Isikiyɛli 28 - ALLALA KUMƐ

Taya Mansɛ Kuma-Koe Mari Bolo

¹ Mari ya a fɔ n ye ko,

² “Ile hadama-dan, i ni nde, wo Tigi Mari kuman-kan kɛ latenbi Taya mansɛ ma. A fɔ a ye ko a kɔrɔbinɛ wasinteyɛ la a bolo. A ye a nyɛrɛ mala Alla la. A ye a fɔla ko a siginɛ Allala mansaya-waganɛ rɔ, kɔgɔ-yi ye ala foolɛ rɔ. A ye a nyɛrɛ mala iko Alla, ado hadama-den-gbansan le ale la.

³ A miri ko hɛnkili ye a bolo ka tenbi Danɛli la ko mɔgɔ ti gbundu-ko dogon a ma.

⁴ Ala hɛnkilimayɛ anubɛ ala halliyɛ ara a ma nɔnfulu-tigi la ka sɛnɛ anubɛ wodi-gbɛ sɔrɔn duk!

⁵ A tora halliya-yilayɛnu kɛla ka tɔnɛ sɔrɔn, ado ala nɔnfulu-tigiyɛ wara a ma wasinte la.

⁶ “Nba gbɛ, nde, wo Tigi Mari ko bawo mansɛ mirinɛ ko a hɛnkili ye iko nde, Mari Alla,

⁷ nde, Mari si a yoge karagbɛlɛnu natugu a kan ma. A ara min dama sɔrɔn ala hɛnkili anubɛ halliyɛ wo rɔ, anu si fen-nyimɛ wo bɛɛ kasara.

⁸ Anu si a faga ka a furi lakɛ lakira kɔgɔ-yi rɔ.

⁹ Anu ba na a faga-tinɛ tumɛ min, a si to a fɔla ko Alla le ale la, wa? Anubɛ a fagalɛ yakɔrɛ wa ma kelen na, a si a lɔn worɔ ko hadama-den-gbansan le ale la. Alla ma ale la feu!

¹⁰ Sibolo-gbɛrɛnu si a faga iko wuli. Nde, wo Tigi Mari le wara kɛ latɛgɛ sɔn!”

Taya Mansɛ Bu-Koe

¹¹ Mari ya a fɔ n ye tun ko,

¹² “Ile hadama-dan, ile fanan ni saya-sigi sa i sɛbɛ-kuna-wɛ la ka a tɛgɛ Taya mansɛ kɛ laban-bole ma. Nde, wo Tigi Marita kumɛ kɛ latenbi ko ale Taya mansɛ, ko-latelenni-misalɛ le ale la nun. A hɛnkili ye nun, ado a mafɛlɛn di.

¹³ A siginɛ nde, Allata nakɔɛ rɔ nun Idɛn. Kuru-da-gbɛlɛnu denu manɛ a makiri-fan la. Wonu tɔgɛ le kɛnu na, rubi wo, daimon wo, topasi wo, bɔrɔ wo, ɔnikisi wo, yasipa wo, safaira wo, ɛmarɔdi wo, anubɛ tukɔsi. Kuri bɛɛ siginɛ sɛnɛ tɛma. Kɛ bɛɛ rabɛnta a ye, kebi a bɔnkɛ kɔra lunyɛ min.

¹⁴ N ya melika-makilannɛ do to nyɔ-mansɛ makandan tinɛ. A siginɛ nta kɔnkɔ-sɛnimɛ kuma kuru-da-gbɛlɛnu tɛma silɛ ye tiila minnu ma.

¹⁵ Ka a bi a dan lunyɛ ma ha ka a sigi ala ko-yogoma-ladan-wati la, a kɛ-nya bɛɛ telenta.

¹⁶ A nyagbanɛ fen-mayirɛ anubɛ fen-san la nun kɔnɔ wo le ya a ma, a donta karagbɛlɛyɛ anubɛ hakɛ kɛ rɔ. Wo le ya a ma, n ya a gben nta kɔnkɔ-sɛnimɛ kuma ka a lamiliya. Melika min bi a makandanna, wo ya a gben kuru-da-gbɛlɛ malan-malannɛ wonu tɛma.

¹⁷ Bawo a ara a yen min kɛ ko a mafɛlɛn di, wo le wara a ma, a ara wasi. A mankan ara a ma, a ye kun-takolonya-koenu mala. Ka a tɛgɛ wo ma, n ya a fɛrɛn dugi la ka a to sani nyɔ alako mansɛ doinu ni kawa a ma nya min.

¹⁸ A ya ko-yogoma-siyaman ma ala sanni-kɛ-tinɛ anubɛ fen-mayira-tinɛnu tɔ ha a ya ala batoli-kɛ-tinɛnu pirinkan. Woletɔ n ya ala soe mintan gburr! Mɔgɔ ti fenfen yen soe wo burɔ tun fɔ ta-gbangban.

¹⁹ A wara-koe ara ka-a-la feufeu! Sibole min bɛɛ ya a lɔn nun, wo bɛɛ kumakɔra kilan bolo. Wonu bi kilanna, ado a wara-koe ara ka-a-la habadan!”

Saidon Kɛnu Kuma-Koe

²⁰ Mari ya a fɔ n ye ko,

²¹ “Ile hadama-dan, i ni i ya-lamunun Saidon soe la ka a makuma.

²² Nde, i Tigi Marita kumɛ latenbi Saidon kɛnu ma. Saidon yoge le nde la. N bi nala min sigila Saidon soe ma, mɔgɛnu si n matɔgɔ wola ko la. N ba ban Saidon kɛnu tɔrɔla ka nta sɛninyɛ yira mɔgɛ bɛɛ la, mɔgɛnu bi a lɔnna wo le ma ko Mari le nde la.

²³ N si kirayɛ latugu anu kun na ka dugu-kole ban anu yele la yɛgbɛ! Anu yogenu si kɛ anu ma kan-tinɛ bɛɛ rɔ. A mɔgɛnu si to fagala. Wo kɔma, anu si a lɔn wo le ma ko Mari le nde la.”

Duwa-Koe Isirɛla Ye

²⁴ Mari ko, “Sibole min bɛɛsi ye Isirɛlala foolɛ rɔ, minnu tɛgɛnɛ anu tɔ, wonu ti ma gbankinya anubɛ gbangbufe la Isirɛla mɔgɛnu ye tun. Wo si a ma, wonu ni n lɔn anu Tigi Mari la.”

²⁵ N Tigi Mari ya a fɔ ko, “N bara Isirɛla mɔgɛ minnu tanyɛnsɛn sibolo-gbɛrɛnu tɛma, n si wonu kundɛn Isirɛla nyamanɛ rɔ tun. Wo si a ma, sibole bɛɛ ni a lɔn ko n sɛnima. Isirɛla mɔgɛnu si sigi anu halala-dugi rɔ tun n ya min di nta wɔli-kɛla Yakoba ma, kɔni.

²⁶ Anu si sigi nyɔ lafɛrɛ rɔ. Anu si bɔnnu sɔ nyɔ ka ki-fannu ki. Sibole minnu tɛgɛnɛ anu tɔ, n si wonu tɔrɔ alako anu kanannɛ ni to nya min. Anu si a lɔn wo le ma ko anuta Mari Alla le nde la.”