Isikiyɛli 30 - ALLALA KUMƐ

Iyipiti Tɔrɔ-Koe Mari Bolo

¹ Mari ara a fɔ n ye tun ko,

² “Ile hadama-dan, i ni wɔlɔyiya-kumɛ kɛ latenbi Iyipiti kɛnu ma. Nde, wo Tigi Mari ye min fɔla, i ni wo fɔ anu ye i kulu-mayɛlɛnɛ la. Anu kilan-tele ye nala,

³ ado nde, Mari ye anu tɔrɔla tele min ma, wo ara gbɛrɛn. Wo si ma tele-finyɛ la sibole bɛɛ ye.

⁴ Kɛlɛ si taran Iyipiti nyamanɛ rɔ. Gbɛlɛyɛ si taran Sudan nyamanɛ rɔ. Mɔgɔ-siyaman si faga Iyipiti nyamanɛ rɔ. Anu si nyamanɛ wo rakolonya ka a kasaranɛ to.

⁵ “N ya kɛlɛ-dan minnu masan Sudan, Libiya, Lidiya, Arebiya, anubɛ Kubi nyamanɛnu tɔ, kɛlɛ wo si wonu faga. Hali n nyɛrɛta mɔgɛ donu si taran mɔgɔ-faganɛ wonu tɛma.

⁶ “Nde, Mari ko ka a bi Migidɔli soe kan tɔ ha ka ke Asuwan soe dugu la, Iyipiti kɛlɛ-den-masannɛ bɛɛ kunyɛ si to-a-rɔ. Iyipiti kɛlɛ-den-wasinɛ bɛɛ kunyɛ si to kɛlɛ wo rɔ. Nde, wo Tigi Mari ara ban kɛ fɔla.

⁷ Nyamanɛ wo si kasara ka tenbi nyamanɛ bɛɛ la. A soe bɛɛ kasaranɛ si to pɔ!

⁸ N ba tɛ tugu Iyipiti nyamanɛ la, anubɛ a kɛlɛ-den-masannɛ bɛɛ kunyɛ wa to-a-rɔ, bɛɛ ye a lɔnna wo le ma ko Mari le nde la.

⁹ “Iyipiti kasara-tele wa na, Sudan kɛ minnu ma sui wɛ kɛlɛ ma, n si kilayɛnu nata kulɔnnu tɔ ka ta anu nalɔn. Wonu fanan kun ma si kɔ.

¹⁰ “Nde, wo Tigi Mari ko n si Babilɔn Mansa Nɛbukanasa ma Iyipiti nɔnfulu-bilɛ la. Fenfen ti taran anu bolo ale mansɛ kɔma.

¹¹ Anubɛ ala kɛlɛ-den-karagbɛlɛnu si nyamanɛ wo tinya pɔ! Anu ba Iyipiti kɛlɛ, suyi si taran Iyipiti kan-tinɛ bɛɛ rɔ.

¹² N si Nayɛli bɛ gbala a worɔn la todo! N si Iyipiti latenbi karagbɛlɛnu ma ka a mara. Sibolo-gbɛrɛ doinu si nyamanɛ wo bɛɛ tinya. Nde, Mari le wara kɛ fɔ.

¹³ “Nde, i Tigi Mari ya a fɔ ko a bɛsi wo, a batoli-fen wo, n si wo bɛɛ kasara Mɛmfisi soe burɔ pɔ! Mɔgɔ-wo-mɔgɔ ti taran tun min si Iyipiti mara. N si bɛɛ rakilan.

¹⁴ N si Iyipiti dugulɛ ma tonbɔn la. N si tɛ tugu Sowa soe la min bi Iyipiti kan tɔ. Anuna so-karantan min tɔgɛ Tibisi, n si wo tɔrɔ feu!

¹⁵ Iyipiti so-latankani-wɛ, Pɛlusiyam, wo si nta diminya-dan lɔn. N si Tibisi fen-kolomɛ bɛɛ tinya pɔ!

¹⁶ N ba tɛ tugu Iyipiti nyamanɛ la, Pɛlusiyam soe tɔrɔyanɛ si to dumɛ bolo. N si Tibisi soe tarɛ labui fugbu! Yi si soe wo yamatogon.

¹⁷ Hiliyapolisi so-burɔ-keminɛnu wo, Bubasiti so-burɔ-keminɛnu wo, wonu kunyɛ si to kɛlɛ rɔ. Anuna mɔgɛ toenu si to biralɛ rɔ.

¹⁸ N ba Iyipiti fanka keri, pinpi si burun Tapenisi soe kun na bɛff! Anu wasinɛ anuna fanka minnu tɔ, n si tɔn sigi wonu na. Banda-finyɛ si Iyipiti mumɛ yamatogon bɛff! So-burɔ-mɔgɛ bɛɛ si to biralɛ rɔ.

¹⁹ N ba Iyipiti nyamanɛ tɔrɔ ka tumɛ min, anu bi a lɔnna wo le ma ko Mari le nde la.”

Iyipiti Mansɛla Fanka-Dɛ-Keri-Koe A Ma

²⁰ Mala birɛ san tan-ni-kelan, wo karɛ fɔlɛ, tele wɔrɔnfilɛ ma, Mari kumara n ye. A ko,

²¹ “Ile hadama-dan, n bara Iyipiti mansɛ bole rakeri. Mɔgɔ-wo-mɔgɔ ma a makiri a kɛndɛya-koe la. A ti ke faan birala a la tun.

²² Nba, nde, wo Tigi Mari ye min fɔla, wo le kɛ la ko Iyipiti mansɛ yoge le nde la. N si a bolo filɛ bɛɛ rakeri, a rakerini-kɔrɔ wo, a kɛndɛ wo. Ala faan si porokɔlɔ a bolo la ka bui.

²³ N si Iyipiti kɛnu tanyɛnsɛn duninya bɛɛ rɔ.

²⁴ Wo kɔma, n si Babilɔn mansɛ bole ragbɛlɛya ka faan don a bolo. Kɔnɔ Iyipiti mansɛ, n si wo bolo filɛ rakeri. A ni to kurunna dumɛ bolo. A ni faga a yogenu yala fuyan!

²⁵ Ɔnde, n si Iyipiti mansɛ fanka mayigi ka Babilɔn mansɛ fanka mayɛlɛ. N ba nna faan don a bolo, a wa faan wo sungban telen Iyipiti la, bɛɛ si a lɔn wo rɔ ko Mari le nde la.

²⁶ N si Iyipiti kɛnu tanyɛnsɛn duninya rɔ. Wo kɔma, anu si n lɔn ko Mari le nde la.”