Isikiyɛli 32 - ALLALA KUMƐ

Iyipiti Mansɛ Sanka-Koe Banbɛ Ma

¹ Mala birɛ san tan-ni-filɛ, wo karɛ tan-ni-filɛ, a tele fɔlɛ ma, Mari kumara n ye tun.

² A ko, “Ile hadama-dan, n sɛbɛna-kumɛ kɛ latenbi Iyipiti mansɛ ma. A fɔ a ye ko a ara a nyɛrɛ lɔn yarɛ la sibole doinu tɛma. Kɔnɔ a mani de dɔrɔn iko banbɛ min si yi ragbesi bɛ rɔ ka dundi tugu a kian la.

³ Sibolo-siyamɛnu ba anu kundɛn tumɛ min, nde si ale banbɛ bira nna yalɛ la. Anu si a masagan gbole ma.

⁴ N si a gbesi dugi la. Kona anubɛ soge min bɛɛ ye duninya rɔ, n si wo bɛɛ kele. Anu ni na a dɔn sa!

⁵ N si a su-tulinɛ wo lakɛ a rɔ kɔnkɛnu anubɛ lɛɛnu ma.

⁶ N si a yele rawuya furr, ha a ni ma gboron-gboronna-yi la kɔnkɛ bɛɛ ma.

⁷ N tenbi a halakiyi wo kun na, n si banda-finyɛ anubɛ lolenu yamatogon pinpi la. Banda-finyɛ si sa tele ya ma, ado karɛ ti gbɛ.

⁸ N si wan-takanɛ bɛɛ ladufen ka pinpi burun duninya mumɛ kun na. Nde, i Tigi Mari kan le kɛ la.

⁹ “N ba a kasara-nya fɔ mɔgɛnu ye, ale ma minnu wara-koe lamɔɛn bɛ, sibolo-siyaman kɔndɔ si fili.

¹⁰ N bi min sigila a ma, wo si sibolo-siyaman maban. N ba nna faan layigi, mansɛnu si to yɛrɛyɛrɛnna kilan bolo. A wa bui lunyɛ min, mansɛ wonu si to buila kumakɔɛ bolo ka a tɛgɛ anu niyila ko ma.

¹¹ “Nde, i Tigi Mari ara a fɔ Iyipiti mansɛ ye ko fɔ Babilɔn mansɛ wa na faan la a kan ma.

¹² N si a ma, sibolo-karagbɛlɛnu ni na ata mɔgɛnu dama faga tɛrr! Ala mɔgɔ wo, anubɛ a wasinɛ min bɛɛ rɔ wo, anu dama si halaki pɔ!

¹³ N si anuna ninki bɛɛ halaki minnu bi anu de-nyinina anuna yi-bi-tinɛnu tɔ. Mɔgɛ anubɛ ninki-wo-ninki ti taran tun minnu si yi dundu.

¹⁴ Wo kɔma, n si a ma, yinu ya ma ni sɔ tun. Bɛnu si yigi anu worɔn la a kilɛ fɛ. Nde, i Tigi Mari kan le kɛ la.

¹⁵ N ba Iyipiti ma tonbɔn la tumɛ min ka a mɔgɛ bɛɛ kasara tɛrr, anu si a lɔn wo rɔ ko Mari le nde la.

¹⁶ Sɛbɛna-kumɛ kɛ si ma kalama la. Sibolo-gbɛrɛ-musinu tenbi dila Iyipiti anubɛ ala mɔgɛnu kasara-nyala ko la, anu bi kalama kɛ bɔla. Nde, i Tigi Mari kan le kɛ la.”

Lakira Wara-Koe

¹⁷ Mala birɛ san tan-ni-filɛ, wo karɛ tan-ni-filɛ, tele tan-ni-loli nyɔgɛ ma, Mari kumara n ye.

¹⁸ A ko, “Ile hadama-dan, di Iyipiti mɔgɛnuna ko la. Anu natuntun sibolo-tagbɛlɛmɛ doinu ma lakira.

¹⁹ “Anu manyinika ni anu miri ko anu kin sibole doinu ko, nyɛ? Ade! Anu si ta anu sa Alla-lɔnbɛlɛnu tɛma lakira.

²⁰ “Iyipiti kɛnu si faga ka kofu mɔgɛ doinu ma minnu kunyɛ tora kɛlɛ rɔ nun. Faan rabɛnnɛ anu dama faga-koe la.

²¹ Kurugbɛnu wo, anubɛ minnu kofura Iyipiti ma kɛlɛ rɔ wo, wonu si Iyipiti kɛnu sɛnibɔ lakira. Anu si a fɔ anu kulu-mayɛlɛnɛ la ko, ‘Alla-lɔnbɛlɛ minnu kunyɛ tora kɛlɛ rɔ, wonu denu bara na ma taran kɛ la, ado anu sanɛ yan tɔ kɛ.’

^22-23 “Asiriya kɛlɛ-dan minnu bi lakira nyɔ, anu dama kunyɛ tora kɛlɛ le tɔ nun, ado fɔlɔ nun, anu bi nyamanɛ bɛɛ rakilanna kɔnɔ anu denu kanbɛ tara le fɔ lakira kɔma pon!

^24-25 “Ilam kɛlɛ-dannu fanan bi lakira nyɔ. Alla-lɔnbɛlɛ kɛnu bi anu niyi la tumɛ min, anu bi mɔgɛnu takilanna kɔnɔ anu dama kunyɛ tora kɛlɛ rɔ nun. Kaka, anu faganɛ sanɛ lakira miliyɛ rɔ, ado anuna ban-bole anubɛ kɛlɛ-dannutɛ mara kelen na.

²⁶ “Misɛki soe anubɛ Tubali soe kɛlɛ-dannu fanan bi anu fɛ nyɔ lakira. Alla-lɔnbɛlɛ kɛ minnu bi mɔgɛnu takilanna nun, kɛlɛ tara wonu dama la lakira.

²⁷ Anu ma anu togon a kin na iko kurugba fɔlɔtɛ minnubɛ anuna kɛlɛ-kɛ-mirannu togonta anu nyɔgɔn fɛ. Anuna faannu sanɛ anu kun kɔrɔ, anuna nɛgɛ-walannu manɛ anu tore la. Fɔlɔ nun, kɛlɛ-kurugbɛ kɛnu denu taranta anu yogenu takilanna.

²⁸ “Iyipiti mansɛ fanan ramɔsɔkɔnnɛ si taran Alla-lɔnbɛlɛ wonu tɛma minnu kunyɛ tora kɛlɛ rɔ.

²⁹ “Idɔm mansɛnu anubɛ a mɔgɔ-banu fanan bi lakira nyɔ. Fɔlɔ nun, mɔgɔ-makawanɛ le anu na kɔnɔ kaka, anu bara kofu Alla-lɔnbɛlɛ kɛlɛ-dannu ma lakira minnu kunyɛ tora kɛlɛ rɔ.

³⁰ “Kantɔ-nyamani-kun-tiginu fanan bi nyɔ. Saidon kɛnu fanan bi nyɔ. Fɔlɔ nun, anuna kɛlɛ-dannu bi mɔgɛnu takilanna kɔnɔ kaka, Alla-lɔnbɛlɛ wonu kunyɛ tora kɛlɛ rɔ. Anubɛ lakira-dugurɛn-kɔrɛnu bi miliyɛ ratagamana.

³¹ “Iyipiti mansɛ anubɛ ala kɛlɛ-dan minnu kunyɛ tora kɛlɛ rɔ, wonu ba mɔgɛnu yen ko wonu bara kofu anu ma lakira, wo si diya anu ye koikoi! Nde, i Tigi Mari kan le kɛ la.

³² “N ya a ma, Iyipiti mansɛ ya mɔgɔ-nimɛnu takilan, ado anubɛ ala kɛlɛ-dannu si faga kɛlɛ rɔ. Anu si wonu togon kɛlɛ-den Alla-lɔnbɛlɛ wonu fɛ. Nde, i Tigi Mari kan le kɛ la.”