Isikiyɛli 3 - ALLALA KUMƐ

¹ Mari ko, “Ile hadama-dan, gbole kɛ dɔn. I wa ban a dɔnna, i ni ta kuma Isirɛla mɔgɛnu ye.”

^2-3 A ya gbole wo don n bolo. A ko, “Ile hadama-dan, gbole kɛ dɔn. I ni fa a la pen!” Gbole kɛ ladon n da rɔ, a tuninyanɛ iko liyi.

⁴ A ko, “Ile hadama-dan, ta Isirɛla mɔgɛnu bara. N ba fenfen fɔ i ye, i si wo latenbi anu ma.

⁵ N sa i latala sibolo-gbɛrɛnu ma i ti minnu kan lamɔɛn fɔ ita mɔgɛnu, Isirɛla mɔgɛnu, kɔni.

⁶ Ni n ya i lata sibolo-gbɛrɛnu denu bara i ti minnu kan lamɔɛn, i wa kuma anu ye, anu si anu tole masɔ i la.

⁷ Ni Isirɛla mɔgɛnu ma anu tole masɔ i la, i kana tɛrɛna wo la bawo anu ma anu tole masɔ nde fɔlɔn na. Anu dama tole gbɛlɛ, ado anu sa n gbiliyala.

⁸ Woletɔ n si ile fanan ma kiri-n-ko-mate la iko anu denu.

⁹ N si i ragbɛlɛya iko farɛ ka i yisi gbɛlɛya iko kuri. Hali i ma kilan mɔgɔ-murutiyanɛ wonu na mumɛ!

¹⁰ “Ile hadama-dan, i tole masɔ a kin na! I ni i hɛnkili to kumɛ kɛ damasi ko.

¹¹ I na-kelen-nyɔgɛ minnu bi biralɛ rɔ i fɛ Babilɔn nyamanɛ rɔ, ta wonu bara. Nde, wo Tigi Mari Alla ara kumɛ minnu don i da rɔ, i ni ta wonu fɔ anu ye, a biranɛ anubɛ a birabɛlɛ anu bolo.”

¹² Wo kɔma, Marita Sɛnbɛ ya n bi tugbɛ! Marita gbiliyɛ ye bɔla tumɛ min, n ya kuman-kan-belebele-wɛ lamɔɛn n kɔma.

¹³ N ya nima-fan wonu kanban-tagbesi-kan anubɛ anu kinta-kan lamɔɛn iko dugi wa yɛrɛyɛrɛn.

¹⁴ Marita Sɛnbɛ ye tala n na tumɛ min, ata fanka donta n tɔ a nya-bɛrɛbɛrɛ-wɛ ma. Yisi-bɔɛ donta n tɔ dɔgɔma-ma-de!

¹⁵ N tara fɔɔ Abibu kɔnkɔ-kuma so-burɔ-mɔgɔ-biranɛnu siginɛ kan min Kiba bɛ fɛ. Ka a tɛgɛ n bara min tayen ko-rayirɛ kɛ rɔ, tele wɔrɔnfila, n mankulan bɔnɛ n ma nyɔ kilan bolo.

Isikiyɛli Ma-Koe Fɛ-Biralɛ la Isirɛla Mɔgɛnu Kun Na

¹⁶ Tele wɔrɔnfilɛ wo tenbinɛ, Mari ya a fɔ nde, Isikiyɛli ye ko,

¹⁷ “Ile hadama-dan, n bi i sigila Isirɛla mɔgɛnu kuma ka anu fɛ-bira. N ba min fɔ i ye, i ye anu makawandila wo le la.

¹⁸ Ni n ya a fɔ ko karagbɛlɛ do ye nala fagala, ile ma sɔn tala wo makawandila alako a ni bɔ a sɔn-yogomɛ wo da la ka kisi, ni wo fagara ko-yogomɛ wo kun na, ile hadama-dan gbɛ le wo la, ado n si i bira wo yili la, yɔ!

¹⁹ Kɔnɔ ni i ya a makawandi, a ma a fara a sɔn-yogomɛ wo la, ni a fagara ala ko-yogomɛ wo kun na, n bolo sa i la wo rɔ.

²⁰ “Mɔgɔ-telennɛ wa don ko-yogoma-kɛ rɔ, n si gbɛrɛ lasigi a ye, a ni faga. Ni i ma wo tigi makawandi, a si faga a sɔn-yogomɛ wola ko la. N ti n miri a sɔn-nyimɛ wo ma tun muk, ado n si i bira wo yili la.

²¹ Ni i don ya a makawandi, a ni fara a sɔn-yogomɛ wo la, a ni a tole masɔ i la, ka fara ko-yogoma-kɛ la, a ti faga, ado n bolo sa i la wo rɔ.”

Isikiyɛli Ma-Koe Bobe La

²² N ya Marita Sɛnbɛ sɔrɔn tun. A ya a fɔ n ye ko, “I lasɔ. I ni ta lɛɛ rɔ. N si kuma i ye nyɔ.”

²³ Woletɔ n tara lɛɛ rɔ. N ya Marita wan-belebele yen ko-rayirɛ rɔ nyɔ fanan iko n ya a yen Kiba bɛ dafɛ nya min. N ya n naburun a ma dugu ma tun

²⁴ kɔnɔ Marita Sɛnbɛ donta n tɔ ka n nasɔ. Mari ya a fɔ n ye ko, “Ta bɔn la. I ni dɛ rasɔgɔ i ma.

²⁵ Anu si ile hadama-dan kiri yili la lɛnlɛn, min si a ma, i ti ke bɔla luyi ma.

²⁶ N si i ma bobe la alako i kana na mɔgɔ-murutiyanɛ kɛnu makawandi.

²⁷ N ba kuma i ye tun, n si a ma, i ni kuma. Nde, wo Tigi Mari Alla ara kumɛ min fɔ ile ye, i si na wo fɔ anu ye. Donu si anu tole masɔ i la, donu si anu ban ila kumɛ la bawo mɔgɔ-murutiyanɛ le anu na.”