Isikiyɛli 11 - ALLALA KUMƐ

Yerusalɛm Kiti-Koe

¹ Allata Sɛnbɛ ya n bi ka ta n na Bato-Bɔn tele-bɔɛ don-dɛ la. N ya kei mɔgɔ mogan-ni-loli yen sɔni don-dɛ wo dafɛ. Esurila den Yeyasanaya anubɛ Bɛnayala den Pɛlataya ye anu tɛma. Anuna kun-tigi le mɔgɔ filɛ kɛnu na.

² Mari ya a fɔ n ye ko, “Ile hadama-dan, kɛnu denu bi miriya-yogomɛnu tabɛnna ka Yerusalɛm kɛnu makawandi boloko-yogomɛ-kɛ.

³ Anu bi a fɔla ko, ‘A ti mɛ tun, ma ara bon-sɔɛ dabira. Soe kɛ mani de iko sogo-te-dagɛ, ado male mani de a rɔ iko soge. Kɔnɔ hali wo, dagɛ ye ma lakananna tɛ ma.’

⁴ Woletɔ, ile hadama-dan, wɔlɔyiya-kumɛ fɔ anu ye ka anu makuma!”

⁵ Marita Sɛnbɛ donta nde, Isikiyɛli rɔ. A ko n ni ata kilayɛ kɛ latenbi wole, Isirɛla mɔgɛnu ma ko a ya wo da le lɔn, ado a ya wo kɔntɔ-koenu fanan lɔn.

⁶ A ko wo ara mɔgɔ-siyaman faga ha soe la ara fa suyi la wo bolo penpen!

⁷ A ko ale wo Tigi Mari Alla ye min fɔla wo ye, wo le kɛ la. A ko wole ya a fɔ ko soe kɛ mani de iko sogo-te-dagɛ, ado tonyɛ le wo la. Kɔnɔ soge wo ye yon na? Nba, wo ara mɔgɛ min bɛɛ faga terr, wo le soge wo la. A ko wo ti a laban dagɛ wo rɔ, ado a ye nala wo gbenna ka wo labɔ soe kɛ rɔ fass!

⁸ Wo kilannɛ faannu na, wa? A ye nala faan-tiginu na wo kan ma.

⁹ A ko a si wo labɔ soe kɛ burɔ ka wo don sibolo-gbɛrɛnu bolo. A ara wo faga-koe latɛgɛ,

¹⁰ ado a ko wo kunyɛ si to kɛlɛ rɔ wota nyamanɛ kɛ rɔ yan. Woletɔ bɛɛ si a lɔn ko ale le wota Mari la.

¹¹ Soe kɛ ti wo latanka iko dagɛ ye soge latankala tɛ ma nya min. Wole Isirɛla mɔgɛ minnu bi Isirɛla nyamanɛ kan-tinɛ bɛɛ rɔ, a ko a si wo tɔrɔ wo dama rɔ.

¹² A ko wo si a lɔn worɔ ko wota Mari le ale la bawo sibolo-gbɛrɛ minnu bi wola foolɛ rɔ, wo ya wonuta tɔnnu bira ka aletɛnu tinya.

¹³ N bi wɔlɔyiya-kumɛ kɛ kun na, Bɛnayala den Pɛlataya fagara kuren! N ya n naburun a ma dugi ma ka n dɛ sa-a-rɔ. N ko, “E, n Tigi Mari! Isirɛla mɔgɛ toenu nato-sɔgɛ ye i la, wa?”

Lanyiri Kiri-Koe Alla Bolo Mɔgɔ-Biranɛnu Ye

¹⁴ Wo kɔma, Mari ya a fɔ n ye ko,

¹⁵ “Ile hadama-dan, Yerusalɛm kɛnu bi kumala ile, Isikiyɛli anubɛ i na-kelen-nyɔgɛ Isirɛla bɔnsɔn-mɔgɛnu bara-koe rɔ minnu bi biralɛ rɔ, kɔni. Anu bi a fɔla ko, ‘Mɔgɔ-biranɛ wonu fɛ-yan Mari bato-tinɛ la, ado a ara nyamanɛ kɛ ma male Yerusalɛm kɛnu denutɛ la, anu denuta ma!’

¹⁶ “Ta nde, Marita kumɛ fɔ i na-kelen-nyɔgɔ mɔgɔ-biranɛ wonu ye. A fɔ anu ye ko nde le ya anu tanyɛnsɛn ka anu nata wula-yannu na sibolo-gbɛrɛnu tɛma. A fɔ anu ye ko hali anu bi kan-tinɛ minnu tɔ wo la, n bi anu fɛ nyɔnu tɔ, ado anu si n bato nyɔnu tɔ.

¹⁷ “Woletɔ a fɔ anu ye ko nde, anu Tigi Mari ko n si anu nabɔ nyɔnu tɔ ka anu kundɛn. N si Isirɛla nyamanɛ don anu bolo tun.

¹⁸ Anu ba sɛgi Isirɛla nyamanɛ rɔ tumɛ min, anu bi bɛsi-makɔsɔnɛ minnu taranna nyɔ rɔ, fɔ anu ni wo bɛɛ kasara pɔ!

¹⁹ N si a ma, anu sɔndɔmɛ ni sa anu nyɔgɔn kuma ka miriya-nyimɛ di anu ma. Sɔndɔmɛ min gbɛlɛyanɛ iko kuri, n si wo bɔ anu burɔ ka tɔn-bira-sɔn di anu ma.

²⁰ Wo kɔma, anu si anu telen ka nna tɔnnu bira. Anu si ma nta mɔgɛnu na. Nde fanan si ma anuta Alla la.

²¹ Kɔnɔ bɛsi-makɔsɔni-batoe di minnu ye anubɛ ko-yogoma-su bɛɛ, n si wonu dama tɔrɔ. N si anu tɔrɔ ka a tɛgɛ anu bara min ma n na. Nde, wo Tigi Mari kan le kɛ la.”

Allata Gbiliyɛ Bɔ-Koe Yerusalɛm Soe Burɔ

²² Nima-fen-kanbannamɛ wonu gbanta anubɛ anu kian wonu. Isirɛlata Allata wan-takanɛ ye anu kuma.

²³ Wo kɔma, Marita wan-takanɛ wo ya Yerusalɛm boloka. Kɔnkɛ min bi soe wo tele-bɔɛ wara la, a yɛlɛta nyɔ kuma.

²⁴ Ko-rayirɛ wo rɔ, Marita Sɛnbɛ ya n kɔrɔbi ka n nayɛlɛ san ma. A sɛgira n na mɔgɔ-biranɛ wonu bara Babilɔn nyamanɛ rɔ. N ke nyɔ, nna ko-rayirɛ wo banta.

²⁵ Wo kɔma, Mari ara koe min bɛɛsi yira n na tɛrr, ko-rayirɛ wo rɔ, n ya wo rakaran mɔgɔ-biranɛ wonu ye.