Isikiyɛli 24 - ALLALA KUMƐ

Daga-Ranɔgɔnɛ Wara-Koe

¹ Mala biralɛ san kɔnɔntɔ nyɔgɛ a karɛ tan nyɔgɛ, wo tele tan nyɔgɛ ma, Mari kumara n ye.

² A ko, “Ile hadama-dan, i ni bi tele sɛbɛ bawo Babilɔn mansɛ ye Yerusalɛm kɛlɛ dabirala tele kɛ le ma.

³ Nna tili kɛ rakaran nna mɔgɔ-murutiyanɛnu ye.” Nde, wo Tigi Mari ko, Dagɛ lafa yi la ka a sigi tɛ rɔ.

⁴ I ni sogo-tɔnɔma-tinɛnu sa a rɔ, a kɛɛ anubɛ a wore. Sogo-tɔnɔmɛ ye kole minnu ma, i ni wonu fanan kɛ dagɛ rɔ.

⁵ I ni kɛ bɛɛ bi saga-tɔlɔnɛ le tɔ. I ni sɔgɛ kɛ dagɛ kɔrɔ gbobi! A ni te ha a kolenu ni ma yɔgbɔ!

⁶ “Nde, wo Tigi Mari ko mɔgɔ-fagalɛnuta soe dankani de! Soe wo mani de iko dagɛ min tanɔgɔnɛ kɔtikɔti! Woletɔ i ni sogo-kundi wonu nabɔ dagɛ wo rɔ kelen-kelenyɛ ma ka a rakolonya filili!

⁷ I ni wo ma bawo anu taranta mɔgɛnu fagala soe burɔ tumɛ min, anu yele ma tinti dugi ma, a si don dugu la kan min. Anu yele yigira fara-gbaran ma, bɛɛ si a yen kan min.

⁸ N bara yele wo to gbɛ rɔ nyɔ, ado tayili-sara-sɔgɛ ye yele wo la.

⁹ “Nde, wo Tigi Mari ko mɔgɔ-fagalɛnuta soe dankani de! Nde nyɛrɛ si a mintan-sɔgɛ ladɛn.

¹⁰ Wo ni na sɔgɔ-siyamɛ la tun! Wo ni tɛ lafɛ ka soge wo te ha a ni ma yɔgbɔ! A ni te ha yi ni gbala a rɔ. A ni te ha kole wonu ni kerun!

¹¹ Wo kɔma, i ni daga-rakolonyanɛ wo sigi ta-wɔlɔn rɔ ha a silɛɛ ni mɔ puipui! Dagɛ wo burɔ-nɔgɛ bɛɛ wa mintan, dagɛ wo sɛninyanɛ si to.

¹² “Hali n ya wo dama ma, tɛ ti ke nɔgɛ wo damasi mintanna ka a ban.

¹³ Yerusalɛm soela sɔn-yogomɛ ara a kɔsɔ feu! Hali n ya n karan ka a sɛninya, a kɔsɔnɛ si to. A ti ban sɛninyala fɔ n ba nna diminya-wɛ bɛɛ labɔ a ma.

¹⁴ Nde, wo Tigi Mari le wara kɛ fɔ. Nta diminya-lakɛ-wati ara ke a ma. N ti kinikini a ma tun fɔ ka ala so-burɔ-mɔgɛnu bira iko hakɛ-kɛlɛnu. A fɛrɛ sa fɔ a wa tɔrɔ le serr! Nde, a Tigi Mari kan le kɛ la.”

Nɛbi Isikiyɛlila Musi Faga-Koe

¹⁵ Mari ya a fɔ n ye ko,

¹⁶ “Ile hadama-dan, n si ila musi bi i bolo tiriya! Musi wo di i ye i ta-nyɔgɛ bɛɛ ko, ado i yasere-masa-tina sa. I kana di hali ka i ya-yi labɔ,

¹⁷ ado mɔgɔ-wo-mɔgɔ kana i yen yɛlɛla a ma fekufeku! I kun-nakolɔn kana to anubɛ i kin-takolɔn kana to fanan iko mɔgɛnu si a ma nya min saya-di-kɛ tinɛ. Mɔgɔ kana a lɔn defan ko i ye di-kɛ le kun na. I kana i yakɔrɛ dogon. I kana saya-di-kɛlɛnuta fen dɔn.”

¹⁸ Tele wo nyɛrɛ sɔgɔma, nde, Isikiyɛli ye kumala mɔgɛnu na nun. Wo wulɔn wurɛ la, nna musi tɛgɛra a ma. Wo banda kɛ subaga ma, n ya a ma iko Mari ya a fɔ n ye nya min.

¹⁹ Mɔgɛnu bi n nyinikala ko, “Nfenna i sa dila? Kɛ kɔrɛ ye nfen na i bolo?”

²⁰ Woletɔ nde, Isikiyɛli ya a fɔ anu ye ko, “Mari le kumara n ye

²¹ a ko n ni sarakanɛ kɛ latenbi wo ma. A ko wole wasinɛ Bato-Bɔn sɛnbɛ le tɔ. A ko nyɔ di wo ye ka a mafɛlɛn kɔnɔ hali wo, a ko ale le si sɔn nyɔ-latinya-koe ma. A ko wola dan minnu tonɛ Yerusalɛm, wonu kunyɛ bɛɛ si to kɛlɛ rɔ terr!

²² Wo kɔma, a ko wole fanan si a ma iko nde ara a ma nya min kɛ la. Wo ti wo yakɔrɔ dogon. Wo ti saya-di-kɛlɛnuna fen dɔn.

²³ Wo kun-nakolɔn ti to anubɛ wo kin-takolɔn ti to fanan min si a yira mɔgɛnu na ko diyi ye wo yisi rɔ. A ko wo si bara ka a tɛgɛ wo hakɛnu ma, ado wo si to gbɛngbɛrɛnna wo nyɔgɔn ma.

²⁴ A ko wo si a ma iko nde fanan bara a ma nya min kɛ la. Kɛ si ma tamasere la wo ye. A ko kɛ dama wa ma wati min, wo si a lɔn worɔ ko wo Tigi Mari le ale la.”

²⁵ Mari ko, “Nba, ile hadama-dan, anu wasinɛ Bato-Bɔn tagbɛlɛ min tɔ, n si wo bi anu bolo, ado nyɔ di anu ye ka ta a mafɛlɛn. N si anuna dannu toronde anu na.

²⁶ N bi kɛ mala tele min na, mɔgɛ do min ya a nyɛrɛ bɔ kasarɛ kilɛ fɛ, wo si na a dantɛgɛ wo ye.

²⁷ Wo tele nyɛrɛ ma, ile, Isikiyɛli dɛ si fulen tun ka kuma ale ye. Wo tele nyɛrɛ ma, ile si ma tamasere la mɔgɛnu ye. Anu bi a lɔnna wo le ma ko Mari le nde la.”