Isikiyɛli 25 - ALLALA KUMƐ

Mari Kuma-Koe Amonnu Ma

¹ Mari ya a fɔ n ye ko,

² “Ile hadama-dan, i ni i ya-lamunun Amon nyamanita-mɔgɛnu wara la ka anu makuma.

³ Anu ni anu tole masɔ nde, wo Tigi Mari kuman-kan la. Anu ya nna Bato-Bon-latinyanɛ yen min kɛ, wo ya anu nasewa. Anu ya Isirɛla nyamani-tinyanɛ yen min kɛ ka a nyamanita-mɔgɛnu fanan yen birɛ rɔ, wo fanan ya anu nasewa.

⁴ Anu sewanɛ min kɛ, sibolo-gbɛrɛ minnu bi tele-bɔɛ wara la wulɛ rɔ, n si a ma, wonu ni na anu nɔ. Wonu si na anu dagɛ makɛ ale Amonnuna nyamanɛ rɔ ka sigi nyɔ. Kɔn-gbɔɛ anubɛ nonɛ minnu bi nyɔ anuna ko la, wonu si na wonu bɔ anu bolo ka wonu ma anu beli-fan la.

⁵ N si anuna so-karantan Raba ma nyomɛnu namara-tinɛ la, ado n si ale Amon nyamanɛ bɛɛ ma sagɛnu namara-tinɛ la. Ka a tɛgɛ wo ma, anu si a lɔn wo le ma ko Mari le nde la.

⁶ “Nde, wo Tigi Mari ko Amonnu bara sewa boloko-yogomɛ-kɛ min kɛ Isirɛla tinya-koe la, anu bara nyagalen-haka-yasɛ dɔn.

⁷ N si anu don sibolo-gbɛrɛnu bolo. Wonu si anuna mirannu kankan anu ma. N si anu halaki ha ka anu sibole bɛɛ ban. Anu ti anu halala-nyamanɛ sɔrɔn tun! Wo si a lɔn wo le ma ko wo Tigi Mari le nde la.”

Mari Kuma-Koe Mohabu Kɛnu Ma

⁸ “Nde, wo Tigi Mari ko Mohabu nyamanita-mɔgɛnu bara a fɔ min kɛ ko Yuda kɛnu bara ma iko nyamanɛ toenu,

⁹ n si a ma, anu yogenu ni na bui anuna dan-ma-soenu ma, katarala anuna so-nyima-wɛ kɛnu ma, Bɛti-Yɛsimoti wo, Beyali-Meyɔn wo, anubɛ Kiriyateyim.

¹⁰ N si a ma, sibolo-gbɛrɛ minnu bi tele-bɔɛ wara la wulɛ rɔ, wonu ni na ka Mohabunu anubɛ Amonnu nɔ. Mohabunu fanan sibole bɛɛ si ban!

¹¹ N si Mohabu kɛnu tɔrɔ woletɔ anu si a lɔn ko Mari le nde la.

Mari Kuma-Koe Idɔm Kɛnu Ma

¹² “Nde, wo Tigi Mari ko Idɔm nyamanita-mɔgɛnu fanan bara tayili-sara-yogomɛ min kɛ Yuda mɔgɛnu na, wo ara a ma, Idɔm kɛnu bara to yiliki-banbɛlɛ kɔrɔ.

¹³ Woletɔ n bara a latɛgɛ ko fɔ n ba Idɔm kɛnu tɔrɔ ka mɔgɛ bɛɛ faga anubɛ anuna kolo-fannu. Ka a dabira Tɛma soe ma ha ka ta a sigi Didan soe la, n si nyamanɛ wo bɛɛ tinya pɔ, ado nyɔ-mɔgɛ bɛɛ kunyɛ si to kɛlɛ rɔ.

¹⁴ Nta Isirɛla mɔgɛnu si anu tayili sara Idɔm kɛnu na n ye. Anu denu si a ma, Idɔm kɛnu ni nna yisi-bɔɛ dan-natenbi lɔn. Idɔm kɛnu si a lɔn n si n tayili sara mɔgɛnu na nya min. Nde, wo Tigi Mari le ya kɛ fɔ.

Mari Kuma-Koe Filisitinu Ma

¹⁵ “Nde, wo Tigi Mari ko Filisitinu bara anu tayili sara anu yogo-kɔrɔkɔrɛnu, Yuda kɛnu na min kɛ, ado anu ya anu halaki ka anu serendi yisi-bɔɛ bolo,

¹⁶ woletɔ n bara a latɛgɛ ko n si bui Filisitinu ma ka anu ban feu! Min bɛɛ siginɛ Filisitinuna lɛɛ wo rɔ, n si wo bɛɛ kasara pɔ!

¹⁷ N si anu tɔrɔ kosɛbɛ ka n tayili sara anu na. Anu si nna yisi-bɔɛ lɔn. Wo kɔma, anu si n lɔn Mari la, yɔ!”