Isikiyɛli 17 - ALLALA KUMƐ

Kokɛ anubɛ Nɔnbɛ Wara-Koe

¹ Mari ya a fɔ nde, Isikiyɛli ye ko,

² “Ile hadama-dan, tili kɛ tɛgɛ Isirɛla mɔgɛnu ye

³ alako anu ni a lɔn nde, wo Tigi Mari ye min fɔla wo ye. Kokɛ-belebele do ye nyɔ nun min kanban tafulennɛ. A kanban-tiyi wonu kin dɔgɔma-ma-de! A kanban wonu tagbɛlɛ. A gbanta ka ta Lɛbanan kɔnkɛnu kuma. A ke nyɔ, a ya sida-kɔn-sungban do keri.

⁴ A tara wo la ka a ki soe do burɔ yilanuna nyamanɛ rɔ nyɔ.

⁵ “Wo kɔma, a tara ki-fan do bi Isirɛla nyamanɛ rɔ. A tara wo ki dugu-tɔnɔma-tinɛ do rɔ, yi ti gbala kan min.

⁶ Ki-fan wo nanfara ka ma nɔnbɔ-gbɔfɛ la. A bolɔn donu yɛlɛta kokɛ wara la san ma. A suli yigira dugi rɔ waru! A matiira dɔgɔma-ma-de!

⁷ “N ya kokɛ-gbɛrɛ yen min ma ke a fɔlɔtɛ rɔ. A kanbannu kolo, ado a tiyinu siya a ma. Ki-fan wo ya a suli donu nata kokɛ doi kɛ wara la. A yanba-kunyɛ bɛɛ telennɛ kokɛ kɛ la alako wo si a yi sa nya min ka tenbi a kinɛ kan min.

⁸ Ki-fan wo kinɛ nun dugu-hakikɛ le tɔ. Ni a tora nyɔ nun, a si nɔrɔn a kilɛ fɛ ka gbɔ-siyaman kɛ, ado a mafɛlɛn si diya.

⁹ “Woletɔ nde, wo Tigi Mari ye nyinikalɛ sala ni ki-fan kɛ si to sabatila. Ade, kokɛ fɔlɔtɛ wo si a wurun ka a gbɔɛ wonu keri a la. Ni a ya a bolɔn do ka a ma, a bɛɛ la si fɔsɔ. A sa sɛnbɛ labɔla a wurun tinɛ. A sa a makofu nyinina.

¹⁰ Hali a kira a kin na, a si a laban? Fɔn-kalamɛ wa na, a ti gbala? Ɔn, a si gbala a sɔ-gbɛ rɔ.”

Tili Kɛ Kɔrɔ Fɔ-Koe

¹¹ Wo kɔma, Mari ya a fɔ n ye ko,

¹² “Mɔgɔ-murutiyanɛnu manyinika, wa, ni anu ya tili kɛ kɔrɛ lɔn. A fɔ anu ye ko Babilɔn mansɛ nara Yerusalɛm soe burɔ. A tara Yuda mansɛ anubɛ a mɔgɔ-banu dununa a bolo Babilɔn nyamanɛ rɔ.

¹³ Babilɔn mansɛ ya Yuda mansɛ wola dan do bi ka sarama-kan do kiri anu nyɔgɔn tɛma alako anu kana na anu nyɔgɔn kɛlɛ. A tara mɔgɔ-ba wonu na biralɛ rɔ nun

¹⁴ alako Isirɛla mɔgɛ wonu kana na wuli anu kan ma. A ya wo ma le alako ka sarama-kan wo mabalan.

¹⁵ Kɔnɔ Yuda mansɛ wo murutiyara. A ya kilayɛnu nata Iyipiti nyamanɛ rɔ alako a ni kɛlɛ-soeenu anubɛ kɛlɛ-den-siyaman sɔrɔn. A si ke wo bɛɛ mala le, wa? Ade, a ti sarama-kan wo tinya, a tɔrɔbɛlɛ ni to!

¹⁶ “Nde, wo Tigi Mari Alla ko n bara n keli n nyɛrɛ rɔ ko, ‘Fɔ Yuda mansɛ kɛ wa faga Babilɔn nyamanɛ rɔ,’ bawo a ya ala sarama-kan tinya ka a kan bɔ a gbɛ rɔ anubɛ Babilɔn mansɛ ya min kiri, ado Babilɔn mansɛ wo ya ale sigi mansayɛ la Yuda nyamanɛ rɔ nun.

¹⁷ Hali Iyipiti mansɛla kɛlɛ-den-tagbɛlɛnu ti ke a dɛnbɛna kɛlɛ kɛ rɔ. Babilɔn kɛnu si bɔnkɛ ladɛn tarɛ kɔma alako mɔgɔ-siyaman ni yɛlɛ tarɛ ma kɛlɛ-kɛ-tinɛ soe wo burɔ ka mɔgɔ-siyaman faga nyɔ.

¹⁸ Sarama-kan min bi anu tɛma, Yuda mansɛ wo ya a waralɛ tinya woletɔ a kunyɛ ti bɔ a rɔ.

¹⁹ “Wo le ya a ma, nde, wo Tigi Mari Alla ko n bara n keli n nyɛrɛ rɔ ko n si a tɔrɔ ka a tɛgɛ sarama-kan-tinyɛ wo ma, a ya min kiri n tɔgɔ rɔ.

²⁰ N si yalɛ laburun a kuma ka a bira wo la. N si a bi ka ta a la Babilɔn nyamanɛ rɔ ka a tɔrɔ nyɔ bawo a ma a telen n ye.

²¹ Ala kɛlɛ-den-tagbɛlɛmɛnu kunyɛ si to kɛlɛ rɔ. Ni min kunyɛ ma to kɛlɛ wo rɔ, wonu ta si nyɛnsɛn kan-tinɛ bɛɛ rɔ. Wo ye a lɔnna wo le ma ko nde, Mari kan le kɛ la.

Mɔgɛnu Yili-Madiya Koe Mari Bolo

²² “Nde, wo Tigi Mari kan le kɛ la ko n si sida-kɔlɔma-layan-bɛ-sore keri a la. N ni ta wo ki kɔnkɔ-layan-bɛ do kuma,

²³ Isirɛla kɔnkɔ-layan-bɛ, kɔni. A si a matii ka a bolon-siyaman sɔ a ma. A si gbɔ ka ma sida-kɔn-hakikɛ la. Nyɔ si ma kona-su bɛɛ sigi-tinɛ la. Anu si to anu sigila a ninɛ la.

²⁴ Nyamanita kɔlɔma bɛɛ si a lɔn ko Mari le nde la. N si kɔlɔma-layan-bɛnu tɛgɛ alako kɔlɔma-mɛsɛnu ni anu nyɛrɛ sɔrɔn. N si kɔn-kurannu nagbala ka kɔn-gbalanɛnu nanɔrɔn. Nde, Mari le wara kɛ fɔ, ado fɔ n ba a ma le, yɔ!”