensunyɛ min kɛla darɔ-diyɛ la.

³² Kɔnɔ ile mani de anu yala iko fɔli-kɛlɛ anubɛ sɔrɔn-fɔlɛ. Anu bi ita kumɛ kɛ bɛɛ lamɔɛnna anu tole la yati, kɔnɔ anu sa a do-wo-do birala.

³³ Kɔnɔ ila kumɛnu ba bɔ-a-la tumɛ min, anu bi a lɔnna wo le ma ko yaga, nɛbi ye anu tɛma nun, ado anu bi mala le, yɔ!”