Hoseya 7 - ALLALA KUMƐ

¹ Mari ko, “Wole nta Isirɛla mɔgɛnu nakɛndɛya-sɔgɛ wa n bira tumɛ min ka wo wara-koe lata yarɔ, n si wola karagbɛlɛyɛ le dɔrɔn yen n yɛ la. Wo ye wo nyɔgɔn kensunyala. Wo ye bɔnnu kerila ka kankanyɛ kɛ. Wo ye buila mɔgɛnu ma lu-kole ma ka anu bolo-fannu bi anu bolo.

² N miriya sa wo la ko nde, Alla si wo bira wo yili la. Wo hakɛ mininɛ wo ma iko gbɔfɛ, ado wo hakɛ gbɛnɛ n yɛ la feu!”

Yanfanteyɛ Don Koe Mansɛla Bolɔn La

³ Mari ko, “Wole Isirɛla mɔgɛnu bi karagbɛlɛya-su bɛɛ rabɛnna mansɛ anubɛ ala mɔgɔ-banu kan ma bolɔn la.

⁴ Setani-mɔgɛ le wo dama la. Wo telenni ma mansɛ ye. Wola koninteyɛ mani de iko mɔgɔ wa ta-wɔlɔn bɔ ta-kɔnɛ kuma.

⁵ Mansɛ wa wuli ladiyɛ kɛla tumɛ min, wo le si a ma, mansɛ anubɛ ala mɔgɔ-banu ni anu min kɔlikɔli!

⁶ Yanfanteyɛ min bi wole karagbɛlɛnu yisi rɔ, wo ye sisila wo burɔ iko tɛ. Koninteyɛ wo min bi kila sisila wo burɔ, sɔgɔma wo ye wo le latasakarala mansɛ anubɛ ala mɔgɛnu ma.

⁷ “Wole karagbɛlɛnu bara wola kun-tigi faga wola koninteya-dogonnɛ la. Wo ara ban wola mansɛnu fagala kelen-kelenyɛ ma kɔnɔ anu do-wo-do ma nde, Mari manyinika dɛnbɛni-koe la.”

Isirɛla anubɛ Anu Dan-Masa-Nyɔgɛnu Bara-Koe

⁸ Mari ko, “Wole Isirɛla mɔgɛnu bara ma fuyi la. Wo mani de iko dɛgɛ wa mintan, a ni kerun a ya-kelan ma. Wo dunnɛ wo dan-masa-nyɔgɛnu denu na wo kanan-koe la.

⁹ Sɛnbɛ sa wo bolo tun bawo wo ara wo dun sundan wonu na. Sundan wonu bi wo tabundenna kɔnɔ wo sa wo kalama.

¹⁰ Wole Isirɛla mɔgɛnu, wola wasinteyɛ ye sereyɛ bɔla wo kan ma. Hali koe min bara tenbi nun, wo ma wo miri wonu ma ka sɛgi nde, Mari Alla ma.

¹¹ Wo hɛnkili dɔgɔyanɛ iko kangbɔɛtɛ. Wo ye ta-ni-sɛgi kɛla Iyipiti anubɛ Asiriya nyamanɛnu tɔ ka a tɛgɛ wo dɛnbɛn-koe ma.

¹² Kɔnɔ wole minnu bi ta-ni-sɛgi kɛla wo dɛnbɛn-koe la, nde, Mari si wo bira yalɛ la iko mɔgɛ si kona bira yalɛ la nya min. N si wo tɔrɔ ka a tɛgɛ wola karagbɛlɛyɛ ma.

¹³ “Gbalo ye wo kuma bawo wo ara nde, Mari boloka ka murutiya n ma. Fɔ wo wa halaki! Wo lakanan-sɔgɛ ye n na nun kɔnɔ wo sa n batola tonyɛ kuma.

¹⁴ Wo ma n matara wo yisi la fɔ ka wo nyɛrɛ gbesi dugi la ka belenna dila iko Alla-lɔnbɛlɛnu bi a mala nya min. Wo tenbi n matarala dɔn-fen-koe la, wo ye belenna wo mafarafarala iko kafirinu. Mɔgɔ-murutiyani-bɛrɛbɛrɛ le wo la.

¹⁵ Hali n bi wo makole min kɛla alako wo ra ni gbɛlɛya, wo ye sɛgila yanfɛ donna n ma.

¹⁶ Wo ye wo kan-kɔ donna n na ka ta bɛsɛnu bara la, sɛ sa minnu ye. Ni mɔgɛ si la kalabɛn tadunɛ la, mani mɔgɛ si la wole la. Wola kun-tiginu mɔnima-faga si kɛ bawo mankan-tugu-kan le ye anu da rɔ, ado Iyipiti kɛnu si na wo mayɛlɛn.”