Isikiyɛli 23 - ALLALA KUMƐ

Hakɛ-Kɛla-Tirisan Filɛ Wara-Koe

¹ Mari ya a fɔ n ye ko,

² “Ile hadama-dan, na-kelen-nyɔgɔma-musu fila le taranta nyɔ nun.

³ Anu dɔgɔ wati min Iyipiti nyamanɛ rɔ, anu ya kei-koe dabira ka ma yɛlannu na nyɔ. Keinu tolonta anu kinyɛ la nyɔ ka anu kin-sungbannu tadigin.

⁴ Sunkurun-kinamɛ wo tɔgɛ le Ohola. A dɔgɔmɛ tɔgɛ le Oholiba. N ya wonu filɛ furu. Anu ya dannu sɔrɔn n ye. Samariya soe tamasere le Ohola wo la. Yerusalɛm soe tamasere le Oholiba wo la.

⁵ “Hali nna musi le anu na, Ohola tora yɛlɛnyɛ kun na. Asiriya keminɛnu diyara a ye ha ka a dan-natenbi.

⁶ Duruki-bilolamɛ donnɛ kɛlɛ-den-kunyɛ minnu kan na wo, a mɔgɔ-ba wo, a kɛlɛ-kurugba wo, wonu denu bi anu sala a fɛ. Anu dama fonike, ado anu mafɛlɛn di. Kɛlɛ-so-laburilɛ le anu na fanan.

⁷ A ara a nyɛrɛ latenbi Asiriya kɛlɛ-kurugbɛnu ma, ado ala nata wo le wara a ma, a ara a nyɛrɛ latinya Asiriya bɛsɛnu kɔ-koe la.

⁸ Kebi a ya yɛlɛnyɛ dabira Iyipiti wo tumɛ a dennɛ, a ma bɔ wo da kun tɔ. Kebi a denni pɔipɔi, a ya kei-koe dabira. Keinu tolonta a kinyɛ la ka anu sa a fɛ.

⁹ Woletɔ nde fanan ya a latenbi ala Asiriya keminɛ wonu ma bawo wonu di a ye kati!

¹⁰ Wonu ya a mawuran ka ala dannu bi a bolo fɔrɔsɛ la. Wo kɔma, anu ya a faga faan la. I tara kan-bo-kan, musinu dɛ kɛnɛ a tɔgɔ rɔ ka a tɛgɛ a faga-bole ma.

¹¹ “Hali wo bɛɛ ara ke a dɔgɔ-musu Oholiba yala, Yerusalɛm, kɔni, wo kei-koyara ka tenbi a kɔrɔ-musi la yɛlɛnyɛ rɔ, Samariya soe, kɔni.

¹² Wo fanan kei-koyara ha Asiriya mɔgɔ-banu anubɛ nyɔ-kɛlɛ-dannu wara-koe tenbira a kunyɛ kɔma. A so-laburila wo, a kɛlɛ den wo, bɛɛ fonike ado kɛlɛ-duruku-nyimɛ donnɛ anu kan na.

¹³ N ya a yen ko yɛlan-bɛrɛbɛrɛ le ale fanan na. N ya a yen ko wo kei-koyara iko a kɔrɔ.

^14-15 “Oholiba kei-koyara bɛrɛkɛ! Babilɔn mɔgɔ-ba minnuna muninyɛ ladannɛ dandan ma, wonu diyara a ye ha ka a dan-natenbi! Wonu wulennɛ, anu buta kirinɛ kura-hakikɛ la, anu kunyɛ fanan makirinɛ kura-da-gbɛlɛ-sufa do la.

¹⁶ Musi kɛ ya mɔgɔ-ba kɛnuna muninyɛ yen dandan ma tumɛ min, wonu sɔgɛ ya a bira kosɛbɛ! A ya kilayɛnu nata Babilɔn mɔgɔ-ba kɛnu ma ka anu kele.

¹⁷ Wonu fanan dama nara anu sa a fɛ. Wonu ya anu sa a fɛ ha a laban, mɔgɔ-ba wonu sɔgɔ labɔra ale Oholiba la lass!

¹⁸ A ya a mɛlɛn mɔgɛ bɛɛ yala alako bɛɛ ni a lɔn ko yɛlan le. Ale fanan sɔgɔ labɔra n na iko a kɔrɔ-musi sɔgɔ labɔra n na nya min.

¹⁹ Kɔnɔ hali wo, a ma sɛgi kɔma yɛlɛnyɛ rɔ. A taranta yɛlɛnyɛ kun na iko a dennɛ ye Iyipiti nya min nun.

²⁰ A taranta musu-kotɛ keinu denu nyinina alako wonu ni to anu sala a fɛ tun tun. Keminɛ minnu yatelenmɛ manɛ iko sofɛlɛtɛ, wonu denu di a ye. Minnu keiya-yi fanan manɛ iko so-keitɛ, a ye nyinina wonu denu sufa ma.

²¹ Ale Oholiba, Yerusalɛm, kɔni, a di a ye, a ni to yɛlɛnyɛ kɛ kun na iko a dennɛ ya a dabira nya min Iyipiti nun. Keinu tolonta a kinyɛ la nyɔ ka a kin-sungbannu tadigin.

Oholiba Kiti-Koe Alla Bolo

²² “Woletɔ nde, Mari ye a fɔla Oholiba ye ko, ‘Oholiba, ile Yerusalɛm, kɔni, hali a taranta keinu sɔgɔ la ara bɔ i la, n si a ma, anu ni diminya i ma ka na i lamini.

²³ Babilɔn kɛnu anubɛ Kaladiya kɛ minnu bɔra Pikɔdi wo, Sowa wo, anubɛ Kowa, anubɛ Asiriyanu, n si anu damasi ladɛn ila minɛ rɔ. Anu dama kɛlɛ-den-kunyɛnu anubɛ mɔgɔ-banu anubɛ so-laburila-kunyɛ minnu fonike, ado anu mafɛlɛn di.

²⁴ Anu si na i kan ma kɛlɛ-den-siyamɛ la kɛlɛ-kɛ-kirindinu anubɛ miran-madunu-kirindinu na anu bolo ka bɔ kan tɔ. Anu makirinɛ si a mini i ma nɛgɛ-lufɛnu anubɛ kɛlɛ-kɛ-fulɛnu na anu bolo. N si i don anu bolo. Anu ni i kiti anuta sereyanu na.

²⁵ N si a ma, anu ni i tɔrɔ anuna yisi-bɔɛ la bawo nde fanan yisi bɔnɛ i kuma kati! Anu si i sunyɛ anubɛ i tole ka ka ila dannu faga i yala. Anu si wola den-keinu anubɛ dunmusinu kɛndɛ mintan i yala.

²⁶ Anu si ila kurɛnu bɔ i ma ka i mɛlan to. Anu si ila fen-kolomɛ bɛɛ toronde i la.

²⁷ N si tɔn sigi ila kei-koteyɛ la. I dennɛ ya ila kisimiriya-koe minnu dabira Iyipiti, n si tɔn sigi wo bɛɛ la. I ti i yɛ sɔ bɛsɛnu na tun hali ka i miri Iyipiti wara-koe ma.

²⁸ “ ‘Ile Oholiba, Yerusalɛm, kɔni, i sɔgɔ labɔnɛ i yoge minnu na, n si i don wonu bolo.

²⁹ Bawo i gboyanɛ anu ye, i wara tɔrɔ min bɛɛ la, anu si wo bɛɛ bi i bolo. Anu si i mɛlɛn bolokanɛ to ila yɛlɛnyɛ rɔ. Ila kei-koyɛ anubɛ ila yɛlɛnyɛ,

³⁰ wo le wara kɛ bɛɛ lana i ma. I mara yɛlan la sibole bɛɛ ye. I wara i nyɛrɛ latinya anuna bɛsi-kɔ-koe fɛ.

³¹ I wara i kɔrɔ-musi kin-gbɛ bi yɛlɛnyɛ rɔ, woletɔ n si i tɔrɔ iko n ya i kɔrɔ tɔrɔ nya min.

³² I kɔrɔta kumakɔɛ mani de iko a kɛnɛ yi-lafɛ le tɔ. Kɔpu wo kolo, a rayan, ado ile fanan bi wo le nyɔgɔn tɔrɔya sufa minna. Mɔgɛ bɛɛ si i rasɛ ka i lafɛya bawo ita yi-lafɛ wo lafanɛ i kɔrɔtɛ ko.

³³ I kɔrɔ Ohola, Samariya, kɔni, wota yi-lafɛ lafanɛ kilan anubɛ kasarɛ le la. I wa itɛ min, a si i bira ha i sɔndɔmɛ ma ni gboya!

³⁴ I si a min ha i ni a ban fegba! Wo kɔma, i si yi-lafɛ wo gbɛnkian bi ka i kinyɛnu tafarafara wo la yisi-tinya bolo. Nde, wo Tigi Mari kan le kɛ la.

³⁵ “ ‘Bawo i wara i kan-kɔ sɔ n na ka nyina n ko, i si tɔrɔya ka a tɛgɛ ila kei-koyɛ anubɛ ila yɛlɛnyɛ ma.’ ”

Ohola anubɛ Oholibata Kiti-Koe Alla Bolo

³⁶ Mari ya a fɔ n ye ko, “Ile hadama-dan, i rabɛnnɛ ka Ohola anubɛ Oholiba kiti? Anu bara kisimiriya-koe minnu nadan, i ni wo sɔ anu tɔ.

³⁷ Anu bara yɛlɛnyɛ kɛ ka mɔgɛnu faga. Anu ya yɛlɛnyɛ kɛ ka a tɛgɛ bɛsɛnu kɔ-koe ma. Anu ya anuna dannu faga ka anu ma bɛsɛ wonu beli-fan la, nta dannu, kɔni.

³⁸ Anu ma dan wo dɔrɔn ma. Anu ya nna Bato-Bɔn wo bɔrɔbɔ ka a latinya. N ya Sulen-Tele min natɛgɛ n nyɛrɛ ye, anu ya anu ban wo birɛ ma.

³⁹ Anu ya nna dannu faga ka anu bɔ sarakayɛ la tele min nyɛrɛ ma, anu nara ka nna Bato-Bɔn fanan natinya tele wo le ma.

⁴⁰ “Anu ya keinu kele ka bɔ wula-yan la. Wula-yanla-mɔgɛnuna ke, Ohola anubɛ Oholiba tara anu ku-tinɛ ka anu ya-siyi lafin ka anuna makiri-fannu kɛ anu ma.

⁴¹ Anu ya anu sigi sofa-nyimɛnu tɔ, fen-diyama-su bɛɛ kɛnɛ tebulu kuma anu yakɔrɔ nyɔ, hali isɛnti anubɛ tuli min dantɛgɛnɛ nde, Mari ma nun.

⁴² Baantore minnu nara ka bɔ wula-da-rakolɔn rɔ, n ya wonu siyaman sewa-kan lamɔɛn. Anu ya bolo-kalama-dɛɛn don musi wonu bole la ka fula-da-gbɛlɛnu sigi anu kunyɛ la sede!

⁴³ N ya a fɔ n nyɛrɛ ma ko, ‘Keinu bara musi minnu tinya kɛ, anu bi anu sala wonu denu fɛ, wa?’

⁴⁴ Ado nfan, kei wonu sɛbɛ-donnɛ ye sala Ohola anubɛ Oholiba fɛ.

⁴⁵ Mɔgɔ-telennɛnu si musi wonu yiliki ka a tɛgɛ anuna yɛlɛnyɛ anubɛ mɔgɔ-fagɛ ma bawo anu ya yɛlɛnyɛ min kɛ, ado fanan anu bole kɔsɔnɛ mɔgɛnu yele la.”

⁴⁶ Ma Tigi Mari ya a fɔ ko, “Mɔgɔ-siyaman ni a mini anu ma ka anu takilan ka anu kankan, Samariya anubɛ Yerusalɛm soenu, kɔni.

⁴⁷ Mɔgɔ-siyamɛ wonu ni anu mabon kuri la ka faannu bi anu kan ma. Anu ni anuna dannu faga ka anuna bɔnnu mintan.

⁴⁸ N si tɔn sigi anu kɛ-nya-yogomɛnu na. Wonu bara-koe si ma makawandili tamasere la nyamanɛ bɛɛ rɔ musi bɛɛ ye ka a tɛgɛ yɛlɛnya-koe ma.

⁴⁹ N si anu tɔrɔ anu sɔn-yogomɛ anubɛ anuna bɛsi-kɔ-koela ko la. Anu si a lɔn wo le ma ko anu Tigi Mari le nde la.”